1 Ma sa oo ina alu atu le uso o Iareto, (o lenei o le aofai o vaa ia ua uma ona saunia e valu) i le mauga, lea sa latou ta’ua o le mauga o Selema, ona o lona maualuga tele, ma ia gaosi mai se papa ni maa laiti e sefulu ma le ono; ma sa papa’e ma manino ia maa, e pei lava o le tioata manino; ma sa ia ave ia maa i ona lima i luga i le tumutumu o le mauga, ma toe tagi atu i le Alii, ua fai atu:

2 Le Alii e, na e fetalai mai o le a siomia i matou i lologa. O lenei faauta, Le Alii e, ma aua e te toatamai mai i lau auauna ona o lona vaivai i ou luma; aua ua matou iloa ua paia oe ma ua e afio i le lagi, ma ua matou le agavaa i ou luma; ona o le pa’ū ua o’o ai ina leaga e le aunoa o matou natura; ae ui i lea, Le Alii e, ua e tuu mai ia te i matou se poloaiga e tatau ona matou valaau atu ia te oe, ona o oe matou te maua mai ai e tusa ma o matou manao.

3 Faauta, Le Alii e, na e taiaina i matou ona o lo matou amioletonu, ma ua e tutuli ese i matou, ma ua matou i ai i le vao mo nei tausaga e tele; ae ui i lea, ua e alofa mutimutivale mai pea ia te i matou. Le Alii e, silasila mai ia ia te a’u i le alofa, ma liliu ese lou toasa mai i o’u nei tagata, ma aua e te tuu i latou e folau atu i luga o lenei moana sousou i le pogisa; ae silasila mai i nei mea na ou gaosia mai le papa.

4 Ma ua ou iloa, Le Alii e, ua ia te oe le mana uma, ma e mafai ona e faia o soo se mea e te finagalo i ai mo le manuia o tagata; o lea, pa’i mai i nei maa, Le Alii e, i lou tamatamaiaao, ma saunia i latou ina ia susulu atu i le pogisa; ma o le a latou susulu mai ia te i matou i totonu o vaa ua matou saunia, ina ia matou maua le malamalama a’o matou folau atu i le sami.

5 Faauta, Le Alii e, e mafai ona e faia lenei mea. Ua matou iloa e mafai ona e faaali mai le mana tele, lea ua foliga faatauvaa i le malamalamaaga o tagata.

6 Ma sa oo ina ua uma ona fai atu e le uso o Iareto o nei upu, faauta, sa faaloloa mai e le Alii lona aao ma sa pa’i i maa taitasi i lona tamatamaiaao. Ma sa aveeseina le veli mai mata o le uso o Iareto, ma sa ia vaai i le tamatamaiaao o le Alii; ma sa pei o le tamatamailima o se tagata, e faapei o le aano ma le toto; ma sa pa’ū ifo le uso o Iareto i luma o le Alii, ona sa taia o ia i le mata’u.

7 Ma sa silasila mai le Alii ua pa’ū i le eleele le uso o Iareto; ma sa fetalai mai le Alii ia te ia: Tulai ia, aisea ua e pa’ū ai?

8 Ma sa ia fai atu i le Alii: Sa ou vaai i le tamatamaiaao o le Alii, ma sa ou fefe ne’i taia a’u e ia; ona sa ou le iloa ua i ai i le Alii le aano ma le toto.

9 Ma sa fetalai mai le Alii ia te ia: Ona o lou faatuatua ua e vaai ai o le a ou ave i luga ia te a’u se tino aano ma le toto; ma e le’i sau lava i o’u luma se tagata ma se faatuatua tele faapea e pei o oe; aua a na le faapea po ua le mafai ona e vaai i lo’u tamatamailima. Pe na e vaai ea i se mea e sili atu nai lo lenei?

10 Ma sa tali atu o ia: E leai; le Alii e, faaali mai ia oe lava ia te a’u.

11 Ma sa fetalai mai le Alii ia te ia: E te talitonu ea i upu o le a ou tautala atu ai?

12 Ma sa tali atu o ia: Ioe, le Alii e, ua ou iloa e te fetalai i le upumoni, ona o oe o se Atua o le upumoni, ma e le mafai ona pepelo.

13 Ma ina ua uma ona fai atu e ia o ia upu, faauta, sa faaali mai e le Alii o ia lava ia te ia, ma fetalai mai: Ona ua e iloa nei mea, ua togiolaina oe mai le pa’ū; o lea ua toe aumai ai oe i o’u luma; o lea ou te faaali atu ai a’u lava ia te oe.

