1 Ac inge nga, Moroni, tahfwelah in ahksahfyelah ma sihmlac ke kuhnausyucklac luhn mwet suc nga sihmihs kac inge.

2 Tuh liye, elos sruhnga nohfohn kahs lal Ether; tuh pwacyena el fahk nuh selos ke ma nuhkwewa, e ke muhtwacwacackiyacn mwet uh; ac tuh tukun kof uh srihkeni liki acn se inge acn se inge eklac sie acn wolacna liki acn nuhkwewa sahyac, sie acn suleyucklac luhn Leum; ohinge Leum El kena tuh mwet nuhkwewa in kuhlwacnsapel suc muhta fin acn we;

3 Ac tuh acn se inge pa acn luhn Jerusalem Sasuc, ma ac fah oactui liki inkuhsrao, ac acn muhtahl luhn Leum.

4 Liye, Ether el liye pacl luhn Kraist, ac el sramsramkihn sie Jerusalem Sasuc fin acn se inge.

5 Ac el oacyacpac sramsramkihn mwet Israel, ac Jerusalem se ma Lehi el tuhkuh we me—tukun kuhnausyucklac ac fah sifilpac muhsahiyuckyak, sie siti muhtahl nuh sin Leum; ohinge, tiac kuh in Jerusalem sasuc ke srihpen ma ke pacl mahtuh ah; tuhsruhk ac fah sifilpac muhsahiyuckyak, ac eklac sie siti muhtahl luhn Leum; ac ma inge enenuh in muhsahiyuckyak nuh sin mwet Israel—

6 Ac tuh Jerusalem Sasuc enenuh in muhsahiyuckyak fin acn se inge, nuh sin mwet luhlah luhn fitac lal Joseph, nuh ke ma suc oasr sie ohiyac.

7 Tuh ke Joseph el use pahpah tuhmwacl nuh fin acn Egypt, na el misac we; ohinge, Leum El use sie un mwet luhlah sin fitac lal Joseph liki acn Jerusalem, tuh Elan pahkotwen nuh sin fihtac lal Joseph tuh elos tiac misac, finne oacna ke El tuh pahkotwen nuh sin pahpah tuhmwacl Joseph tuh elan tiac misac.

8 Ohinge, un mwet luhlah luhn mwet lal Joseph ac fah muhsahyak fin acn se inge; ac fah sie acn in usru lalos; ac elos fah muhsaheack sie siti muhtahl nuh sin Leum, oacna Jerusalem ke pacl mahtuh; ac elos fah tiac sifilpac ahkfohsyeyuck, ne ke na pacl sahflah uh tuhkuh ke facluh fah wacngihnlac.

9 Ac fah oasr sie inkuhsrao sasuc ac facluh sasuc; ac elos fah oacna pacl mahtuh met ah sahyacn na pacl mahtuh ah somlah, ac ma nuhkwewa eklac sasuc.

10 Ac na Jerusalem Sasuc tuhkuh; ac insewowo elos suc muhta we, tuh elos pa suc nuknuk lalos fasrfasrlah ke srah luhn Lahm; ac elos pa elos suc oacwaclah inmahsrlon un mwet luhlah ke fitac lal Joseph, suc pa mwet Israel.

11 Ac na Jerusalem ke pacl mahtuh oacyacpac tuhkuh; ac mwet muhta we, elos insewowo, tuh elos ahknwacsnwacsyeyucklac ke srah luhn Lahm; ac elos pa elos suc tuh fahsrelihk ac orekweni nuh sie liki srowasrihk ahkosr fin facluh, ac liki acn ma oan nuh acir, ac elos mwet ipeis ke ahkpwacyeiyuck luhn wuhlweacng ma God El tuh oraclah nuh sin pahpah tuhmwaclos, Abraham.

12 Ac ke ma inge tuhkuh, in oraclah ma ma suhmuhslah uh fahk kac, elos pa elos suc ac pa emet, suc ac fah sahflah; ac elos pa elos suc sahflah, suc fah pa emet.

13 Ac nga tuh oruh in suhmuhslah kuhtuh pac, tuhsruhk sruhngwacyuck; tuhsruhk yohk srihpac ac wolacna kahs in pahluh lal Ether; tuhsruhk elos tiac ahkfuhlwactyacl, ac luhsuhlwack; ac el tuh wihklac ke lun sie yot ke lwen uh, ac ke fong el som liye ma suc ac tuhkuh nuh fin mwet uh.

14 Ac ke el muhta lun sie yot el oraclah ma luhlah ke ma sihmlac se inge, el liye kuhnausyucklac ma tuhkuh nuh fin mwet uh, ke fong uh.

