Diyin God Bizaad
Naaltsoos Mormon Wolyéhígíí Áłtsʼíísígo Baa Haneʼ

Naaltsoos Mormon Wolyéhígíí
Áłtsʼíísígo Baa Haneʼ

Naaltsoos Mormon wolyéhígíí ałkʼidą́ą́ʼ Americagi diné dah deíkáahgo binaʼasdzo dílzinígíí átʼé, dóó béésh tʼą́hí bikááʼ nááʼáasdzo. Béésh tʼą́hí dį́įʼgo ałʼąą átʼéego biyiʼ baa haneʼ.

  1. Nephi bibéésh tʼą́hí, éí naaki ałʼąą átʼé: Áłtsʼíísí dóó ntsaago béésh óola tʼą́hí. Áłtsʼíísígíí éí iiʼsizį́jígo bídadéétʼiʼígíí, dóó Diyin God yá dahalneʼii binaʼnitin dóó tádadeeskaiígíí baa naʼasdzo, ntsaaígíí diné dah deíkáhígíí nátʼą́ą́ʼ náhaneʼii bídéétʼiʼígíí íiyisíí baa naʼasdzo (1 Nephi 9:2–4). Ákondi, Mosiah hinánę́ę dóó, béésh óola tʼą́hí ntsaaígíí hózhǫ́ iiʼsizíiniijígo bídadéétʼiʼígíí ałdóʼ biyiʼ.

  2. Mormon bibéésh óola tʼą́hí, éí Mormon Nephi bibéésh óola tʼą́hí ntsaaígíí áłtsʼíísígo áyiilaaígíí biyiʼ, dóó tʼáá bí bizaad ląʼída biyiʼ. Díí béésh óola tʼą́hí ałdóʼ Mormon nátʼą́ą́ʼ náhaneʼii yaa náhoolneʼ dóó biyeʼ Moroni ałdóʼ yighą́ąhjįʼ akʼeʼeeshchį́.

  3. Ether bibéésh óola tʼą́hí, Jared bidineʼé binátʼą́ą́ʼ náhaneʼ yaa halneʼ. Díí naʼasdzooígíí Moroni áłtsʼíísígo áyiilaa; tʼáá bí bizaad dóó nátʼą́ą́ʼ náhaneʼ yił ahiiʼ yiyíizoh “Ether Binaaltsoos” wolyéego.

  4. Béésh łitsoii tʼą́hí Lehi bidineʼé Jerusalemdę́ę́ʼ deiníʼánígíí 600 nááhaigo Jesus Christ bidiʼdoochííł yę́ędą́ʼígíí. Díí “Moses ashdlaʼgo binaaltsoos, … Dóó Jew dineʼé hazlį́į́ʼ dóó naʼasdzooígíí ałdóʼ, … dóó Zedekiah, Jew dineʼé aláahdi binaatʼáanii dah neezdáajįʼ naʼasdzooígíí biyiʼ; Dóó Diyin God yá dahalneʼii náásgóó ádahodoonííł yaa dahoolneʼę́ę ałdóʼ biyiʼ ” (1 Nephi 5:11–13). Isaiah dóó Diyin God yá dahalneʼii naaltsoos sání dóó doo naaltsoos sání biyiʼ baa dahaneʼígíí dabizaad díí béésh óola tʼą́hí, Naaltsoos Mormon wolyéhígíí biyiʼ bee akʼeʼeeshchį́.

Naaltsoos Mormon wolyéhígíí ashdlaʼáadahgo ałtsʼáádzo, naaltsoos daolyéego, tʼááłáʼí tʼéiyá doo naaltsoos wolyée da, dóó ałʼąą diné akʼedaʼashchínígíí bízhiʼ bee dawójíigo ályaa. Áłtséhígíí (áłtsé hastą́ągo naaltsoos sinilígíí, Omnijįʼ) Nephi bibéésh óola Tʼą́hí Áłtsʼíísígíí bitsʼą́ą́dę́ę́ʼ ályaa. Naaltsoos Omni dóó Mosiah wolyéhígíí bitaʼgi łaʼ saad dah shijaaʼ Mormon biZaad wolyéego. Díí saad dah shijaaʼígíí béésh óola Tʼą́hí Áłtsʼíísígíí dóó Ntsaago béésh óola Tʼą́hí Mormon áłtsʼíísígo áyiilaaígíí bee ahidiiʼnil.

Nízaadgóó naʼasdzooígíí, Mosiah dóó Mormon, wóltaʼ 7, Nephi bibéésh óola Tʼą́hí Ntsaa wolyéhę́ę Mormon áłtsʼíísígo ánáyiidlaaígíí átʼé. Akéeʼdiígíí, Mormon, wóltaʼ 8, dóó naaltsoos ałtsojįʼ, Mormon biyeʼ Moroni akʼeʼeeshchį́, éí, bizhéʼé beʼiinaʼ ałtso nááyíizohgo, Jared bidineʼé ndaʼazo yę́ę áłtsʼíísígo áyiilaa (Ether Binaaltsoos wolyéego) dóó náásgóó Moroni Binaaltsoos wolyéhígíí bídiidzohgo áyiilaa.

Jesus Christ biʼdizhchį́į́dóó 421gi yihahígíí nahalzhiish yę́ędą́ą́ʼ, Moroní, tsʼídá akéeʼdi Nephi bidineʼé Diyin God yá halneʼii dóó nátʼą́ą́ʼ náhaneʼ yaa halneʼii, diyingo naʼasdzooígíí ałchʼįʼ kwíyiilaa dóó Bóhólníihii yaa áhályą́ą doogo néideesʼį́į́ʼ, dííshjį́įdi deiyoołkáałjįʼ hadootʼááł biniiyé, Diyin God ałkʼidą́ą́ʼ bá dahalneʼii biníká góneʼ yee haadzíiʼgo áhodoonííł nínę́ęgi átʼáo. Jesus Christ biʼdizhchį́į́dóó 1823 yihahą́ądą́ą́ʼ, Moroni tʼáá bí, bitsʼíís dóó biyiʼsizíinii yił ahiih náátʼáazhgo, Diyin God Yá halneʼii Joseph Smith yaa níyá dóó bikʼijįʼ béésh óola tʼą́hí bikʼeʼeshchínígíí yeiníʼą́.

Kʼad díí akʼeʼeshchínígíí baa haneʼ: Naaltsoos Mormon wolyéhígíí áłtséédą́ą́ʼ ádaalyaahą́ą łahgo áłtsʼíísígo biiʼ ndaʼiisdzííʼ. Díí kʼad akʼeʼeshchínígíí ndaʼiisdzíʼę́ę hashtʼeńdaalyaa áko ałkʼidą́ą́ʼ ndaʼasdzo yę́ę dóó Diyin God Yá halneʼii Joseph Smith naʼazo yę́ę hózhǫ́ bikʼehgo ádoolníiłgo ályaa.