1 Iwe non ewe fansoun pwe Oria a fori kapung won ewe fonu non wenechar non unusen ranin kewe, ranin kewe ra fokkun chommong.

2 Iwe a nouni ekkoch anuon me fopun; ewer, a nouni inik me emon, me neir mi wor rue me unumon anuon.

3 Iwe non ewe fansoun pwe a pwan nouni Kip non an ierin chinnap. Iwe non ewe fansoun pwe Kip a nemenem non nenian we; iwe Kib a nouni Korior.

4 Iwe nupwen Korior a inik me ru ierin a ungeni seman we, me feino me nonnom non ewe fonuen Nior; iwe a nouni ekkoch anuon me fopun, iwe ra fokkun mesoch; ina minne Korior a emmwenano chommong aramas pwe repwe tapweno mwirin.

5 Iwe nupwen a ionfengeni ew mwichen sounfiu a feita ngeni ewe fonuen Moron ikewe ewe king a nonnom ie, me a uwei i ngeni fotek, minne a efisi ewe osini epwe pwonueta an pwin Jared we pwe repwe emmwen ngeni non fotek.

6 Iei ewe fonuen Moron, ikewe ewe king a nonnom ie, a arap ngeni ewe fonu minne a iteni Tatakis me ren ekkewe chon Nifai.

7 Iwe non ewe fansoun pwe Kip a nonnom non fotek, me noun kewe aramas ra nom fan nemenien Korior noun we anuon, tori an a fokkun chinnapeno; nge inamo Kip a nouni Sul non an ierin chinnap, nupwen an mi chok nom non fotek.

8 Iwe non ewe fansoun pwe Sul a song ren pwin we; iwe Sul a pochokununo, me a fokkun pochokun napanap anongonong won pochokunen emon mwan; me a pwan pochokun napanap non kapung.

9 Ina minne, a feito ngeni ewe chukuchukuta Ephraim, iwe a etenau seni ewe chukuchukuta, me for ketinas seni mecha pwe noun ekkewe ir a emmwenareno pwe repwe tapweno mwirin; iwe mwirin an a episekareno ren ketinas a niwin ngeni ewe teninimw Nior, me maun ngeni pwin we Korior, ren minne popun i a angei ewe muu me eniwini ngeni seman we Kip.

10 Iwe iei pokiten ewe mettoch minne Sul a fori, seman we a wata won i ewe muu; iei minne a poputa ne nemenem non nenian seman we.

11 Iwe non ewe fansoun pwe a fori kapung non wenechar; iwe a awatteno muun we won unusen unungen ewe fonu, pun ekkewe aramas ra fokkun chommongono.

12 Iwe non ewe fansoun pwe Sul a pwan nouni chommong anuon me fopun.

13 Iwe Korior a aier seni ekkewe chommong ngaw minne a fen fori; ina minne Sul a ngeni i pochokun non muun we.

14 Iwe non ewe fansoun pwe a wor chommong noun Korior anuon me fopun. Iwe me nein ekkewe anuon noun Korior mi wor emon itan Noah.

15 Iwe non ewe fansoun pwe Noah a ungeni Sul, ewe king, me pwan seman we Korior, me emmwenano Kohor pwin we, me pwan pwin kewe meinisin me chommong me nein ekkewe aramas.

16 Iwe a maun ngeni Sul, ewe king, non minne a angei ewe fonuen ar aewin neuo; iwe a winiti emon king won ena kinikinin ewe fonu.

17 Iwe non ewe fansoun pwe a maun sefan ngeni Sul, ewe king, iwe a angei Sul, ewe king, me uweiano i non fotek non Moron.

18 Iwe non ewe fansoun pwe nupwen ita epwene nieno i, ekkewe anuon noun Sul ra ennifenong non imwen Noah we fansoun nepwin me nieno i, me atatiw asamen ewe imwen kanapus me uweiau semer we, me wata i won ewe nenien mwottun king non muun we pwisin.

19 Ina minne, ewe anuon noun Noah a aueta muun we non nenian we; nge inamo rese chiwen angei nemenem sefan won Sul ewe king, iwe ekkewe aramas ir mi nom fan nemenien Sul ewe king ra fokkun feiochuno me pisekisekino.

20 Iwe ewe fonu a keimufesen; iwe a wor ru muu, ewe muun Sul, me ewe muun Kohor, ewe noun Noah.

21 Iwe Kohor, ewe noun Noah, a annuku pwe noun kewe aramas repwe maun ngeni Sul, non minne Sul a akkufur me nieno Kohor.

22 Iwe iei a wor noun Kohor emon anuon ewe a iteni Nimrod; iwe Nimrod a fangeta ewe muun Kohor ngeni Sul, me a ketiw me ne mesen Sul; ina minne Sul a wata chommong chen won, iwe a foffor non ewe muun Sul anongonong won an mochen.

23 Iwe pwan non muun Sul we mi wor soufos ra feito nein ekkewe aramas, ekkewe ra titito me ren ewe Samon, ra osini pwe fofforungawen me ewe fen ngeni niosun anu muan an ekkewe aramas a wato ew anumamau won ewe fonu, iwe repwe ninnino ika rese aier.

24 Iwe non ewe fansoun pwe ekkewe aramas ra kapas mi ngaw ngeni ekkewe soufos, me ra turunufaser. Iwe non ewe fansoun pwe king Sul a fori kapung ngeni ekkewe ir meinisin ra kapas mi ngaw ngeni ekkewe soufos.

25 Iwe a fori ew annuk non unusen ewe fonu, minne a awora pochokun ngeni ekkewe soufos pwe repwe feino ngeni ian chok ra mochen; iwe ren ei popun ekkewe aramas ra emmwen ngeni aier.

26 Iwe pokiten ekkewe aramas ra aier seni ar angangangaw me ar fen ngeni niosun anu muan ewe Samon a amanauer, iwe ra poputa ne feiochuno sefan me non ewe fonu. Iwe non ewe fansoun pwe Sul a nouni ekkoch anuon me fopun non an ierin chinnap.

27 Iwe ese chiwen wor maun non ekkewe ranin Sul; iwe a chechemeni ekkewe auchean mettoch minne ewe Samon a fen fori ngeni seman kewe non an uweireto won epekin ekkewe anonnonen matau ngeni ewe fonuen pwon; ina minne a fori kapung non wenechar non unusen ranin kewe.