1 Ket adu met a propeta ti dimteng kadagiti aldaw ni Com, ket impadtoda ti pannakadadael dagita naindaklan a tao malaksid no agbabawida, ket umasidegda iti Apo, ket tallikudanda ti kinamammapatay ken kinadangkesda.

2 Ket napasamak a sinupring dagiti tao dagiti propeta, ket kimmamangda ken ni Com a paisalakan, ta sinapul ida dagiti tao a papatayen.

3 Ket adu a banag ti impadtoda ken ni Com; ket nabendisionan kadagiti nabati nga aldawna.

4 Ket nagbiag a nasayaat iti panaglakayna, ken naaddaan iti anak a ni Shiblom; ket ni Shiblom ti simmublat kenkuana a nagturay. Ket immalsa ti lalaki a kabsat ni Shiblom kenkuana, ket nangrugi dita ti nalaus ti kadakkelna a gubat iti daga.

5 Ket napasamak nga imbilin ti lalaki a kabsat ni Shiblom a mapapatay amin dagiti propeta a nangipadto iti pannakadadael dagiti tao;

6 Ket adda nakaro a didigra iti amin a daga, ta pinaneknekanda nga adda dumteng a nakaro a lunod iti daga, ken kasta met kadagiti tao, ket iti kasta addanto nakaro a pannakadadael kadakuada, kas iti di pay napasamak iti rabaw ti daga, ket agbalin dagiti tulangda a kasla buntuon ti daga iti rabaw ti daga malaksid no agbabawida iti kinadangkesda.

7 Ket dida dimngeg iti timek ti Apo, gapu iti nadangkes a panagkukunsaboda; gapuna, nangrugi ti gubgubat ken sinnupanget iti amin a daga, ken kasta met nga adu ti panagbisin ken angol, iti kasta adda nakaro a pannakadadael, kas iti di pay pulos napasamak iti rabaw ti daga; ket amin dagitoy napasamak kadagidi aldaw ni Shiblom.

8 Ket nangrugi dagiti tao a nagbabawi iti basbasolda; ket iti kasta nga inaramidda kinaasian ida ti Apo.

9 Ket napasamak a napapatay ni Shiblom, ket nabalud ni Set, ket nagnaed iti pagbaludan iti unos ti panagbiagna.

10 Ket napasamak a nagun-od ni Ahah, ti lalaki nga anakna, ti pagarian; ket inturayanna dagiti tao iti unos ti panagbiagna. Ket inaramidna amin a kita ti pagbasolan iti unos ti panagbiagna, a nangibilinanna ti pannakaibukbok ti dara; ket bassiten ti aldawna.

11 Ket nagun-od ni Ethem, kas an-annabo ni Ahah, ti pagarian; ket inaramidna met ti kinadangkes kadagiti aldawna.

12 Ket napasamak a dimteng ti adu a propeta kadagiti aldaw ni Ethem, ket impadtoda manen kadagiti tao; wen, impadtoda nga awan duadua a dadaelento ida ti Apo iti rabaw ti daga malaksid no agbabawida kadagiti basolda.

13 Ket napasamak a pinatangken dagiti tao ti puspusoda, ket saanda a dimngeg kadagiti balikasda; ket nagladingit dagiti propeta ken pimmanawda kadagiti tao.

14 Ket napasamak nga impatungpal ni Ethem ti pangngeddeng babaen ti kinadangkes iti unos ti panagbiagna; ket naaddaan iti anak a ni Moron. Ket napasamak a simmublat ni Moron a nagturay; ket inaramid ni Moron ti kinadangkes iti sango ti Apo.

15 Ket napasamak a nariing ti yaalsa kadagiti tao, gapu iti dayta nalimed a kinnunsabo a nabukel a panggun-od iti bileg ken rang-ay; ket adda limtuad a maingel a lalaki kadakuada a managbasol, ket kinarangetna ni Moron, a nangpadisianna iti kagudua ti pagarian; ket inasikasona ti kagudua ti pagarian iti adu a tawen.

16 Ket napasamak a pinadisi ni Moron, ket nagun-odna manen ti pagarian.

17 Ket napasamak nga adda manen sabali a limtuad a maingel a lalaki; ket an-annabo ti kabsat ni Jared.

18 Ket napasamak a pinadisina ni Moron ket nagun-odna ti pagarian; gapuna, nagnaed ni Moron iti pagbaludan kadagiti amin a nabati nga aldawna; ket naaddaan iti anak a ni Coriantor.

19 Ket napasamak a nagnaed ni Coriantor iti pagbaludan iti unos ti panagbiagna.

20 Ket dimteng met ti adu a propeta kadagiti aldaw ni Coriantor, ket impadtoda dagiti naindaklan ken nakaskasdaaw a banag, ket inyararawda ti panagbabawi kadagiti tao, ket malaksid no agbabawida ipatungpal ti Apo a Dios ti pangngeddeng a mangiturong kadakuada iti awan duadua a pannakadadael;

21 Ket iti kasta mangyeg ti Apo a Dios iti sabali a tattao a mangtagikua iti daga, babaen ti bilegna, a kas iti wagas a panangyegna kadagiti ammada.

22 Ket sinupringda amin dagiti balikas dagiti propeta, gapu iti nalimed a gimong ken nadangkes a makarimon nga aramidda.

23 Ket napasamak a naaddaan ni Coriantor iti anak a ni Ether, sa natay, iti panagindegna iti pagbaludan iti unos ti panagbiagna.