1 Ac Leum El sapkihn nuh sin tamuhlwel lal Jared in fani nuh ten liki finohl uh liki ye muhtuhn Leum, ac suhmuhslah ma suc el tuh liye ah; ac ma inge tiac lwelah in tuhkuh nuh yurun tuhlihk nuhtin mwet ne ke na tukun El srihpsrihpyak fin sahksin; ac ke srihpac se inge tohkohsrah Mosiah el karuhnguhnwacng na ma inge, tuh ma inge in tiac tuhkuh nuh facluh ne ke na tukun Kraist El sifacna ahkkahlwemye nuh sin mwet Lal.

2 Ac tukun Kraist El ahkkahlwemyacl sifacna na pwacye nuh sin mwet Lal El sapkihn tuh ma inge in oreklac in ahkkahlwemyeyuck.

3 Ac inge, tohkoh, elos nuhkwewa muhnahslah ke suhlahlahlfongi; ac wacngihn kuhtwena mwet sahyacn na mwet Laman, ac elos forlah liki wosasuc luhn Kraist; ke ma inge sapkihnyuck nuh sihk tuh nga enenuh in sifilpac okanlah ma inge infohk uh.

4 Liye, nga sihm fin plwet inge ke ma suc tamuhlwel lal Jared el tuh liye ah; ac wacngihn ma yohk oreklac ahkkahlwemyeyuck yohk liki ma suc tuh ahkkahlwemyeyuck nuh sin tamuhlwel lal Jared.

5 Ohinge Leum El tuh sapkihn nuh sihk in suhmuhslah ma inge; ac nga tuh suhmuhslah. Ac El sapkihn nuh sihk tuh nga enenuh in siliyac ma inge; ac El oacyacpac sapkihn tuh nga enenuh in siliyac lweng kac uh; ohinge nga siliyac lweng nuh kac uh, in fal nuh ke masap luhn Leum.

6 Tuh Leum El fahk nuh sihk: Ma inge fah tiac som nuh yurun mwet Gentile ne ke na pacl se ma elos fah auliyak ke ma koluk lalos, ac eklac nwacsnwacs ye muhtuhn Leum.

7 Ac ke pacl se ma elos fah oruh luhlahlfongi Keik uh, Leum El fahk, finne oacna ke tamuhlwel lal Jared el tuh oruh, tuh elos in kuh in eklac nwacsnwacslah Keik, na Nga fah ahkkahlwemye nuh selos ma suc tamuhlwel lal Jared el tuh liye ah, finne nuh ke ikacslah nuh selos fwackyuck nuhkwewa Luhk, Jisus Kraist El fahk, Wen nuhtin God, Pahpah luhn inkuhsrao ac facluh, ac ma nuhkwewa ma oan loac.

8 Ac el suc fah akuhkuhin lain kahs luhn Leum, lwelah elan selngawiiyucki; ac el suc fah lahfwekihn ma inge, lwelah elan selngawiiyucki; tuh Nga fah tiac ahkkahlwemye ma yohk nuh selos, Jisus Kraist El fahk; tuh Nga pa El suc sramsram inge.

9 Ac ke sap Luhk inkuhsrao ikacklah ac kauli; ac ke kahs Luhk facluh fah kusrusr; ac ke sap Luhk mwet fin facluh fah misac, finne ke e.

10 Ac el suc tiac luhlahlfongi kahs Luhk tiac luhlahlfongi mwet tuhma lutlut Luhk; ac fin ohinge tuh Nga tiac sramsram, kowos nuhnuhnkuh; tuh kowos fah etuh tuh Nga pa sramsram uh, ke lwen sahflah.

11 Tuhsruhk tuh el suc luhlahlfongi ma inge ma Nga sramsramkihn, Nga fah fahsrwel in ahkkahlwemye ke Nguhn Luhk, ac el fah etuh ac fahkwack kac. Tuh ke srihpen Nguhn Luhk el fah etuh tuh ma inge pwacye; tuh ma inge ahkkweye mwet uh in oruh ma wo.

12 Ac oacna sie ma ma ahkkweye mwet uh in oruh ma wo uh ma Sihk me; tuh ma wo tiac tuhkuh sin kuhtwena mwet sahyuck. Nga pa mwet sepacna ma kol mwet uh nuh ke ma wo nuhkwewa; el suc fah tiac luhlahlfongi ke kahs Luhk fah tiac luhlahlfongiyuc—lah Nga; ac el suc fah tiac luhlahlfongiyuc ac fah tiac luhlahlfongi Pahpah suc suhpweyuc me. Tuh liye, Nga pa Pahpah, Nga pa kahlwem, ac moul, ac pwacye luhn facluh.

13 Tuhkuh nuh Yuruk, O kowos mwet Gentile, ac Nga fah ahkkahlwemye nuh suwos ma yohk, etwacack ma okanyucklac ke srihpen suhlahlahlfongi.

14 Tuhkuh nuh Yuruk, O kowos mwet Israel, ac ma inge fah ahkkahlwemyeyuck nuh suwos tuh fuhkah yohkiyacn ma Pahpah El sruhkwack nuh suwos, liki pwelucng luhn facluh; ac ma inge soenna tuhkuh nuh yuruwos ke srihpen suhlahlahlfongi.

15 Liye, ke kowos fah seyac mwe lihsrlihsr luhn suhlahlahlfongi ma oruh kowos in muhta na ke ohiyac koluk lowos, ac kwekwe luhn insiowos, ac lohsr luhn nuhnak, na fah ma yohk ac wolacna ma ukunyucklac liki kowos liki pwelucng luhn facluh—aok, ke kowos fah pahngon Pahpah ke Inek, ke sie inse muhsahl ac toasr in nguhn, na fah kowos etuh lah Pahpah El esam wuhlweacng ma El tuh oraclah nuh sin pahpah tomowos, O mwet Israel.

16 Ac na fah fwackyuck Luhk ma Nga tuh oruh tuh in sihmihsyucklac sin mwet kuhlwacnsap Luhk John in ikacklah nuh ke muhtuhn mwet nuhkwewa. Esam, ke kowos liye ma inge, kowos fah etuh lah pacl uh apkuhran me tuh ma inge ac fah ahkkahlwemyeyuck na pwacye.

17 Ke ma inge, ke kowos fah eis ma sihmlac se inge kowos kuh in etuh lah orekma luhn Pahpah muhtwacwacack fin acn uh nohfohn.

18 Ke ma inge, auliyak kowos mwet nuhkwewa fin facluh, ac tuhkuh nuh Yuruk, ac luhlahlfongi ke wosasuc Luhk, ac pacptaislac ke Inek; tuh el suc luhlahlfongi ac pacptaislac fah moliyucklac; tuhsruhk el suc tiac luhlahlfongi fah lihsyucklac; ac mwe akucl ac fah weluhlos suc luhlahlfongi ke Inek.

19 Ac insewowo el suc sukokyak oaru nuh ke Inek ke lwen sahflah, tuh el fah eisyuck in muhta ke tohkohsrahi ma ahkoeyucklac nuh sel liki pwelucng luhn facluh. Ac liye Nga pa fahk ma inge. Amen.