1 Ao a roko naba burabeti aika a mwaiti i nanon ana bong Koom, ma n taetae ni burabetiia kamaunakia te botanaomata ae korakora arei ngkana aki rairinanoia, ma n rairaki nakon te Uea, ma ni kitan aia tiriaomata ma buakakaia.

2 Ao e a koro bukina bwa burabeti a bon totokoaki irouia aomata, ao a birinako nakon Koom ibukin kamanoakiia, bwa aomata a bon ukoukora tiringakiia.

3 Ao a taetae ni burabeti nakon Koom ibukin bwaai aika a bati; ao e bon kakabwaiaki i nanon nikiran ana bong ni maiu.

4 Ao e maiu ni karokoa ae e a kara, ao e karika Tiburom; ao e tautaeka Tiburom i mwina. Ao tarin Tiburom e kaitara, ao e a rikirake te buaka ae korakora n te aba ni kabuta.

5 Ao e a koro bukina bwa tarin Tiburom e a karekea te anga ake burabeti ni kabane ake a taetae ni burabetia kamaunakiia te botanaomata a na bane n tiringaki.

6 Ao e korakora te kaangaanga ni kabuta te aba, bwa a tia n taetae ni burabetia te rekenikai ae korakora are e na roko iaon te aba, ao i aoia naba aomata, ao bwa e na iai te urubwai ae korakora i buakoia, ae akea n ai arona iaon te aba mai i mwaaina, ao a na bwarietata riia iaon te aba ngkana aki rairinanoia ma ni buakakaia.

7 Ao a bon aki ongo ni bwanaan te Uea, ibukin aia botaki ni kamwamwane ni karaba; ngaia are, e a moanna n riki te buaka ma te itabaraaraa ni kabuta te aba, ao taian rongo naba aika a mwaiti ma aoraki nako, n te aro are e a korakora te urubwai, ae tuai ma n nonoraki iaon te aba mai i mwaaina; ao a bane ni koro bukiia aikai i nanon ana bong Tiburom.

8 Ao aomata a waaki n rairinanoia ma ni buakakaia; ao ngke a karaoa aei ao te Uea e bon nanoangaia.

9 Ao e a koro bukina bwa Tiburom e bon tiringaki, ao Teeta e bon uotaki nakon te tautoronaki, ao e maeka i nanon te tautoronaki i nanon ana bong ni maiu ni kabane.

10 Ao e a koro bukina bwa Aa, are natina te mwaane, e bon karekea te abanuea; ao e bon tautaeka i aoia ana botanaomata i nanon ana bong ni kabane. Ao e karaoi aekan bure nako i nanon ana bong ni kabane, are e bon karika kawawaean te raraa ae bati; ao a karako ana bong.

11 Ao Eetem, are kanoan Aa, e bon karekea te abanuea; ao e bon karaoa naba ae buakaka i nanon ana bong ni maiu.

12 Ao e a koro bukina bwa i nanon ana bong ni maiu Eetem ao a roko burabeti aika a mwaiti, ma n taetae ni burabeti nakoia aomata; eng, a bon taetae ni burabetia bwa te Uea e na kamaunaia mai iaon te aba ngkana aki rairinanoia man aia bure.

13 Ao e a koro bukina bwa aomata a bon kamatoatoai nanoia, ma n rawa n ongo n aia taeka; ao a nanokawaki burabeti ao a nako mai i buakoia aomata.

14 Ao e a koro bukina bwa Eetem e bon karaoa te motikitaeka n ae buakaka i nanon ana bong ni maiu ni kabane; ao e karika Moron. Ao e a koro bukina bwa Moron e bon tautaeka n onea mwiina; ao Moron e karaoa ae buakaka i matan te Uea.

15 Ao e a koro bukina bwa e a rikirake te kaitara i buakoia aomata, ibukin botaki ni karaba aika buakaka are a kateaki ibukin karekean te tautaeka ao te raka; ao e a teirake temanna te mwaane ae korakora ma i buakoia i nanon te buakaka, ao e buakana Moron, are e a konaia iteran mwaitia kaain te abanuea; ao e bon tararua are iteran te abanuea i nanon ririki aika a mwaiti.

16 Ao e a koro bukina bwa Moron e bon kabwaka, ma ni manga anaa riki te abanuea.

17 Ao e a koro bukina bwa e a manga teirake riki te mwaane temanna ae korakora; ao bon kanoan tarin Iareta.

18 Ao e a koro bukina bwa e bon kabwaka Moron ma n taua te abanuea; ngaia are e a maeka i nanon te tautoronaki Moron i nanon nikiran ana bong ni maiu; ao e karika Koriantoa.

19 Ao e a koro bukina bwa Koriantoa e maeka i nanon te tautoronaki i nanon ana bong ni maiu.

20 Ao i nanon ana bong ni maiu Koriantoa ao a roko naba burabeti aika a mwaiti, man taetae ni burabetii bwaai aika a mwaiti aika a korakora ma ni kamimi, ma n takaruaea te rairannano nakoia te botanaomata, ao ti ngkana a rairinanoia ao te Uea ae te Atua e na karaoi motikitaeka ni kaaitaraia nakon kamaunakia.

21 Ao te Uea ae te Atua e na kanakoia ke e na karokoia te botanaomata teuana bwa a na bwaina te aba, ni mwaakana, n aekan te aro are e karokoia iai aia bakatibu.

22 Ao a bon aki butimaai aia taeka ni kabane burabeti ibukin aia botaki ni karaba ma buakakan aia mwakuri aika bati n ribaki.

23 Ao e a koro bukina bwa Koriantoa e karika Ita, ao e mate, i mwin tiana ni maeka i nanon te tautoronaki i nanon ana bong ni maiu ni kabane.