1 Iwe non ewe fansoun pwe Jared me pwin we, me ar kewe famini, me pwan chiechian Jared me pwin we me ar famini, ra feitiw ngeni ewe nemonun chuk minne a nom ennefen, (iwe itan ewe nemonun chuk Nimrod, pokiten a eiteit mwirin ewe chon kut man mi napanap) fiti nour kewe penen man minne ra fen ionfengeni, niemwan me niefefin, seni sokopaten nikinik.

2 Iwe ra pwan for sar me tuf mansusun fan nang; iwe ra pwan ammonata ew sepi, non minne ra uwei ngeni ir ekkewe ikken non ekkewe konik.

3 Iwe ra pwan uwei ngeni ir deseret, minne, ren awewen kapas, itan punechin sisata; iwe iei ra uwei ngeni ir mwicheichen sisata, me sokopaten met minne mi nom won unungen ewe fonu, foun iran sokopaten nikinik.

4 Iwe non ewe fansoun pwe nupwen ra feitiw ngeni ewe nemonun chuken Nimrod ewe Samon a feitiw me kapas ngeni pwin Jared we; iwe a nom non ew kuchu, iwe pwin Jared we ese kuna i.

5 Iwe non ewe fansoun pwe ewe Samon a annuku ngeni ir pwe repwe feino ngeni non ewe fonu pon, ewer, ngeni non ena kinikin ikewe esamo wor aramas ra fen no ie akkom. Iwe non ewe fansoun pwe ewe Samon a feino me mwer, me a kapas ngeni ir nupwen a uta non ew kuchu, me ngeni ir aurour ika ian repwe saino ie.

6 Iwe non ewe fansoun pwe ra sai non ewe fonu pon, me ra fana ekkoch mwota, non minne ra sai won chommong matau, iwe ra soposopono ne emmwen me ren poun ewe Samon.

7 Iwe ewe Samon esap mutata pwe repwe kouno won ewe epekin ewe sat non ewe fonu pon, nge i a mochen pwe repwe feito pwan mwo ngeni ewe fonuen pwon, minne mi kefinita nap seni meinisin pwan ekkoch fonu, minne ewe Samon Kot a fen tumunu fan iten ew aramas mi tupwon.

8 Iwe a fen akkapon non an ningeringer ngeni pwin Jared we, pwe ion chok epwe fonueni ei fonuen pwon, seni ei fansoun me feinfeino, repwe angang ngeni i, ewe ennetin me anamonun Kot, are esap ina repwe rosotiw nupwen unusochun an ningeringer epwe feito wor.

9 Iwe iei, sia tongeni kuna ekkewe annuk an Kot usun ei fonu, pwe a ew fonuen pwon; iwe met chok muu epwe fonueni epwe angang ngeni Kot, are esap ina repwe rosotiw nupwen unusochun an ningeringer epwe feito wor. Iwe unusochun an ningeringer a feito wor nupwen ra wachemukeno non angangangaw.

10 Pun nengeni, ei a ew fonu minne mi kefinita nap seni meinisin pwan ekkoch fonu; ina minne i ewe epwe fonueni epwe angang ngeni Kot are esap ina epwe rosotiw; pun ina ewe annuk esemuch an Kot. Iwe esap mwen unusochun angangangaw me nein ekkewe semiriten ewe fonu, ar repwe rosotiw.

11 Iwe ei a feito ngenikemi, O ami chon Gentile, pwe oupwe tongeni sinei ekkewe annuk an Kot—pwe oupwe tongeni aier, me ousap soposopono non ami angangangaw tori ewe unusoch epwe feito, pwe oupwe tongeni watiw ewe unusochun ningeringer an Kot womi usun ekkewe aramasen ewe fonu ra fen fori.

12 Nengeni, ei a ew fonu mi kefinita, iwe met chok muu epwe fonueni epwe ngaseno seni fotek, me seni kanapus, seni ekkoch muu meinisin fan nang, ika pwe repwe angang ngeni ewe Koten ewe fonu, i Jises Kraist, ewe a fen pwano me ren ekkewe mettoch minne sia fen makketiw.

13 Iwe iei ua sopweno ai uruo; pun nengeni, non ewe fansoun pwe ewe Samon a uweiato Jared me pwin we ngeni ewe anonnonun sat minne a eimufeseni ekkewe fonu. Iwe nupwen ar feito ngeni ewe sat ra aueta imwer kewe imw mangaku; iwe ra eita ngeni ewe neni Morinakamer; iwe ra nonnom non imw mangaku, me nonnom non imw mangaku won oressetin ewe fonu ren ukukun ruanu ier.

