1 Ac tukun ma inge ke Coriantumr el kwelac ke kihnet lal, el muhtwacwacack in esam kahs ma Ether el tuh fahk nuh sel ah.

2 El liye lah apkuhran in sun million luo ke mwet lal suc misac ke katlas, ac el muhtwacwacack in ahsor ke insiacl; ahok, acnwucki million luo ke mukul fokoko, ac oacyacpac muhtwacn kiyaclos ac tuhlihk nahtuhlos.

3 El muhtwacwacack in auliyak ke ma koluk ma el oraclah; el muhtwacwacack in esam kahs ma tuh sruhmuhnyuck ke oalin mwet pahluh nuhkwewa, ac el liye lah ma inge ahkpwacyeiyuck in oacna, ma nuhkwewa; ac nguhnal ahsor ac sruhnga in ahkwoyeyuck.

4 Ac tukun ma inge el suhmuhslah sie lwacta nuh sel Shiz, kena sel tuh elan fuhlwelah moul luhn mwet uh, ac el ac fuhlweack tohkohsrahi uh nuh ke srihpen moul luhn mwet uh.

5 Ac tukun ma inge ke Shiz el eis lwacta se lal ah el suhmuhslah sie lwacta nuh sel Coriantumr, tuh el fin fuhlwelwack sifacna, tuh elan kuh in unilyac ke katlas nahtuhl sifacna, elac fuhlwelah moul luhn mwet uh.

6 Ac tukun ma inge mwet uh tiacna auliyak ke ma koluk lalos; ac mwet lal Coriantumr elos pihrihkyuckyak ke kasrkuhsrak in lain mwet lal Shiz; ac mwet lal Shiz elos tuh pihrihkyuckyak ke kasrkuhsrak in lain mwet lal Coriantumr; ohinge, mwet lal Shiz elos tuh som mweun nuh sin mwet lal Coriantumr.

7 Ac ke Coriantumr el liye tuh elac puhtatlac el sifilpac kahinglac liki mwet lal Shiz.

8 Ac tukun ma inge el tuhkuh nuh ke inkof Ripliancum, ma, in tuhtahflah, yohk, kuh yohk liki nuhkwewa; ohinge, ke elos tuhkuh nuh ke inkof inge elos kaskiyac lohm nuknuk selos; ac Shiz el oacyacpac kaskiyac lohm nuknuk sel oan fototo nuh yohrohlos; ac ke ma inge ke lwen tok ah elos tuh tuhkuh in mweun.

9 Ac tukun ma inge elos acnwuck ke sie mweun na upac, ac Coriantumr el sifilpac kihnetuh, ac el muhlallah ke yohklac srah kahklac kacl.

10 Ac tukun ma inge un mwet mweun lal Coriantumr elos tuh fungyang nuh fin un mwet mweun lal Shiz tuh oruh elos kuhtanguhloslac, tuh elos oruh elos kainglac luhkwelos; ac elos tuh kahinglac nuh epang, ac tuh kaskiyac lohm nuknuk selos ke sie acn ma pahngpahng Ogath.

11 Ac tukun ma inge un mwet mweun lal Coriantumr elos tuh kaskiyac lohm nuknuk selos ke sisken inging Ramah; ac nuh inging soko pacna ma pahpah tuhmuhk Mormon el tuh okanlah ma sihmlac nuh sin Leum, ma muhtahl.

12 Ac tukun ma inge elos tuh oracni nuh sie mwet nuhkwewa fin acn ah nohfohn, suc tiacna acnwucki, sahyacl Ether.

13 Ac tukun ma inge Ether el tuh liye orekma nuhkwewa luhn mwet uh; ac el liye lah mwet ma weluhl Coriantumr ah elos toeni nuh sie nuh ke un mwet mweun lal Coriantumr; ac mwet ma weluhl Shiz ah toeni nuh sie nuh ke un mwet mweun lal Shiz.

14 Ohinge, ke lusen yac ahkosr elos oracni nuh sie mwet uh, tuh elos in kuh in eis nuhkwewa mwet ma muhta fin acn uh, ac tuh elos in kuh in eis kuh nuhkwewa ma elos kuh in eis.

15 Ac tukun ma inge ke elos nuhkwewa orekweni nuh sie, mwet nuhkwewa nuh ke un mwet mweun ma el ke welah, wi muhtwacn kiyaclos ac tuhlihk nahtuhlos—kwewa na mukul, muhtwacn ac tuhlihk uh eis kuhfa in mweun, mwe loang, ac mwe loang finpihsac, ac mwe loang sifac, ac nukum nuknuk in mweun—elos tuh fahsr som sie in lain siepac ke mweun; ac elos acnwuck lwen na fohn se, ac tiac kuhtanglah.

