1 Ka sa yaco ni sa sucu ko Oma na luve i Sule. A sa veiliutaki ko Oma me sosomitaki koya. A sa sucu ko Jereti na luve i Oma; ka sa vakaluveya tagane kei na yalewa ko Jereti.

2 A sa vorati tamana ko Jereti, a sa lako ka laki tiko ena vanua ko Eci. Ka sa yaco ni a cavilaki ira e vuqa na tamata ena nona vosa qaseqase me yacova ni sa rawa na veimama ni matanitu.

3 Ia ni sa rawa na veimama ni matanitu a sa lako ka valuti tamana, ka kauti tamana vakavesu, ka vakayacora me cakacaka ena nona tiko vakavesu;

4 A sa tiko vakavesu ko Oma ena veimama ni gauna ni nona lewa. A sa yaco me sucu eso tale na luvena tagane kei na luvena yalewa, ia e rua vei ira, ko Esiromi kei Korianatuma;

5 Ka rau sa rarawa sara vakalevu ena vuku ni veika e vakayacora na tuakadrau ko Jereti, ka rau sa soqona kina e dua na mataivalu ka valuti Jereti. Ka sa yaco ni rau a valuti koya ena bogi.

6 Ka sa yaco ni rau sa vakamatei ira oti na mataivalu i Jereti, ka sa vakarau me rau vakamatei Jereti tale ga; sa vakamasuti rau ko koya me rau kakua ni vakamatei koya, ka na qai solia lesu ko koya na matanitu vei tamana. Ka sa yaco ni rau sa vakabulai koya.

7 A sa rarawa vakalevu sara ko Jereti ni sa yali mai vua na matanitu, ni sa rui domona ko koya na itutu vakatui kei na lagilagi ni vuravura.

8 Raica sa vuku ka matai sara na luve i Jereti yalewa, ni sa raica na rarawa i tamana, sa lomana me bulia e dua na ilawaki me vakalesuya kina na matanitu vei tamana.

9 Raica sa gone yalewa mata vinaka sara na luve i Jereti. Ka sa yaco ni sa vosa vei tamana, ka kaya vua: A cava sa rui rarawa kina vakalevu na tamaqu? Sa sega beka ni wilika ko koya na itukutuku era a kauta mai na noda qase ka ra a kosova mai na wasaliwa titobu? Raica, sa sega beka ni volai tu e dua na itukutuku me baleti ira e liu, ni ra a rawata na lewa ni matanitu kei na lagilagi cecekia ena nodra inakinaki vuni?

10 Ia oqo, me talatala mada ko tamaqu me lako mada mai ko Akisi na luvei Kiminora; ka raica au sa mata vinaka, ka’u na meke e matana ka vakamarautaki koya, ka na vinakata me’u watina; ia kevaka ena gadreva vei iko mo soli au vua me’u watina, mo na qai kaya vakaoqo: Au na soli koya, kevaka ko kauta mai vei au na ulu i tamaqu, na tui.

11 Raica sa itau vinaka sara i Akisi ko Oma; a sa talatala yani ko Jereti me lako mai ko Akisi; a sa meke e matana na luvei Jereti, raica sa domoni koya sara ko Akisi ka vinakati koya me watina. Ka sa yaco ni sa kaya vei Jereti: Mo soli koya mada vei au me watiqu.

12 Ka sa kaya vua ko Jereti: Au na soli koya vei iko, kevaka ko kauta mai vei au na ului tamaqu, na tui.

13 Ka sa yaco ni sa vakasoqoni ira vata mai na wekana ko Akisi ena vale i Jereti ka kaya vei ira: Dou na bubuluitaka li vei au ni dou na yalodina vei au ena ka au na gadreva vei kemudou?

14 Ka sa yaco ni ra sa bubului vua ena yaca ni Kalou ni lomalagi, a ra sa bubului tale ga ki lomalagi, ki vuravura tale ga, ka ra bubului ki uludra, ni na vakayalia na uluna ko koya sa sega ni vakayacora na ka sa vinakata ko Akisi; ka na vakayalia tale ga na nona bula ko koya ena tukuna na veika sa tukuna vei ira ko Akisi.

15 Ka sa yaco ni ra sa duavata kece kei Akisi. A ra sa bubului kece vei Akisi ena kena ivakarau era a daukitaka ko ira e liu me ra kovea kina na itutu, ia oqo na ivakarau ni bubului sa vakadewataki sobu tiko mai, me tekivu sara mai vei Keni na daulaba mai na ivakatekivu.

