1 Ao e a koro bukina bwa Oria e bon waakina te motikitaeka i aon te aba ma te raoiroi ni kabanea ana bong, ao a bon mwaiti kurikuri ana bong ni maiu.

2 Ao e karikiia natina aine ao mwaane; eng, e karikiia teningaun ma temanna, ao bon uangaun ma teniman natina mwaane mai i buakoia.

3 Ao e a koro bukina bwa e karika naba Kiibe i nanon ana tai ni kara. Ao e a koro bukina bwa Kiibe e onea mwiina n uea; ao Kiibe e karika Korioa.

4 Ao ngke ai tenibwi ma uoua ana ririki, e a kaitara tamana, ma n nako ni maeka n te aba are Neooa; ao e karikiia natina aine ao mwaane, ao a bon tikaua man rianako tamaroaia; mangaia are Korioa e a kairiia nako aomata aika a mwaiti ma ngaia.

5 Ao ngke e a tia n ikota te tanga ni buaka e roko nakon te aba are Moron are e maeka iai te uea, ma n taua bwa ana bure, are ngaia are e kakoroa bukin ana taeka tarin Iareta are a na uotaki nakon te tautoronaki.

6 Ngkai te aba are Moron, are e maeka iai te uea, e mena n te aba are arana Kamaroa irouia Nibwaite.

7 Ao e a koro bukina bwa Kiibe e maeka ma ana botanaomata n te tautoronaki i aan Korioa are natina te mwaane, ni karokoa e a rangi ni kara tingotingo; ma e ngae n anne ao Kiibe e karika Tuure i nanon ana tai ni kara, i nanon ana tai n tautoronaki.

8 Ao e a koro bukina bwa Tuure e bon un iroun tarina; ao e rikirake n aintoa, ao e korakora n aron korakoran te aomata; ao e bon korakora naba n te motikitaeka.

9 Ngaia are, e roko nakon te tabuki are Eberaim, ao e bon kabuei ma ni karaoi kabaang man te biti ibukiia ake e a tia ni kairiia nako; ao ngke e a tia n anganiia aia kabaang e okirikaki nakon te kaawa are Neooa, ma ni buaka ma tarina are Korioa, are bon te kawai are e a manga anaa te abanuea ao e kaokia nakon tamana are Kiibe.

10 Ao ngkai ibukin te bwai are e karaoia Tuure ao tamana e katokaa i aona te abanuea; ngaia are e a waaki n uea n onean mwiin tamana.

11 Ao e a koro bukina bwa e bon karaoa te motikitaeka i nanon te raoiroi; ao e bon kabuta abanueana n te aba ni kabane, bwa e a bon rianako mwaitia aomata.

12 Ao e a koro bukina bwa Tuure e bon karikiia naba natina mwaane ao aine aika mwaiti.

13 Ao Korioa e bon rairananona ma ni bwaai aika a mwaiti ake e a tia ni karaoi aika a bubuaka, ngaia are Tuure e bon anganna te mwaaka i aon abanueana.

14 Ao e a koro bukina bwa a mwaiti natin Korioa mwaane ao aine. Ao i buakon natina mwaane ao bon iai temanna ae arana Noa.

15 Ao e a koro bukina bwa Noa e kaitara Tuure, are te uea, ao tamana naba are Korioa ao e kaira nako tarina are Kooa, ao tarina naba ni kabane ao aomata aika a mwaiti.

16 Ao e buakana Tuure, are te uea, are e a bon karekea iai moan abaia ni bwaibwai; ao e riki bwa te uea i aon mwakoron te aba anne.

17 Ao e a koro bukina bwa e a manga buakana riki Tuure, are te uea; ao e kairanako Tuure are te uea, ma ni kairianako nakon te tautoronaki nakon Moron.

18 Ao e a koro bukina bwa ngke e nang tiringnga, a roko natin Tuure n te bong nakon mwengan Noa ao a tiringnga, ma n urua mataroan te nne ni kaikain ma ni kaotinakoa tamaia, ma ni katoka i aon ana kaintoka n uea n oin abanueana.

19 Ngaia are, natin Noa te mwaane e bon katea ueana n onea mwiina; ma e ngae n anne a bon aki karekea te mwaaka i aon Tuure are te uea, ao aomata ake i aan ana tautaeka Tuure are te uea a bon rikirake aroia ao a rikirake korakoraia.

20 Ao e a maenako te aba; ao bon iai uoua abanuea, bwa abanuean Tuure, ao abanuean Kooa, are natin Noa.

21 Ao Kooa, are natin Noa, e karekea te kawai bwa a na buaka ana aomata ma Tuure, are a konaki iai iroun Tuure ao a tiringa Kooa.

22 Ao ngkai Kooa bon iai natina te mwaane are arana bon Nimrota; ao Nimrota e anganako te abanuea are Kooa nakon Tuure, ao e bon tatangiraki iroun Tuure; ngaia are Tuure e bon anganna bwaai aika e tangiri aika a mwaiti, ao e bon karaoi bwaai n te abanuea are Tuure n aron are e tangiria.

23 Ao i nanon naba ana tai n uea Tuure ao a roko burabeti aika a mwaiti i buakoia aomata, ake a kanakoaki mai iroun te uea, ake a tataetae ni burabeti bwa buakakaia aomata ma aia waaki n taromauria bouananti e a uota te maraia nako aon te aba, ao a na bane ni kamaunaki ngkana aki rairinanoia.

24 Ao e a koro bukina bwa aomata a bon kabuakakaia burabeti, ma ni bwainingareia. Ao e a koro bukina bwa te uea are Tuure e bon karaoa te motikitaeka ni kaitaraia aomata ake a kabuakaka ni kaitaraia burabeti.

25 Ao e bon anga te tua ni kabuta te aba, are a kariaiakaki burabeti n nako n te tabo are a kan nako iai; ao n te aro aio are a kairaki aomata nakon te rairannano.

26 Ao ibukina bwa aomata a rairinanoia man aia bure ma aia waaki n taromauria bouananti te uea e bon kamaiuia, ao a waaki n rikirake aroia n te aba. Ao e a koro bukina bwa Tuure e karikiia natina mwaane ma aine i nanon ana tai ni kara.

27 Ao bon akea riki te bubuaka i nanon ana bong Tuure; ao e uring bwaai ake a korakora are e a tia ni karaoi te Uea ibukiia ana bakatibu ni karaoi rinanon te marawa ae korakora nakon te aba ni berita; mangaia are e karaoa te motikitaeka i nanon te raoiroi ni kabanea ana bong.