1 Era sa lako tale ga mai e vuqa na parofita ena gauna i Komu, ka ra parofisaitaka na vakarusai ni kawa tamata levu ko ya ka vakavo ga kevaka era veivutuni ka gole vua na Turaga, ka biuta na nodra daulaba kei na caka ca.

2 Ka sa yaco ni ra sa sega ni ciqomi ira na parofita ko ira na tamata, ka ra sa dro na parofita vei Komu me taqomaki ira, ni ra sa segata na tamata me ra vakamatei ira.

3 Era sa parofisaitaka vei Komu e vuqa na ka; sa kalougata kina ko koya ena taucoko ni nona bula.

4 A sa bula tiko ko koya me yacova ni sa qase sara, ka sa qai sucu na luvena ko Sipulomu; ka sa tui ko Sipulomu me kena isosomi. Ka sa vorati Sipulomu ko tuakana ka sa tekivu kina e dua na ivalu levu sara ena vanua taucoko.

5 Ka sa yaco ni sa lewa ko tuakai Sipulomu me ra vakamatei kece na parofita era a parofisaitaka na nodra vakarusai na tamata;

6 Ka sa yaco na ka vakadomobula ena vanua taucoko, ni ra a sa vakadinadinataka, ni na yacova na vanua kei ira na tamata e dua na cudruvi levu ka na yaco e dua na veivakarusai levu ena kedra maliwa me vaka e a se sega mada ni yaco vakadua ena dela i vuravura, ka na vaka na ibinibini qele na suidra ena dela ni vanua ka vakavo ga kevaka era sa veivutunitaka na nodra caka ca.

7 Era sa sega ga ni muria na domo ni Turaga ena vuku ni nodra vei isoqosoqo ni caka ca; a sa tekivu kina na veileti ka tubu na ivalu ena vanua taucoko, ka sa levu tale ga na dausiga kei na mate dauveitauvi, ka sa yaco kina e dua na veivakarusai levu ka sa sega mada ni yaco vakadua e delai vuravura; a sa yaco na ka kece oqo ena gauna ni lewa i Sipilomi.

8 Era sa tekivu veivutunitaka na nodra caka cala ko ira na tamata; ia ni ra kitaka vakakina sa yalololoma tale vei ira na Turaga.

9 Ka sa yaco ni sa vakamatei ko Sipulomu, ka sa kau vakavesu ko Seci, ka sa tiko vakavesu ena nona bula taucoko.

10 Ka sa yaco ni sa taura na matanitu ko Eiya na luvena; ka lewai ira na tamata ena nona gauna. A sa kitaka na itovo ca kecega ena nona gauna ka sa yaco kina na vakadave dra; ia sa lekaleka wale ga na nona bula.

11 Ka sa lewa na matanitu ko Icemi me vaka ni kawa i Eiya; ka sa kitaka tale ga ko koya na ka sa ca ena nona gauna.

12 Ka sa yaco ni ena gauna i Icemi, era sa lako mai kina e vuqa na parofita ka ra parofisai tale vei ira na tamata; io, era sa parofisaitaka ni na vakarusai ira vakadua sara na Turaga mai na dela i vuravura, ka vakavo ga kevaka era sa veivutunitaka na nodra caka cala.

13 Ka sa yaco ni ra sa vakaukauwataka ga na lomadra ko ira na tamata ka sega ni muria na nodra vosa na parofita; era sa rarawa na parofita ka ra vakasuka mai na kedra maliwa na tamata.

14 Ka sa yaco ni sa sega ni lewa vakadodonu ko Icemi ena nona gauna taucoko ni lewa; a sa sucu na luvena ko Moroni. Ka sa yaco ni sa tui ko Moroni me kena isosomi; ka sa cakava ko Moroni na ka sa ca ena mata ni Turaga.

15 Ka sa yaco ni sa tubu e dua na veisaqasaqa ena kedra maliwa na tamata ena vuku ni isoqosoqo vuni ka a tara cake me ra rawata na kaukauwa kei na rawa ka; a sa tubu ena kedra maliwa e dua na tamata qaqa ena veika ca ka valuti Moroni, ka rawa kina na veimama ni matanitu; a sa taura tu na veimama ni matanitu me vuqa na yabaki.

16 Ka sa yaco ni sa rawai koya ko Moroni ka taura tale na matanitu.

17 Ka sa yaco ni sa tubu e dua tale na tamata qaqa, ka sa kawa i tuakai Jereti.

18 Ka sa yaco ni sa vakamalumalumutaki Moroni ka taura na matanitu; a sa tiko vakavesu kina ko Moroni ena vo taucoko ni nona bula; a sa sucu na luvena ko Korianito.

19 Ka sa yaco ni sa tiko vakavesu ko Korianito ena gauna taucoko ni nona bula.

20 Ia ena gauna i Korianito era sa lako tale mai kina e vuqa na parofita, ka ra sa parofisaitaka na veika levu ka talei ka tukuna vei ra na tamata me ra veivutuni, ka kevaka era sa sega ni veivutuni, ena vakatauca vei ira na Turaga na Kalou na nona lewa ka ra na vakarusai vakadua sara kina;

21 Ka ra parofisaitaka ni na qai tala se kauta mai na Turaga na Kalou e dua tale na matatamata me ra mai taukena na vanua ko ya, ia ena kauti ira mai ena nona kaukauwa, ena sala vata ga e a kauti ira mai kina na nodra qase.

22 Era sa sega ni ciqoma na nodra vosa kece na parofita ena vuku ni nodra isoqosoqo vuni kei na itovo vakasisila.

23 Ka sa yaco ni sa sucu na luvei Korianito ko Ica; ka sa mate ko Korianito, ni a tiko vakavesu ko koya ena gauna taucoko ni nona bula.