Ri Quijiquibanic ri Oxiʼ Jiquibanelaʼ

Tiquetamaj cʼa checonojel ri tinamit, ri ijaʼtzul, ri chʼabel, y ri vinakul achojiqʼuin xtapon vi re vuj reʼ, chi roj, roma ri rutzil ri Dios Tataʼixel y ri Kajaf Jesucristo, can xekatzʼet vi ri xaxilej tak chiʼichʼ ri e ucʼuayon re tzijonic reʼ. Ja cʼareʼ jun tzijonic pa ruviʼ ri retal quibanobal ri ruvinakul ri Nefi y quichin chukaʼ ri Lamaniʼ, ri cachʼalal. Nutzijoj chukaʼ ri quibanobal ri ruvinakul ri Jared. Rijeʼ xeʼel pe chiriʼ acuchi xban vi ri mamalej tzʼurutzʼic jotolibel ri banon chic chʼoven chirij. Ketaman chukaʼ chi re tzijonic reʼ e kʼaxatajinek chic pan inglés roma ri rusipanic y ri ruchukʼaʼ ri Dios, roma ja ri ruchʼabel rijaʼ biyon pe chike. Roma cʼariʼ, ketaman chi utzil chi re samaj reʼ can kitzij vi. Nikajiquibaʼ chukaʼ chi xekatzʼet ri etal e tzʼiban can chuvech ri xaxilej tak chʼichʼ. Ri etal riʼ xecʼut chikavech roj roma ri ruchukʼaʼ ri Dios y man roma ta jun achin. Nikakʼalajirisaj cʼa quiqʼuin choj tak chʼabel chi jun rutakonaxel ri Dios xkaka pe chicaj y jacʼa rijaʼ ri cʼamayon pe ri xaxilej tak chʼichʼ y xerucʼut chikavech. Romariʼ tok roj xojtiquir xekatzʼet y xekanicʼoj rixaxilej tak chʼichʼ y ri etal e tzʼiban can chiquivech. Can ketaman vi cʼa chi xa roma ri rutzil ri Dios Tataʼixel y ri Kajaf Jesucristo tok xojtiquir xekatzʼet ri retal banobel y nikajiquibaʼ chi ronojel reʼ e kitzij. Y roj janíla nikamey ronojel reʼ. Man riqʼuin vi cʼariʼ, ri ruchʼabel ri Ajaf xubij chike chi kojjiquiban cʼa chirij. Roma cʼariʼ, can cʼo chi yojjiquiban chirij reʼ, richin queriʼ nikanimaj rutzij ri Dios. Ketaman cʼa chi vi nikatakej ri Cristo, ri katziak xquechʼajchʼojir chupan ri quiquiqʼuel conojel ri achiʼaʼ, y manjun cʼa tzʼil kiqʼuin tok xkojapon chuvech ri rukʼatbel tzij ri Cristo, y cʼa cʼariʼ xkojcʼojeʼ cʼa jumul riqʼuin rijaʼ chicaj. Tiyaʼox cʼa rukʼij ri Tataʼixel, y ri Cʼajolaxel, y ri Uxlabixel, ri xa e jun Dios. Amen.