15 Ac tukun ma inge ke yac sepacna ma el tuh lihsyucklac liki inmahsrlon mwet uh muhtwacwacack in oasr sie mweun yohk inmahsrlon mwet uh, tuh oasr mwet pucspucs suc tuyak, suc mwet na fokoko, ac elos suk in kuhnaosuhllah Coriantumr ke plwacn lukmac lalos ke ma koluk, ma tuh sruhmuhnyuck.

16 Ac inge Coriantumr, ke el lutlut, el sifacna, ke ohiyacn mweun nuhkwewa ac inkacnek kuhtasrihk luhn facluh, ohinge el mweun nuh selos suc suk in kuhnaosuhllah.

17 Tuhsruhk el tiacna auliyak, tiac pac wen kuh acn oaskuh nahtuhl; tiac pac wen ac acn oaskuh nahtuhl Cohor; tiac pac wen ac acn oaskuh nahtuhl Corihor; ac in ahkkahlwemye, wacngihn kuhtwena wen ac acn oaskuh fin facluh nohfohn suc auliyak ke ma koluk lalos.

18 Ohinge, tukun ma inge ke yac se emet ma Ether el muhta lun yot sac, mwet pucspucs acnwucki ke katlas luhn un mwet lukmac, acnwuck laenuhl Coriantumr tuh elos in kuh in sruokyac tohkohsrahi.

19 Ac tukun ma inge wen nahtuhl Coriantumr elos acnwuck yohk ac srahsrah yohk.

20 Ac ke yac ahkluo kahs luhn Leum tuhkuh nuh yohrohl Ether, tuh el enenuh in som ac palye nuh sel Coriantumr lah, el fin auliyak, ac mwet nuhkwewa in lohm sel, Leum El ac sang nuh sel tohkohsrahi lal ac molwelah mwet uh—

21 Fin tiac elos ac kuhnausyucklac, ac mwet nuhkwewa in lohm sel sahyacl sifacna. Ac el muhkwena in moul in liye ahkpwacyeiyucklac luhn kahs in pahluh ma tuh sruhmuhnyuck ke mwet sahyac ac eis acn uh in mwe usru lalos; ac elos ac pihkihnilyac Coriantumr; ac mwet nuhkwewa ac kuhnausyucklac sahyacl Coriantumr.

22 Ac tukun ma inge Coriantumr el tiacna auliyak, tiac pac mwet in lohm sel, tiac pac mwet uh; ac mweun uh tiacna tui; ac elos suk in unilyac Ether, tuhsruhk el kahinglac luhkwelos ac sifilpac wihklac lun yot sac.

23 Ac tukun ma inge Shared el tuyak, ac el oacyacpac som mweun nuh sel Coriantumr; ac el tuh kuhtanguhllah, yohkna tuh ke yac ahktolu el tuh usacluh nuh ke srohoh.

24 Ac wen nahtuhl Coriantumr, ke yac ahkahkosr, elos tuh kuhtanguhllah Shared, ac tuh sifilpac eislah tohkohsrahi nuh sin pahpah tuhmwacl.

25 Inge muhtwacwacack in oasr sie mweun fin acn ah nohfohn, mwet nuhkwewa wi u lal in acnwuck nuh ke ma el kena kac.

26 Ac oasr mwet pihsrapasr, ac in ahkkahlwemye, kain in ma koluk nuhkwewa fin acn ah nohfohn.

27 Ac tukun ma inge Coriantumr el arulacna kasrkuhsrak sel Shared, ac el som laenuhl wi un mwet mweun lal in mweun; ac elos ohsun ke kasrkuhsrak yohk, ac elos tuh ohsun ke infahlfahl Gilgal; ac mweun sac arulacna upac.

28 Ac tukun ma inge Shared el acnwuck laenuhl ke lusen lwen tolu. Ac tukun ma inge Coriantumr el kuhtanguhllah, ac tuh ukwacl ne ke na el tuhkuh nuh ke acn tuhpahsrpahsr Heshlon.

29 Ac tukun ma inge Shared el sifilpac som mweun laenuhl ke acn tuhpahsrpahsr; ac liye, el tuh kuhtanguhllah Coriantumr, ac el sifilpac ukwaclwack nuh ke infahlfahl Gilgal.

30 Ac Coriantumr el sifilpac som mweun nuh sel Shared ke infahlfahl Gilgal, ac el kuhtanguhllah Shared ac unilyac.

31 Ac Shared el kantwelyac Coriantumr ke finyepahl, oruh el tiacna sifilpac som mweun ke lusen yac luo, in pacl mwet nuhkwewa fin acn ah tuh ahkmas, ac wacngihn kuhtwena mwet in tulohkohnuhlosi.