1 Iwe iei ngang, Moronai, ua fen makketiw ekkewe kapas minne ua annuk upwe fori, anongonong won ai chechemeni; iwe ua fen urenikemi ekkewe mettoch minne ua fen eppungano; iei minne ousap attaper ren ami oupwe awewer; pun ena mettoch mi annuk senikemi, tiwenon chok atun och fansoun epwe mirit non Kot.

2 Iwe nengeni, oupwe tongeni tufich pwe oupwe mumuta ne pwari ekkewe seleich ngeni ir ekkewe repwe aninis ne forata ei angang;

3 Iwe repwe pwano ngeni unumon me ren ewe manamanen Kot; ina minne repwe sinei usun ennetin pwe ekkei mettoch mi ennet.

4 Iwe non awen unumon chon pwarata ekkei mettoch repwe foruno; iwe ewe kapasen pwarata an unumon, me ei angang, non minne epwe pwano me ren manamanen Kot me pwan an kapas, usun minne ewe Sam, me ewe Nau, me ewe Ngun mi Fel ra pwarata—iwe ekkei meinisin repwe fis pwe pisekin pwarata ngeni ewe fonufan atun ewe ranin soponon.

5 Iwe ika pwe repwe aier me feito ngeni ewe Sam non iten Jises, repwe ketiwenong non ewe muun Kot.

6 Iwe iei, ika ese wor ai pochokunen mumuta usun ekkei mettoch, ousap apungu; pun oupwe sinei pwe a wor ai pochokunen mumuta nupwen oupwe kunaei, iwe sipwe uta me mwen Kot atun ewe ranin soponon. Amen.