14 Faauta, o a’u o le na saunia mai le faavaega o le lalolagi e togiola lo’u nuu. Faauta, o a’u o Iesu Keriso. O a’u o le Tamā ma le Atalii. O a’u e maua ai e tagata uma le ola, ma e faavavau, ia i latou lava o e e talitonu i lo’u igoa; ma o le a avea i latou ma o’u atalii ma o’u afafine.

15 Ma ou te le’i faaalia a’u lava i se tagata o sē na ou foafoaina, ona e leai se tagata sa talitonu mai ia te a’u e pei ona e talitonu mai. Pe ua e vaai ea ua foafoaina oe i lo’u lava faatusa? Ioe, e oo i tagata uma sa foafoaina i le amataga i lo’u lava faatusa.

16 Faauta, o lenei tino, lea ua e vaai mai nei i ai, o le tino lea o lo’u agaga; ma ua ou foafoaina le tagata e tusa ma le tino o lo’u agaga; ma e pei ona ou foliga atu ia te oe i la le agaga o le a faapea lava ona ou foliga atu i lo’u nuu i la le tino.

17 Ma o lenei, o a’u, o Moronae, e pei ona ou fai atu, ua le mafai ona ou faia se tala atoa o nei mea ua tusia, o lea ua lava ai ia te a’u ona ou fai atu sa faaali mai e Iesu o ia lava i lenei tagata i la le agaga, e tusa lava ma le faatusa ma foliga o le tino lava lea e tasi na ia faaali mai ai o ia lava i tagata sa Nifaē.

18 Ma sa ia auauna mai ia te ia e pei lava ona ia auauna mai i tagata sa Nifaē; na faia nei mea uma, ina ia iloa e lenei tagata o ia o le Atua, ona o le tele o galuega tetele na faaalia e le Alii ia te ia.

19 Ma ona o le malamalama o lenei tagata sa le mafai ai ona taofi o ia mai le vaai atu i totonu o le veli; ma sa vaai o ia i le tamatamaiaao o Iesu, lea, ina ua ia vaai i ai, na pa’ū ifo ai o ia ma le mata’u; aua sa ia iloa o le tamatamaiaao lea o le Alii; ma sa le toe ia te ia le faatuatua, ona ua ia mautinoa, ua le masalosalo i se mea.

20 O le mea lea, ona ua maua e ia lenei malamalama atoatoa o le Atua, sa le mafai ona taofia o ia mai totonu o le veli; o lea na ia vaai ai ia Iesu, ma sa auauna mai o ia ia te ia.

21 Ma sa oo ina fetalai mai le Alii i le uso o Iareto: Faauta, aua e te tuu nei mea na e vaaia ma faalogoina ia o atu i le lalolagi, seia oo i le taimi o le a ou faamamaluina ai lo’u igoa i la le tino; o le mea lea, ia e teu ai i mea na e vaaia ma faalogoina, ma ia le faaalia atu lava i se tagata.

22 Faauta foi, a oo ina e sau ia te a’u, ia e tusia nei mea ma faamaufaailogaina, ina ia leai se tasi e mafai ona faaliliuina; ona o le a e tusia nei mea i se gagana e le mafai ona latou faitauina.

23 Faauta foi, ou te tuu atu ia te oe maa nei e lua, ma ia e faamaufaailogaina foi faatasi ma mea o le a e tusia.

24 Aua faauta, o le gagana o le a e tusia ai ua ou faaeseina; o le mea lea o le a ou faia ai i lo’u lava taimi e talafeagai ai o le a faamanino e nei maa i le vaai a tagata nei mea o le a e tusia.

25 Ma ina ua uma ona fetalai mai e le Alii o nei upu, sa ia faaali mai i le uso o Iareto tagata uma o le lalolagi o e na i ai, ma i latou uma foi o le a i ai; ma sa ia le taofia i latou mai lana vaai, e oo lava i tuluiga o le lalolagi.

26 Ona sa ia fetalai mai ia te ia i taimi muamua, afai e talitonu o ia ia te ia e mafai e ia ona faaali mai ia te ia mea uma—o le a faaali mai ia te ia; ona lē mafai ai lea e le Alii ona taofi o se mea mai ia te ia, aua sa ia iloa e mafai e le Alii ona faaali mai o mea uma ia te ia.

27 Ma sa fetalai mai le Alii ia te ia: Ia tusi nei mea ma faamaufaailogaina; ma o le a ou faaali atu i latou i la’u lava taimi e tatau ai, i le fanauga a tagata.

28 Ma sa oo ina poloaiina o ia e le Alii ia faamaufaailogaina e ia maa e lua ia na ia maua mai, ma ia lē faaalia atu lava, seia oo ina faaali atu e le Alii i le fanauga a tagata.