1 Ket ita siak, ni Moroni, naisuratkon dagiti balikas a naibilin kaniak, a maibatay iti lagipko; ket naibagakon kadakayo dagiti banag a sinaluadak; ngarud diyo ida sagsagiden tapno maipatarusyo; ta maipawil kadakayo dayta a banag, malaksid no nakemton ti Dios inton agangay.

2 Ket adtoy, nalabit a mapadayawankayonto a mangipakita kadagiti pinanid kadagidiay tumulongto a mangipatungpal iti daytoy nga aramid;

3 Ket maipakitanto kadagiti tallo babaen ti bileg ti Dios; gapuna ammodanto nga awan duadua a pudno dagitoy a banag.

4 Ket agtaudto iti ngiwat dagiti tallo a saksi dagitoy a banag; ket ti pammaneknek dagiti tallo, ken daytoy nga aramid, ti pakaipakitaanto ti bileg ti Dios ken kasta met ti aramidna, a nangipaneknekan ti Ama, ken ti Anak, ken ti Espiritu Santo—ket amin dagitoy tumakderdanto a pammaneknek a maibusor iti lubong iti maudi nga aldaw.

5 Ket no kastanto nga agbabawida ket umayda iti Ama iti nagan ni Jesus, maawatdanto iti pagarian ti Dios.

6 Ket ita, no awan ti turayko kadagitoy a banag, kednganyo; ta ammoyonto nga addaanak iti turay inton makitadak, ket dumatagtayonto iti Dios iti maudi nga aldaw. Amen.