14 Iwe non ewe fansoun atun nesopun ewe ruanu ier pwe ewe Samon a feito sefan ngeni pwin Jared we, me a uta non ew kuchu me kapas ngeni i. Iwe ren ukukun unungat awa ewe Samon a kapas ngeni pwin Jared we, me fonou i pokiten ese chechemeni an epwe kokkori iten ewe Samon.

15 Iwe pwin Jared we a aier seni ewe ngaw minne a fen fori, me a kokkori iten ewe Samon fan iten pwin kewe ekkewe ra nonnom ren. Iwe ewe Samon a apasa ngeni i: Upwe omusokono me pwium kewe seni ar tipis; nge ousap chiwen tipis sefan, pun oupwe chechemeni pwe Nguni we esap chok nonnom ren aramas; ina minne, ika oupwe tipis tori ami oupwe unusochun mwukono oupwe pokupokuno me mwen mesen ewe Samon. Iwe ikkei ai ekiek usun ewe fonu minne upwe ngenikemi pwe fonuemi; pun epwe ew fonu mi kefinita nap seni meinisin pwan ekkoch fonu.

16 Iwe ewe Samon a apasa: Feino angang me fana, anongonong won napanapen mwota minne ka fen akkom faner. Iwe non ewe fansoun pwe pwin Jared we a feino me angang, me pwan pwin kewe, me fana mwota anongonong won ewe napanap minne ra fen faner, anongonong won ekkewe aurour an ewe Samon. Iwe ir mi kukkun, me ir mi pan me on ewe matau, pwan usun panen emon mansusu me won ewe matau.

17 Iwe ra faner anongonong won ew napanap pwe repwe fokkun ngut, pwe repwe tongeni amwochu konik usun chok ew sepi; iwe epinipinin we mi ngut usun ew sepi; me nepekin kewe mi ngut usun ew sepi; me nesopun kewe mi ken; me unungan we mi ngut usun ew sepi; me taman we a usun tamen efoch ira; me asaman we, nupwen a epung, mi ngut usun ew sepi.

18 Iwe non ewe fansoun pwe pwin Jared we a sio ngeni ewe Samon, a apasa: O Samon, ua fen fori ewe angang minne ka fen annuku ngeniei, me ua fen fori ekkewe mwota anongonong won met ka fen auroura ngeniei.

19 Iwe nengeni, O Samon, non ir ese wor saram; ian am aupwe akunnano ie? Iwe am aupwe pwan mano, pun non ir am ause tongeni ngasangas, tiwenon chok ewe asepwan minne mi nom non ir; iei minne am aupwe mano.

20 Iwe ewe Samon a apasa ngeni pwin Jared we: Nengeni, kopwe fori ew pwang won unungan we, me pwan fan epinipinin; iwe nupwen oupwe mochen asepwan oupwe suki ewe pwang me angei asepwan. Iwe ika pwe ewe konik epwe kusunong womi, nengeni, oupwe apungano ewe pwang, pwe ousap mano non ewe konik a puunong.

21 Iwe non ewe fansoun pwe pwin Jared we a fori, anongonong won met ewe Samon a fen annuku.

22 Iwe a pwan sio ngeni ewe Samon a apasa: O Samon, nengeni ua fen fori usun ka fen annuku ngeniei; iwe ua fen amonnata ekkewe mwota fan iten nei kewe aramas, iwe nengeni ese wor saram non ir. Nengeni, O Samon, kopwe mutata pwe am aupwe saino won ei anonnonen matau non rochopwak?

23 Iwe ewe Samon a apasa ngeni pwin Jared we: Met ka mochen pwe ngang upwe fori pwe epwe tongeni wor ami saram non wami kewe mwota? Pun nengeni, ouse tongeni awora asammwacho, pun ina repwe mwokutiw non kukkunun kinikin; ouse pwan tongeni wei ekkei ngenikemi, pun ousap no me ren saramen ekkei.

24 Pun nengeni, oupwe usun chok emon raaw ne nukanapen ewe sat; pun ekkewe chukun nó repwe wutikemi. Nge inamo, upwe pwan uweikemita sefan seni anonnonen ewe sat; pun ekkewe asepwan ra fen tou seni non awei, me pwan ekkewe pungun ran me ekkewe konik ra puu ua fen tinaretiw.

25 Iwe nengeni, ua amonnakemita ngeni ekkewe mettoch; pun ouse tongeni saino won ei anonnonen matau tiwenon chok ngang upwe amonnatakemita ngeni ekkewe nónón ewe sat, me ekkewe asepwan minne ra fen no, me ekkewe konik ra puu minne repwe feito. Iei minne met ka mochen upwe amonnata ngenikemi pwe epwe tongeni wor ami saram nupwen oua kokono non anonnonen ewe sat?