1 Ao ngkai e a roko te rekenikai ae korakora iaon te aba ibukin buakakaia aomata, n te aro are ngkana e katuka ana bwai ni mwakuri te aomata ke ana kabaang iaon ana tabo ni bwai, nooria, n te bong are i mwina, e a bon aki kona n reke irouna, ao nooria e a bon korakora te maraia iaon te aba.

2 Ngaia are ni kabane aomata a bon tautaua ni baia te bwai are bon aia bwai, ma n rawa n tangobwai ke n anganako aia bwai; ao ni kabane aomata a katikui baia te angatai iaon bwain tauan aia kabaang, bwa a na kaawakin aia bwai, ma oin maiuia ao maiuia buuia ma natiia.

3 Ao ngkai, i mwin uoua te ririki, ao i mwin maten Tiareta, nooria e a teirake tarin Tiareta ao e a buakana Koriantamwa, are e a konaaki iai iroun Koriantamwa ao e kakioa nakon te rereua are Akiti.

4 Ao e koro bukina bwa tarin Tiareta e buakanna n te rereua are Akiti; ao e a rikirake ni korakora te buaka, ao a mwaiti ngaa ma ngaa aika a bwaka n te kabaang.

5 Ao e koro bukina bwa Koriantamwa e a katobibia ma n taua te rereua; ao tarin Tiareta e bon mwananga n otinako man te rereua n te bong ma n tiringia mwakoron ana taanga ni buaka Koriantamwa bwa a bon manging.

6 Ao e roko nakon te aba are Moron, ma n toka i aon ana kaintoka ni uea Koriantamwa.

7 Ao e koro bukina bwa e maeka Koriantamwa ma ana taanga ni buaka i nanon te rereua i nanon te maan ae uoua te ririki, ao n te tai anne e bon karekea te marurung ae korakora nakon ana taanga ni buaka.

8 Ngkai tarin Tiareta, are bon arana Kireata, e bon karekea naba te marurung ae korakora nakon ana taanga ni buaka, man taian botaki ni karaba aika buakaka.

9 Ao e koro bukina bwa ana ibonga are e rietata e bon tiringnga i nanon ana tai n tekateka iaon ana kaintoka ni uea.

10 Ao e koro bukina bwa temanna mai i buakoia kaain te botaki ni karaba aika buakaka e bon tiringa te ibonga are e rietata i nanon te kawai ae karaba ao e taua te abanuea i bon ibukina; ao arana bon Riibu; ao Riibu bon te aomata ae korakora abwakina, i aoia aomata ni kabane.

11 Ao e koro bukina bwa n ana moan ririki Riibu, e roko Koriantamwa nakon te aba are Moron ma ni buaka ma Riibu.

12 Ao e koro bukina bwa e buaka ma Riibu, ao Riibu e orea baina ao e ikoaki; ma e ngae n anne ana taanga ni buaka Koriantamwa a bon waaki ni kakioa Riibu, n te aro are e a biri nako nakon te tia i mataniwin taari.

13 Ao e koro bukina bwa Koriantamwa e bon kakioa; ao e buaka Riibu mangaia i mataniwin taari.

14 Ao e koro bukina bwa Riibu, e bon orea ana taanga ni buaka Koriantamwa, ao a biri nakon te rereua are Akiti.

15 Ao e koro bukina bwa Riibu e bon kakioa ni karokoa ae e roko n te tabo ae aoraoi are Akoti. Ao Koriantamwa e bon kairiia nako aomata ni kabane i nanon ana tai ni biri nako mai iroun Riibu nakon mwakoron te aba are e birinako iai.

16 Ao ngke e a roko nakon te tabo are e aoraoi are Akoti e buaka ma Riibu, ao e oroia ni karokoa e a mate; ma e ngae n anne, e bon roko tarin Riibu ni kaitaraa Koriantamwa n onea mwiina, ao e bon kakamaku korakoran aron te buaka, n te aro are e a manga birinako riki Koriantamwa mai matan ana taanga ni buaka tarin Riibu.

