1 Ac tukun ma inge Jared ac tamuhlwel lal, ac sucu lalos, ac oacyacpac kawuck lal Jared ac tamuhlwel lal ac sucu lalos, elos som nuh ke infahlfahl ma oan nuh lacfahl acir, (ac inen infahlfahl sac pa Nimrod, pahngpahng oacna mwet sroh kosro fokoko) us un kosro nahtuhlos ma elos tuh oracni nuh sie, mukul ac muhtwacn, ke kain nuhkwewa.

2 Ac elos tuh oacyacpac oakiyac sruhf in sruokyac won yen engyeng uh; ac elos tuh oacyacpac ahkolah sie mwe nweinyuck ah, ma elos tuh us weluhlos orekmakihn in nwacnwack ik inkof uh.

3 Ac elos tuh oacyacpac us deseret uh weluhlos, ma, ke lwenglac, pa sie bee ma orek ohni; ac ohinge elos tuh us un bee uh weluhlos, ac kain in ma nuhkwewa ma oan fin acn uh, kain in fihtac nuhkwewa.

4 Ac tukun ma inge ke elos tuh tuhkuh nuh ke infahlfahl lal Nimrod Leum El oactui ac sramsram nuh sin tamuhlwel lal Jared; ac El oasr lun sie puhkuhnyeng, ac tamuhlwel lal Jared el tiacna liyacl.

5 Ac tukun ma inge Leum El sapkihn nuh selos tuh elos enenuh in som nuh innimac ah, ahok, nuh ke acn ma soenna oasr mwet we. Ac tukun ma inge Leum El tuh som met luhkwelos, ac tuh sramsram nuh selos ke El tu lun sie puhkuhnyeng, ac ahkuhtweyac inkacnek ma elos enenuh in fuhfahsryucsr kac.

6 Ac tukun ma inge elos tuh fuhfahsryucsr ke innimac, ac tuh muhsaheack oak, ma elos tuh orekmakihn ke kof pucspucs, kolyuck pacl nuhkwewa ke poun Leum.

7 Ac Leum El tiacna lwelah tuh elos in tui na ke inkof ke innimac uh, tuhsruhk El kena tuh elos in tuhkuh nuh ke acn luhn wuhlweacng, ma wolacna liki acn nuhkwewa sahyac, ma Leum God El tuh oraclah in oan sano sie un mwet suwohswohs.

8 Ac El tuh fuhlahk ke kasrkuhsrak Lal nuh sin tamuhlwel lal Jared, tuh kuhtwena mwet suc muhta fin acn wihlwihl se inge, ke pacl sac fahlac ac ne tok ma pahtpaht, fah kuhlwacnsapwacl, God pwacye ac sefanna, kuh fin tiac elos ac lihsyucklac ke pacl se ma fohnlah luhn kasrkuhsrak Lal ac tuhkuh nuh faclos.

9 Ac inge, kuht kuh in liye masap luhn God ke acn se inge, lah sie acn luhn wuhlweacng; ac kuhtwena muhtuhnfacl ma ac fah sruokyac ac fah kuhlwacnsapuh God, kuh fin tiac elos fah lihsyucklac ke pacl se ma fohnlah luhn kasrkuhsrak Lal fah tuhkuh nuh faclos. Ac fohnlah luhn kasrkuhsrak Lal tuhkuh nuh faclos ke pacl se elos upaclah ke ma koluk.

10 Tuh liye, pa inge sie acn ma wolacna liki acn nuhkwewa sahyac; ohinge el suc muhta fin acn se inge fah kuhlwacnsapuh God kuh fin tiac el fah lihsyucklac; tuh pa inge masap ne tok ma pahtpaht luhn God. Ac tiac ne ke na pacl se ma fohnlah luhn ma koluk inmahsrlon tuhlihk fin acn uh, tuh elos ac lihsyucklac.

11 Ac ma se inge tuhkuh nuh yuruwos, O kowos mwet Gentile, tuh kowos in etuh masap luhn God—tuh kowos in auliyak, ac tiac fahfahlacna ke ma koluk lowos ne ke na pacl se fohnlah uh tuhkuh, tuh kowos in tiac use fohnlah luhn kasrkuhsrak luhn God nuh fowos oacna mwet suc muhta fin acn se inge ke pacl omeet ah tuh oruh.

12 Liye, pa inge sie acn wolacna, ac kuhtwena muhtuhnfacl ma ac sruokyac ac fah sukohsohk liki kapihr, ac liki srohoh, ac liki muhtuhnfacl nuhkwewa sahyac ye inkuhsrao, elos fin kuhlwacnsapuh God luhn acn uh, suc pa Jisus Kraist, suc ahkkahlwemyeyuck ke ma kuht suhmuhslah.

13 Ac inge nga tahfwelah ma sihmlac luhk; tuh liye, tukun ma inge Leum El tuh usacl Jared ac tamuhlwel lal nuh ke sie meoa luhlahp ma srwaclihk acn uh. Ac ke elos tuhkuh nuh ke meoa elos kaskiyac lohm nuknuk selos; ac elos pahngon inen acn sac Moriancumer; ac elos muhta ke lohm nuknuk, ac muhta ke lohm nuknuk ke pe acn ah ke lusen yac ahkosr.