16 Ka ra a sa vakabulai tiko mai ena kaukauwa ni tevoro, me vakatavuvulitaki tiko ga kina na veibubului oqo vei ira na tamata, me ra tiko ga kina ena butobuto, me vukei ira era sa vakasaqara na kaukauwa me ra rawata na kaukauwa, ka me ra laba, ka vakacaca, ka lasu, ka vakayacora na veibutakoci kei na veimataqali caka ca kecega.

17 Na luvei Jereti yalewa ga sa biuta ki yalona me vakasaqara na veika oqo mai na gauna makawa; sa qai biuta ko Jereti ki na yalo i Akisi; a sa vakaraitaka sara ko Akisi vei ira na wekana kei ira na nona itokani, a sa yalataka vei ira e vuqa na ka me temaki ira kina me ra vakayacora na veika cava ga e gadreva.

18 Ka sa yaco ni ra sa vakaduria e dua na isoqosoqo vuni, me vakataki ira ena gauna e liu; ka sa isoqosoqo vakasisila ka ca duadua ena mata ni Kalou mai na veisoqosoqo kecega;

19 Ni sa sega ni dau cakacaka ena isoqosoqo vuni na Turaga, ka sa sega tale ga ni vinakata me ra vakadave dra ko ira na tamata, ia sa vakatabuya sara ena ka kecega, mai na ivakatekivu ni tamata.

20 Ia oqo, ko i au ko Moronai, au sa sega ni vola eke na ivakarau ni nodra bubului kei na itovo ni nodra isoqosoqo, ni sa vakatakilai vei au ni sa tu ena kedra maliwa na tamata kecega, ka ra sa tu tale ga ena kedra maliwa na Leimanaiti.

21 Ka ra sa vakavuna na nodra vakarusai na tamata ka’u tukuni ira tiko oqo, ka sa vakavuna tale ga na nodra vakarusai na tamata i Nifai.

22 Ia na matanitu cava ga sa tokona na veisoqosoqo vuni vakaoqo, me ra rawata kina na kaukauwa ka rawa ka kina, me yacova ni ra sa robota na vanua taucoko, raica, era na vakarusai; ni na sega ni vakatara na Turaga me tagici koya tiko mai na qele na nodra dra na nona yalododonu era a vakadavea, me na sausaumi, ia me qai sega ni sauma lesu ko koya.

23 O koya, oi kemudou na Matanitu Tani, sa lewa yalomatua ni Kalou me vakaraitaki vei kemudou na veika oqo, de na rawa mo dou veivutunitaka kina na nomudou ivalavala ca, ka mo dou kakua sara ni laiva me ra rawai kemudou na veisoqosoqo daulaba oqo, ka ra tara cake me ra rawata kina na kaukauwa kei na rawa iyau—mo dou kakua ni vakatara me yacovi kemudou mai na cakacaka, io, na cakacaka ni veivakarusai, io, ena lutuki kemudou na iseleiwau ni nona lewa dodonu na Kalou Tawamudu, ka dou na rawai kina ka vakarusai kevaka dou sa vakalaiva me ra tu ga na veika oqo.

24 O koya sa vakaroti kemudou kina na Turaga, ni dou sa raica ni sa yaco vei kemudou na veika oqo dou na qai kila kina na ituvaki ca dou sa tu kina, ena vuku ni isoqosoqo vuni oqo ka sa na tu ena kemudou maliwa; ia ena ca na isoqosoqo vuni ena vuku ni nodra dra era sa yaviti; ni ra sa tagi mai na kuvu-ni-soso me saumi lesu vua kei ira tale ga era sa tara cake.

25 Ka na yaco ni ko koya yadua sa tara cake na isoqosoqo vakaoqo sa segata me vakacacana na bula galala ni veimatanitu kei na veivanua kecega; ka na yaco kina na nodra vakarusai na tamata kecega, ni sa tara cake na isoqosoqo oqo na tevoro, o koya na tama ni lasu kecega; na daulasu vata ga ka a vakacalai rau na noda itubutubu taumada, io, na daulasu vata ga ka a vakavuna me ra laba na tamata mai na ivakatekivu; ka a vakaukauwataka na lomadra na tamata ka ra a labati ira kina na parofita, ka vakaviriki ira ena vatu ka vakasavi ira tani mai na ivakatekivu.

26 O koya au sa vakaroti kina, ko i au ko Moronai, me’u vola na veika oqo me muduki kina na ca, ka me na yaco rawa kina na gauna me na sega kina na kaukauwa i Setani me rawa na yalodra na luve ni tamata, ia me ra na vakauqeti me ra kitaka tiko ga na veika vinaka, ka lako vua na ivurevure ni ivalavala dodonu kecega me ra vakabulai kina.