1 Ka sa yaco ni rau sa lako ko Jereti kei tuakana kei na nodrau matavuvale, kei ira na nodrau itokani kei na nodra matavuvale ki na buca ena vanua ki na vualiku, (sa vakayacani na buca ko ya vei Nimiroti, na dauvakasasa kaukaua) era sa kauta na nodra qele ni manumanu, na ka tagane kei na ka yalewa, ena kena veimataqali.

2 Era sa biria na dai ka toboka kina na manumanu vuka; era sa vakarautaka tale ga na saqa ni wai me ra biu kina na ika mai wai.

3 Era a kauta tale ga na jesereti, ko ya na bure ni oni; io era sa kauta na qele ni oni kei na veimataqali sore ni kau kecega ka tu ena dela ni vanua.

4 Ka sa yaco ni ra sa yaco ki na buca ko Nimiroti, sa lako sobu mai na Turaga ka vosa vua na tuakai Jereti; e a tiko ena loma ni dua na o ko koya ka sa sega ni raici koya rawa kina ko tuakai Jereti.

5 Ka sa yaco ni a vakarota na Turaga me ra lako yani ki na lekutu, io, ki na vanua e sa sega mada na tamata e butuka. Ka sa yaco ni a liutaki ira na Turaga, a sa dauvosa vei ira ni sa tucake tu ena dua na o, ka dusimaka na sala me ra muria.

6 Ka sa yaco ni ra sa lako ena loma ni lekutu, era sa ta waqa me ra kosova kina na wasawasa levu, sa dusimaki ira tiko na liga ni Turaga ena veigauna kece.

7 A sa sega ni vakatara na Turaga me ra tiko ga ena loma ni lekutu ena tai ni wasawasa ko ya, ia sa gadreva ko koya me ra lako yani ki na vanua yalataki, na vanua sa digitaki mai vei ira na veivanua kecega, o koya sa maroroya tu na Turaga na Kalou me nodra era sa ivalavala dodonu.

8 A sa bubului ena nona cudru vua na tuakai Jereti me ra qaravi koya na Kalou dina duadua ga ka tawamudu ko ira kecega era sa tawana na vanua yalataki mai na gauna koya ka lako yani me sega ni mudu, kevaka e sega, ena tau vei ira na taucoko ni nona cudru ka ra na vakarusai.

9 Ia oqo, eda sa raica na veika sa lewa oti tu na Kalou me baleta na vanua oqo, ni sa vanua yalataki; ia na matanitu cava ga ena taukena, me ra qarava na Kalou, kevaka e sega, ena tau vei ira na taucoko ni nona cudru waqawaqa ka ra na vakarusai. Ia ena tau vei ira na taucoko ni nona cudru waqawaqa ni ra sa vakarau tu ena vuku ni nodra caka cala.

10 Raica oqo na vanua sa digitaki mai vei ira na veivanua kecega; ia ko koya sa taukena, me na qarava na Kalou, kevaka e sega, ena vakarusai; ni sa lewa tawavakaiyalayala ni Kalou. Ia era na sega ni vakarusai me yacova ni sa taucoko na nodra caka cala ena kedra maliwa na lewe ni vanua.

11 Ia sa tukuni na ivakaro oqo vei kemudou na kai Matanitu Tani, mo dou kila kina na veivakaro ni Kalou—mo dou veivutuni kina, ka muduka sara na nomudou caka cala ni bera ni taucoko, me kakua kina ni tau vei kemudou na taucoko ni cudru waqawaqa ni Kalou me vaka era a cakava ko ira era a tawana tu e liu na vanua oqo.

12 Raica, oqo na vanua digitaki, ia era na galala mai na veivakabobulataki kei na tiko vakavesu kei na veimatanitu kecega e ruku i lomalagi ko ira kecega sa taukena, io ena sega ni dua na matanitu e vuravura e rawai ira, kevaka wale ga era qarava na Kalou ni vanua, sa i Jisu Karisito, ka sa vakatakilai ko koya ena veika kecega keimami sa vola.

13 Ia oqo me’u tomana na noqu itukutuku; raica ka sa yaco ni sa kauti Jereti yani kei ira na wekana na Turaga, ki na matasawa ni wasawasa levu sa wasea na vanua. Ia ni ra sa yaco ki matasawa, era sa birika kina na nodra vale laca; a ra sa vakatoka na vanua ko ya ko Morianikuma; era sa vakaitikotiko ena vale laca e matasawa me va na yabaki.