14 Ac tukun ma inge ke sahflah yac ahkosr Leum El sifilpac tuhkuh nuh yurun tamuhlwel lal Jared, ac tu lun sie puhkuhnyeng ac sramsram nuh sel. Ac ke lusen ao tolu Leum El sramsram nuh sin tamuhlwel lal Jared, ac kaeluhl ke srihpen el tiac esam in pahngon inen Leum.

15 Ac tamuhlwel lal Jared el auliyak ke ma koluk ma el oraclah, ac tuh pahngon inen Leum nuh sin tamuhlwel lal suc tuh weluhl. Ac Leum El fahk nuh sel: Nga ac fah nuhnakmuhnahs nuh sum ac tamuhlwel lom ke ma koluk lalos; tuhsruhk kowos fah tiac sifilpac oruh ma koluk, tuh kowos fah esam lah Nguhn Luhk ac fah tiac kwacna wi mwet uh; ohinge, kowos fin oruh ma koluk ne ke na kowos arulacna upaclah kowos fah lihsyucklac liki ye muhtuhn Leum. Ac pa inge nuhnak luhk fin acn ma Nga fah usot nuh suwos in mwe usru lowos; tuh ac fah sie acn wolacna liki acn nuhkwewa sahyac.

16 Ac Leum El fahk: Som orekma ac muhsaheack, in oacna oak ma kowos tuh muhsaheack met ah. Ac tukun ma inge tamuhlwel lal Jared el tuh som orekma, ac oacyacpac tamuhlwel lal, ac muhsaheack oak in oacna ke elos tuh muhsaheack met ah, in fal nuh ke mwe ahkuhtweyac luhn Leum. Ac ma inge oak srihsrihk, ac muhlahlah fin kof uh, finne in oacna muhlahlahiyacn sie won fin kof uh.

17 Ac oak inge muhsahiyuckyak ke sie ohiyac ma oruh arulacna tihngtihng, finne oruh kuh in nwacnwack kof oacna sie ahluh; ac yac ah tihngtihng oacna sie ahluh; ac siskac ah tihngtihng oacna sie ahluh; ac muhta ah kahpuh ah kohsroh; ac fac ah tihngtihng oacna sie ahluh; ac lusaciyac ah oacna lusen sahk soko; ac motonoac ah, ke kauli, tihngtihng oacna sie ahluh.

18 Ac tukun ma inge tamuhlwel lal Jared el pruhe nuh sin Leum, fahk: O Leum, nga oruh orekma ma Kom sapkihn nuh sihk, ac nga oraclah oak in fal oacna ke Kom tuh sapkihn nuh sihk.

19 Ac liye, O Leum, wacngihn kahlwem lun oak uh; kuht ac kihfucs nuh oyac? Ac oacyacpac kuht ac misac, tuh kuht koflah in momong loac, sahyacn na eng ma oan loac uh; ke ma inge kuht ac fah misac.

20 Ac Leum El fahk nuh sin tamuhlwel lal Jared: Liye, kom fah oraclah sie luhf ah e fac, ac oacyacpac yac ah; ac ke kowos ac fah kweok enenuh in momong kowos fah eislah foht se ke luhf an ac eis eng. Ac fin kof uh tuhkuh nuh fowos, liye, kowos fah tulokihnyac afihnyac luhf sac, tuh kowos in tiac misac ke sronot.

21 Ac tukun ma inge tamuhlwel lal Jared el oraclah ohinge, in fal oacna ke Leum El sapkihn.

22 Ac el sifilpac pruhe nuh sin Leum fahk: O Leum, liye nga oraclah oacna ke Kom tuh sapkihn nuh sihk; ac nga ahkolah oak uh nuh sin mwet luhk, ac liye wacngihn kahlwem loac. Liye, O Leum, yac Kom ac lwelah tuh kuht in sahslah ke meoa luhlahp se inge in lohsr?

23 Ac Leum El fahk nuh sin tamuhlwel lal Jared: Meac kom kena tuh Nga in oruh tuh in oasr kahlwem ke oak okowos? Tuh liye, tiac kuh in oasr winto lowos kac, tuh ma inge ac fukfuk uh ipwelihk; kowos tiac pac kuh in utuck e wi kowos, tuh kowos fah tiac som ke kahlwem luhn e.

24 Tuh liye, kowos fah oacna sie loat in meoa uh; tuh noa fuhlwact ac fah srihngihl fin oak uh. Ne ohinge, Nga fah sifilpac eiskowoslac liki acn loal in meoa uh; tuh eng uh fahlac liki oalihk, ac oacyacpac Nga suhpwaclah af ac eng.

25 Ac liye, Nga ahkoekomlac in lain ma inge; tuh kom tiacna kuh in sahslah ke meoa loal luhlahp se inge sahyacn na Nga ahkoekomlac in lain noa meoa uh, ac eng ma Nga suhpwaclah, ac sronot ma ac fah tuhkuh. Ke ma inge meac kom kena tuh Nga in oruh in ahkoekomlac tuh kom in tolyuckyak ke kom ukumyucklac ke acn loal in meoa uh?