1 Iwe ewe Samon a annuku pwin Jared we pwe epwe feitiw seni ewe chuk seni fan mesen ewe Samon, me makkei ekkewe mettoch minne a fen kuna; iwe ir mi annuk seni ar repwe feito ngeni ekkewe noun aramas tori mwirin an epwe irapengesino won ewe irapenges; iwe ren ei popun king Mosaia a tumunur, pwe resap feito ngeni ewe fonufan tori mwirin an Kraist epwe pwisin pwarano inisin ngeni noun kewe aramas.

2 Iwe mwirin an Kraist a ennetin pwarano inisin ngeni noun kewe aramas a annuku pwe repwe pwano.

3 Iwe iei, mwirin ena, repwe kukkununo non ar nuku; iwe esap wor emon tiwenon chok ekkewe chon Leiman, iwe rese fen etiwa ewe kapas allimen Kraist; iei minne ua annuk pwe upwe opareno sefan non ewe puun.

4 Nengeni, ua fen makkei won ekkei seleich ekkewe fokkun mettoch minne pwin Jared we a kuna; iwe ese mwo wor akkom auchean mettoch ra pwano nap seni ekkewe minne ra pwano ngeni pwin Jared we.

5 Ina minne ewe Samon a fen annuku ngeniei pwe upwe makkeretiw; iwe ua fen makkeretiw. Iwe a annuku ngeniei pwe upwe eppungareno; me a pwan annuku ngeniei pwe upwe eppungano ekkewe pisekin awewer; ina minne ua fen eppungano ekkewe pisekin awewe, anongonong won ewe annuk an ewe Samon.

6 Pun ewe Samon a apasa ngeniei: Resap feino ngeni ekkewe chon Gentile tori ewe ran repwe aier seni ar angangangaw, me repwe nimenimoch me mwen ewe Samon.

7 Iwe non na ran pwe repwe aea nuku non ngang, anon ewe Samon, pwan mwo usun pwin Jared we a fori, pwe repwe enimenimochuno non ngang, iwe ngang upwe pwarano ngeni ir ekkewe mettoch minne pwin Jared we a kuna, pwan mwo tori ai upwe sukano ngeni ir ai kewe pwarata meinisin, anon Jises Kraist, ewe Noun Kot, ewe Semen ekkewe nang me ewe fonufan, me mettoch meinisin non ir.

8 Iwe i ewe epwe ungeni ewe kapasen ewe Samon, i epwe anumamau; iwe i ewe epwe amam ekkei mettoch, i epwe anumamau; pun ngeni ir ngang usap pwari auchean mettoch, anon Jises Kraist; pun ngang i ewe a kapas.

9 Iwe pokiten ai annuk ekkewe nang ra sukuno me ra appung; me pokiten ai kapas ewe fonufan epwe chechech; me pokiten ai annuk aramasan kewe repwe mano, pwan mwo ren ekkei.

10 Iwe i ewe ese nuku ai kewe kapas ese nuku nei kewe chon kuno; iwe ika pwe ngang use kapas, ousap apungu; pun oupwe sinei pwe ngang ewe a kapas, atun ewe ranin soponon.

11 Nge i ewe a nuku ekkei mettoch minne ua fen apasa, i ngang upwe churi ren pwanon Nguni we, iwe i epwe sinei me epwe pwarata. Pun pokiten Nguni we i epwe sinei pwe ekkei mettoch mi ennet; pun a pesei aramas pwe repwe fori mi öch.

12 Iwe met chok mettoch a pesei aramas pwe repwe fori mi öch a feito seniei; pun öch ese feito seni seni emon tiwenon chok seniei. Ngang ewe chok a emmweni aramas pwe repwe fori mi öch meinisin; i ewe esap nuku ai kewe kapas esap nukuei—pwe ngang mi fis; iwe i ewe esap nukuei esap nuku ewe Sam ewe a tinieito. Pun nengeni, ngang ewe Sam, ngang ewe Saram, me ewe manau, me ewe ennetin ewe fonufan.

13 Feito rei, O ami chon Gentile, iwe upwe pwari ngenikemi ekkewe auchean mettoch, ewe mirit minne a kopeno pokiten nukunukumang.

14 Feito rei, O ami imwen Israel, iwe epwe pwano ngenikemi ifa usun auchean mettoch ewe Sam a fen isonano fan itemi, seni nepoputan ewe fonufan; iwe esemo feito ngenikemi, pokiten nukunukumang.

15 Nengeni, nupwen oupwe kamweno ena pwonupwonun nukunukumang minne a efisi pwe oupwe nonnom non ami anoninenin nikinikin fofforungaw, me pochokunen netip, me achunnen ekiek, mwirin ekkewe auchean me amwararen mettoch minne ra fen kopeno seni nepoputan ewe fonufan senikemi—ewer, nupwen oupwe kokkori iten ewe Sam non itei, ren ew netip mi netipechou me netip niemam, iwe oupwe sinei pwe ewe Sam a fen chechemeni ewe pwon mi pin minne a fori ngeni sememi kewe, O imwen Israel.

16 Iwe mwirin ai kewe pwarata minne ua fen annuku pwe repwe makketiw me ren nei we chon angang John repwe sukuno me ne mesen ekkewe aramas meinisin. Chechemeni, nupwen oupwe kuna ekkei mettoch, oupwe sinei pwe ewe fansoun a arapeto pwe repwe pwano non ewe wesen foffor.

17 Iei minne, nupwen oupwe angei ei uruo oupwe sinei pwe we angangen ewe Sam a fen poputa me won unusen unungen ewe fonu.

18 Iei minne, oupwe aier ami meinisin ekis meinisin won ewe fonufan, me feito rei, me nuku non ai we kapas allim, me papataisino non itei; pun i ewe a nuku me a papataisino epwe manau; nge i ewe ese nuku epwe poutmwanino; iwe esisin repwe fitir ekkewe ra nuku non itei.

19 Iwe feioch i ewe a pwá pwe mi nikitu ngeni itei non ewe ranin soponon, pun i epwe seikita pwe epwe nonnom non ewe muu a monneta fan itan seni nepoputan ewe fonufan. Iwe nengeni pwe ngang ewe a kapas. Amen.