16 Ac tukun ma inge ke fongweni elos tohtohlah, ac som monglac ke nien monglac lalos; ac tukun elos som monglac ke nien monglac lalos elos wowoyak ac yoksrah ke misac luhn mwet acnwucki luhn mwet lalos; ac arulacna yohk tuhng lalos, wowoyak ac yoksrah lalos, tuh oruh elos tuh arulacna wohnwaclihk acn uh.

17 Ac tukun ma inge ke lwen tok ah elos tuh sifilpac som in mweun, ac upac ac koluk lwen sac; ne ohinge, elos tiac kuhtanglah, ac ke fong uh sifilpac tuhkuh elos tuh wohnwaclihk acn uh ke tuhng lalos, ac wowoyak lalos, ac ahsor lalos, ke misac luhn mwet acnwucki luhn mwet lalos.

18 Ac tukun ma inge Coriantumr el sifilpac suhmuhslah sie lwacta nuh sel Shiz, kena tuh elan tiac sifilpac tuhkuh in mweun, tuhsruhk tuh elan eis tohkohsrahi, ac fuhlweacng moul luhn mwet uh.

19 Tuhsruhk liye, Nguhn luhn Leum tui tilac weluhlos, ac Setuhn el sruok kuh nuhkwewa ke insiacn mwet uh; tuh elos fuhlweack nuh ke kwekweiyacn insiaclos, ac lohsr luhn nuhnak lalos tuh elos in kuh in kuhnausyucklac; ohinge elos sifilpac som in mweun.

20 Ac tukun ma inge elos acnwuck lwen na fohn se, ac ke fong uh tuhkuh elos mutul fin katlas nahtuhlos.

21 Ac ke lwen tok ah elos acnwuck ne ke na fong uh tuhkuh.

22 Ac ke fohng uh tuhkuh elos sruhilac ke kasrkuhsrak, oacna ke sie mwet el sruhilac ke wine; ac elos sifilpac mutul fin katlas nahtuhlos.

23 Ac ke lwen tok ah elos sifilpac acnwuck; ac ke fong uh tuhkuh elos nuhkwewa misac ke katlas sahyacn na mwet lamngaul ac luo sin mwet lal Coriantumr, ac onngoul ac yuc sin mwet lal Shiz.

24 Ac tukun ma inge elos mutul fin katlas nahtuhlos ke fong sac, ac ke lwen tok ah elos sifilpac acnwuck, ac elos amacin ke kuhiyaclos ke katlas nahtuhlos ac ke mwe loang lalos, ke lwen na fohn sac.

25 Ac ke fong uh tuhkuh oasr mwet tolngoul ac luo ke mwet lal Shiz, ac longoul ac itkohsr ke mwet lal Coriantumr.

26 Ac tukun ma inge elos mongoi ac mutullac, ac ahkolah in misac ke lwen tok ah. Ac elos mwet yohk pihsac ac fokoko oacna nuh ke fokoko luhn mwet uh.

27 Ac tukun ma inge elos acnwuck ke lusen ao tolu, ac elos muhlallah ke kahklah luhn srah.

28 Ac tukun ma inge ke mwet lal Coriantumr elos tuh eis fokoko ma fal tuh elos in kuh in fahsr, elos oruh in kahinglac in painmoullac; tuhsruhk liye, Shiz el tuyak, ac oacyacpac mwet lal, ac el olwelah ke kasrkuhsrak lal lah elac unilyac Coriantumr kuh elac misac ke katlas.

29 Ohinge, el tuh ukwaclos, ac ke lwen tok ah el tuh sruohkohlosi; ac elos sifilpac acnwuck ke katlas. Ac tukun ma inge ke elos nuhkwewa tuh misac ke katlas, sahyacl Coriantumr ac Shiz, liye Shiz el tuh muhlallah ke kahklah luhn srah.

30 Ac tukun ma inge ke Coriantumr el fungyang nuh fin katlas nahtuhl, tuh elan monglac kihtin pacl, el pakwelah sifacl Shiz.

31 Ac tukun ma inge tukun el pakwelah sifacl Shiz, tuh Shiz el mayak nuh lucng ke pahol ac puhtatlac; ac tukun el tikuclkucl in momong, el misac.

32 Ac tukun ma inge Coriantumr el puhtatlac nuh infohk uh, ac oacna in muh wacngihnlac moul lal.

33 Ac Leum El sramsram nuh sel Ether, ac fahk nuh sel: Som. Ac el som, ac liye lah kahs luhn Leum ahkpwacyeiyucklac nohfohn; ac el ahksahfyelah ma sihmlac lal; (ac ip ahksiofok nga tiacna suhmuhslah) ac el okanlah ma inge ke sie ohiyac tuh mwet lal Limhi ah elos tuh konwacack ma inge.

34 Inge kahs sahflah ma sihmlac sel Ether ah pa inge: Yac lah Leum El kena tuh nga in eklac, kuh nga in kweokkihn luhngse luhn Leum ke mahno, tiac oasr srihpac, fin ohinge tuh nga ac moliyucklac ke tohkohsrahi luhn God. Amen.