14 Ka sa yaco ni sa cava na va na yabaki, sa lako sobu mai na Turaga ka tu ena o ka veivosaki kei na tuakai Jereti. A sa veivosaki kei na tuakai Jereti me tolu na auwa, a sa cudruvi koya ni sa sega ni dau nanuma me masuta na yaca ni Turaga.

15 A sa veivutunitaka na ca e sa cakava ko tuakai Jereti, ka masulaki ira tale ga na wekana era sa tiko vata kei koya vua na Turaga. A sa kaya vua na Turaga: Au na vosoti iko ka vosota tale ga na nodra i valavala ca na wekamu; ia mo kakua ni valavala ca tale, raica mo nanuma ni na sega ni dau veivakauqeti tiko ga na Yaloqu kei na tamata; ia kevaka ko na i valavala ca tiko ga me yacova ni ko sa matua vinaka kina, ko na muduki tani mai na iserau ni Turaga. Sa i koya oqo na ka au sa nanuma me baleta na vanua au na solia vei iko me nomu ivotavota vakawa; ka ni na vanua digitaki mai vei ira na veivanua kecega.

16 Ka sa kaya na Turaga: Mo lako ka taya eso na waqa me vaka na icakacaka ni waqa ko a taya e liu. Ka sa yaco ni sa lako na tuakai Jereti kei ira na wekana ka ra taya eso na waqa me vaka na icakacaka ni waqa era a taya e liu, me vaka sa vakatakila vei ira na Turaga. Ia era sa waqa lalai ga ka mamada, raica sa mamada sara me vaka na manumanu vuka e dela ni wai.

17 A sa dregati vakaukauwa sara ka rawa me tawa kina na wai me vaka na dari; a sa dregati vakaukauwa tale ga na botona kei na yasana ruarua me tabogo vinaka me vaka na dari; sa dudu cake na muana ruarua ka dregati vakaukauwa na delana me tabogo vinaka me vaka na dari; ia na kena balavu sa vaka na balavu ni dua na vunikau; ia ni sa sogo na kena katuba, sa tasogo vinaka sara me vaka na dari.

18 Ka sa yaco ni sa masu vua na Turaga na tuakai Jereti ka kaya: Oi kemuni na Turaga, au sa vakayacora oti na cakacaka ko ni a vakarota vei au, io au sa taya na waqa ena kena icakacaka ko ni a dusimaka vei au.

19 Ka raica, kemuni na Turaga, e sega na rarama e lomadra; evei na vanua me keimami na vagolea kina? Sa rawa tale ga me keimami mate kina ni sega na cagi bulabula me keimami ceguva, ia na cagi ga sa tu rawa e lomadra; o koya keimami na mate kina.

20 A sa kaya na Turaga vua na tuakai Jereti: Raica, mo cakava e dua na qara e delana, ka vakakina e botona; ia ena gauna ko ni vinakata kina na cagi bulabula, mo dolava na qara me curu yani kina na cagi. Ia kevaka sa curu yani kina na wai, raica, mo sogota na qara mo ni na kakua kina ni mate ena waluvu.

21 Ka sa yaco ni a vakayacora na tuakai Jereti me vaka sa vakarota vua na Turaga.

22 A sa masu tale vua na Turaga ka kaya: Oi kemuni na Turaga, raica au sa vakayacora me vaka ko ni a vakarota vei au; au sa vakarautaka na nodra waqa na noqu tamata, ia sa sega ga na rarama e loma ni waqa. Oi kemuni na Turaga, ko ni na laiva li me keimami soko kosova na wasawasa levu oqo ena butobuto?

23 A sa kaya na Turaga vua na tuakai Jereti: A cava ko vinakata me’u kitaka me ra rarama kina na nomudou waqa? Raica ena sega ni rawa ni ra vaka-katubaleka, ni ra na kakabasubasu; mo dou kakua tale ga ni kauta na bukawaqa, ni dou na sega ni lako ena rarama ni bukawaqa.

24 Raica, dou na vaka na tavuto ena loma ni wasaliwa; ena sovulaki kemudou na ua lelevu ni wasawasa. Ia, au na kauti kemudou tani mai na loma ni wasaliwa titobu; ni sa lako yani na cagi mai na gusuqu, kei na uca tale ga kei na waluvu ka’u sa tala yani.

25 Ka raica au sa vakarautaki kemudou ki na veika oqo; ni na sega ni rawa mo dou kosova na wasaliwa titobu oqo ka vakavo kevaka au sa vakarautaki kemudou mo dou sotava na ua ni wasawasa, kei na cagi sa lako yani kei na waluvu ka na qai yaco mai. Ia na cava ko vinakata me’u vakarautaka me nomudou cina ni dou sa kosova na wasaliwa titobu?