17 Ngkai aran tarin Riibu bon Tiiti. Ao e a koro bukina bwa Tiiti e bon kakioa Koriantamwa, ma ni kabwakai kaawa aika a mwaiti, ao e bon tiringia aine ao ataei, ma ni kaurarakei taian kaawa.

18 Ao e bon rikirake maakan Tiiti ni kabuta te aba; eng, e a tanoata te takarua ae kangai ni kabuta te aba—Antai ae kona n tei i mwaain ana taanga ni buaka Tiiti? Nooria, e taeanako te aba are i mwaaina.

19 Ao e koro bukina bwa aomata a bon ikoikotaki n aia taanga ni buaka, ni kabuta te aba.

20 Ao a bon bwenauaki; te mwakorona e nako nakon ana taanga ni buaka Tiiti, ao te mwakorona e nako nakon ana taanga ni buaka Koriantamwa.

21 Ao e bon korakora ma ni maan te buaka, ao e a bon warenako maanin katiinakoan te raraa ma te urubwai nakon te maiu, n te aro are e a rabunaki te aba n rabwataia ake a mate.

22 Ao e bon kakoauaki baitiin ma waekoan te buaka n te aro are ai bon akea are e a tiku bwa e na tauniia naake a mate, ma a bon waaki ma ni kawawaean te raraa nakon kawawaean te raraa ma ni katikui rabwataia mwaane, aine, ao ataei bwa ana raea iaon te aba, bwa a na riki bwa kanaia inon te iriko.

23 Ao e a waaki nako boiraaia ni kabuta te aba; n te aro are a aikoa rau aomata n te ngaina ao te bong ibukin te boi.

24 Ma e ngae n anne, ao Tiiti e bon aki toki ni kakioa Koriantamwa; bwa e a tia ni berita bwa e na irantaangaia nakon Koriantamwa ibukin raraan tarina, are e a tia n tiringaki, ao e roko ana taeka te Uea nakon Ita bwa e na bon aki bwaka Koriantamwa n te kabaang.

25 Ao ngaia are ti nooria bwa e bon kawaria te Uea i nanon bwaninin unna, ao buakakaia ma aia mwakuri aika bwati n ribaki a bon katauraoa te kawai ibukin tiringakia ae aki totoki.

26 Ao e a koro bukina bwa Tiiti e bon kakioa Koriantamwa nako mainiku, nakon te tia i rarikin mataniwin taari, ao ikekei are e a buaka ma Tiiti i nanon te maan ae teniua te bong.

27 Ao e a bon taotira korakoran te tiritiri i buakoia ana taanga ni buaka Tiiti n te aro are a moanna ni maaku aomata, ao a waaki ni biri nako mai irouia ana taanga ni buaka Koriantamwa; ao a birinako nakon te aba are Korioa, ma n tiringia ni kabane kaaina ake i mwaaia, ni kabane ake a rawa n iria.

28 Ao a katei aia umwanrianna n te mwarua are Korioa; ao Koriantamwa e katea ana umwanrianna n te mwarua are Tiee. Ngkai te mwarua are Tiee e mena n te tabuki are Kaomnoa; ngaia are Koriantamwa e bon ikotiia ana taanga ni buaka iaon te tabuki are Kaomnoa, ma ni katanga te bu nakon ana taanga ni buaka Tiiti bwa e kaoiia bwa ana buaka.

29 Ao e a koro bukina bwa a bon roko, ao a kakioaki, ao a manga roko riki kaua, ao a manga kakioaki riki te kauatai. Ao e a koro bukina bwa a manga roko riki te katentai, ao e a bon rianako korakoran aron te buaka.

30 Ao e a koro bukina bwa Tiiti e orea Koriantamwa n te aro are e a bati ikoakina; ao Koriantamwa, e a bua raraana ae bati, ngaia are e a tong, ao e a uotaki nako n aron ae aongkoa e a mate.

31 Ngkai, e a bon riaon ae riai korakoran buaia aine ao mwaane ma ataei man itera aika uoua n te aro are Tiiti e a tuangiia ana aomata bwa a na aki kakioia ana taanga ni buaka Koriantamwa; ngaia are a okirikaki nakon aia tabo ni maeka.