Jun ti Nicʼonic richin
Ri Vuj richin ri Mormon

Pa ri nabey ruxak ri Vuj richin ri Mormon nubij chi e cʼo oxiʼ ruvech xaxilej tak chʼichʼ. Riʼ e jareʼ:

1. Ri Xaxilej tak Chʼichʼ richin ri Nefi. Ri Vuj richin ri Mormon nukʼalajirisaj chi e cʼo caʼiʼ ruvech re chʼichʼ reʼ: ri Nim Xaxilej tak Chʼichʼ y ri Coʼol Xaxilej tak Chʼichʼ. Chuvech ri Nim Xaxilej tak Chʼichʼ tzʼibatajinek can ri xquibanalaʼ ri vinakiʼ chuvech re ruvachʼulef. Chuvech ri Coʼol Xaxilej tak Chʼichʼ e tzʼibatajinek can ri lokʼolej tak banobel chiquicojol ri vinek.

2. Ri Xaxilej tak Chʼichʼ richin ri Mormon. Jareʼ xebanatej roma ri Mormon. Re chʼichʼ reʼ quicʼuan ri tzʼibanic ri cʼamatajinek cʼa pe chupan ri Xaxilej tak Chʼichʼ richin ri Nefi. Quicʼuan chukaʼ qʼuiy ruchʼabel ri Mormon. Ri Mormon xutzʼibaj chukaʼ achique ri xcʼulvachitej chiquicojol ri vinek chupan ri rucʼaslen rijaʼ. E tzʼiban can chukaʼ chuvech re chʼichʼ reʼ jun caʼiʼ oxiʼ ri ruchʼabel ri Moroni. Ja rijaʼ ri rucʼajol ri Mormon.

3. Ri Xaxilej tak Chʼichʼ richin ri Eter. Jareʼ niquitzijoj ri xquibanalaʼ ri Jarediʼ. Ri tzijonic riʼ xenucʼutej pe roma ri Moroni. Chukaʼ xutzʼibaj jun caʼiʼ oxiʼ ri richʼabel rijaʼ chupan ri tzijonic riʼ. Cʼa cʼariʼ, rijaʼ xuyaʼ rubiʼ ri tzijonic riʼ ri Vuj richin ri Eter y xuyaʼ pe chupan ri Vuj richin ri Mormon.

   E cʼo chʼakaʼ chic xaxilej tak chʼichʼ chukaʼ. Qʼuiy mul ri Vuj richin ri Mormon nichʼo chiquij ri xaxilej tak chʼichʼ riʼ ri quibiniʼan:

4. Ri Xaxilej tak Cʼakoʼj Chʼichʼ richin ri Laban. Ri chʼichʼ riʼ xecʼamatej pe cʼa pa Jerusalem coma ri ruvinak ri Leʼi. Ri Lokʼolej Tzʼibanic quichin ri e aj Judaʼ y ri retal quibiʼ quijaʼtzul e cʼo chuvech ri chiʼichʼ riʼ. Jubaʼ chire ri tzʼibanic riʼ cʼo vacami chupan ri vuj ri xquitzʼibaj ri Nefʼiʼ.

Chupan ri Vuj richin ri Mormon e cʼo volajuj tak ramaj ri nibix vuj chique. Xaxe cʼo jun ramaj ri man nibix ta vuj chire. Chiquijujunal ri tak vuj riʼ quicʼuan ri quibiʼ ri achiʼaʼ ri xetzʼiban quichin. Ri nabey vakiʼ vuj quibiniʼan Ri Nabey Vuj richin ri Nefi, Ri Rucaʼn Vuj richin ri Nefi, Ri Vuj richin ri Jacob, Ri Vuj richin ri Enos, Ri Vuj richin ri Jarom, y Ri Vuj richin ri Omni. Re vakiʼ vuj reʼ e kʼaxan pe cʼa chupan ri Coʼol Xaxilej tak Chʼichʼ richin ri Nefi. Chucojol ri Vuj richin ri Omni y ri Vuj richin ri Mosia, nikil vi Ri Ruchʼabel ri Mormon. Ri Ruchʼabel ri Mormon nusol quij ri vuj ri yenabeyisaj chuvech. Nubij jubaʼ chukaʼ pa quiviʼ ri chʼakaʼ chich vuj ri e cʼo chupan ri Vuj richin ri Mormon. Ri Ruchʼabel ri Mormon nutun ri rutzijonic ri Nefi riqʼuin ri rutzijonic ri Mormon. Ri tzijonic riʼ richin ri Nefi xetzʼibatej can chuvech ri Coʼol Xaxilej tak Chʼichʼ. Ri tzijonic riʼ richin ri Mormon, jariʼ ri xuqʼuen pe rijaʼ chupan ri Nim Xaxilej tak Chʼichʼ.

Ri tzʼibanic ri xuqʼuen pe ri Mormon chupan ri Nim Xaxilej tak Chʼichʼ richin ri Nefi nitiquir el reqʼuin ri Vuj richin ri Mosia, cʼa pa ruvuk tanaj richin ri Vuj richin ri Mormon. Ri tanaj vakxakiʼ richin ri Mormon, cʼa pa ruqʼuisibel richin ri Vuj richin ri Mormon, jariʼ xtzʼibatej roma ri Moroni. Ja rijaʼ ri rucʼajol ri Mormon. Nabey cʼa xuqʼuis rutzʼibaxic ri rucʼaslen ri rutataʼ, cʼariʼ, xutzʼibaj jubaʼ ri cʼo chuvech ri retal banobel quichin ri Jarediʼ, y xuyaʼ rubiʼ, ri Vuj richin ri Eter. Cʼa cʼariʼ, xutzʼibaj ri vuj ri rubiniʼan vacami ri Vuj richin ri Moroni.

Ri Vuj richin ri Mormon nichap el rutzijoxic 600 junaʼ tok manjani talex pe ri Jesucristo, cʼa pa ri junaʼ 421 chirij ri ralaxbal rijaʼ. Pa laʼek ri ruqʼuisibel junaʼ riʼ, ri Moroni, ri ruqʼuisibel tzʼibanel, xutzʼapij can ri lokʼolej retal banobel. Cʼariʼ, xrevaj can riqʼuin ri Ajaf, richin queriʼ xtel cʼa pe chupan ri ruqʼuisibel tak kʼij, achiʼel xutzijoj can ojer ri Dios coma ri ruyaʼol lokʼolej rutzijol. Chupan ri junaʼ 1827, can ja ri Moroni riʼ, vacami cʼastajinek pe chic, xujech pe ri xaxilej tak chʼichʼ pa rukʼaʼ ri José Smith.