1 Ket napasamak nga impatungpal ni Orihah ti pangngeddeng iti daga babaen ti kinalinteg iti amin nga aldawna, nga adu unay nga aldaw.

2 Ket naaddaan iti annak a lallaki ken babbai; wen, naaddaan iti tallo-pulo-ket-maysa, a dua-pulo-ket-tallo kadakuada ti lalaki.

3 Ket napasamak a naaddaan met iti anak a Kib idi lakayen. Ket napasamak a ni Kib ti nangsukat kenkuana a nagturay; ket anak ni Kib ni Corihor.

4 Ket idi agtawenen ni Corihor iti tallo-pulo-ket-dua sinukirna ti amana, ket napan nagnaed iti daga a Nehor; ket naaddaan iti annak a lallaki ken babbai, ket nagbalinda a nalaus ti pintasna; gapuna adu a tao ti naawis ni Corihor nga immasideg kenkuana.

5 Ket idi nakaurnongen iti buyot napan iti daga a Moron a pagnaedan ti ari, ket innalana a balud, a namasingked iti kinuna ti kabsat ni Jared a mabaluddanto.

6 Ita ti daga a Moron, a pagnaedan ti ari, asideg iti daga a ninaganan dagiti Nephite iti Desolation.

7 Ket napasamak a nagtalinaed a balud ni Kib, ken dagiti taona babaen ni Corihor nga anakna, agingga a nalabesen ti kinalakayna; nupay kasta naaddaan ni Kib iti anak a ni Shule idi lakayen, idi adda pay la iti pagbaludan.

8 Ket napasamak a nakapungtot ni Shule iti kabsatna; ket nagbalin a napigsa ni Shule, ken nagbalin a maingel a kas iti kapigsa ti lalaki; ken kasta met a maingel iti panangeddeng.

9 Gapuna, immay iti turod nga Efraim, ket nagtunaw iti turod, ken nagaramid iti espada manipud iti landok a para kadagiti napaasidegna kenkuana; ket kalpasan ti panangarmasna kadakuada iti espada nagsubli iti siudad ti Nehor, ket kinadangadangna ti kabsatna a ni Corihor, nga iti dayta a panglakagan nagun-odna ti pagarian ken naisublina iti amana a ni Kib.

10 Ket ita gapu iti banag nga inaramid ni Shule, inyawat ti amana kenkuana ti pagarian; ngarud inrugina ti nangituray a sukat ti amana.

11 Ket napasamak nga impatungpalna a pangngeddeng babaen ti kinalinteg; ket pinagsaknapna ti pagarianna iti amin a rabaw ti daga, ta immadu dagiti tao a kasta unay.

12 Ket napasamak a naaddaan met ni Shule iti adu nga annak a lallaki ken babbai.

13 Ket nagbabawi ni Corihor iti adu a dakes nga inaramidna; gapuna inikkan ni Shule iti bileg iti pagarianna.

14 Ket napasamak nga adu ti lallaki ken babbai nga annak ni Corihor. Ket kadagiti annak ni Corihor adda maysa nga agnagan iti Noe.

15 Ket napasamak a nagsukir ni Noe ken ni Shule, ti ari, ken kasta met iti amana a ni Corihor, ket inyadayona ti kabsatna a ni Cohor, ken kasta met amin dagiti kabsatna ken adu kadagiti tao.

16 Ket kinadangadangna ni Shule, ti ari, a nakagun-odanna iti daga nga umuna a tawidda; ket nagbalin nga ari iti dayta a paset ti daga.

17 Ket napasamak a kinadangadangna manen ni Shule, ti ari; ket innalana ni Shule, ti ari, ket innalana a balud iti Moron.

18 Ket napasamak idi papatayenna koman, nagarudok dagiti lallaki nga annak ni Shule iti balay ni Noe iti rabii ket pinapatayda, ken dinadaelda ti ridaw ti pagbaludan ket inruarda ti amada, ket impanda iti tronona iti pagarianna.

19 Gapuna, nangbangon ti lalaki nga anak ni Noe iti pagarian iti naganna; nupay kasta saandan a nagun-od pay ti bileg manipud ken ni Shule nga ari, ket rimmang-ay a kasta unay ken pimmigsa dagiti tao nga adda iti babaen ti panagturay ni Shule nga ari.

20 Ket nabingay ti pagilian; ket adda dua a pagarian, ti pagarian ni Shule, ken ti pagarian ni Cohor, ti lalaki nga anak ni Noe.

21 Ket ni Cohor, ti lalaki nga anak ni Noe, imbilinna a makidangadang dagiti taona kada Shule, a nangabakan kadakuada da Shule ken nangpapatayanda ken ni Cohor.

22 Ket ita adda lalaki nga anak ni Cohor a nanaganan iti Nimrod; ket insuko ni Nimrod ti pagarian ni Cohor ken ni Shule, ket nakagun-od iti panagraem iti imatang ni Shule; gapuna inted kenkuana ni Shule ti dakkel a tulong, ket inaramidna iti pagarian ni Shule a maibatay iti pagayatanna.

23 Ken kasta met nga iti panagturay ni Shule immay kadagiti tao dagiti propeta, nga imbaon ti Apo, a mangipadpadto a mangyeg iti lunod iti daga ti kinadangkes ken panagrukbabda iti didiosen, ket masapul a madadaelda no dida agbabawi.

24 Ket napasamak a sinusik dagiti tao dagiti propeta, ken linaisda ida. Ket napasamak nga impatungpal ni ari Shule ti pangngeddeng a maibusor kadagiti amin a nangsusik kadagiti propeta.

25 Ket impatungpalna ti paglintegan iti amin a daga, a nangted iti bileg kadagiti propeta a masapul a mapanda iti sadino man a kayatda; ket babaen daytoy nagbabawi dagiti tao.

26 Ket gapu ta nagbabawi dagiti tao iti kinamanagbasolda ken panagrukbabda kadagiti didiosen pinakawan ida ti Apo, ket nangrugi manen a rimmang-ayda iti daga. Ket napasamak a naaddaan ni Shule iti annak a lallaki ken babbai idi lakayen.

27 Ket awanen ti gubgubat kadagiti aldaw ni Shule; ket nalagipna dagiti naindaklan a banag nga inaramid ti Apo kadagiti ammana iti panangitundana kadakuada iti naikari a daga babaen ti ibaballasiwda iti nalawa a taaw; gapuna impatungpalna ti pangngeddeng babaen ti kinalinteg iti amin nga aldawna.