Diyin God Yá halneʼii Joseph Smith Bizaad Tʼáá Aanínígíí

Diyin God Yá halneʼii Joseph Smith Naaltsoos Mormon wolyéhígíí haitʼáo ííshją́ą́ ályaaígíí tʼáá bí bizaad yee yaa halneʼ:

“Iʼííʼą́ągo… naadiin łaʼgóó yoołkáałgo Biniʼantʼą́ą́tsoh yiziłgo [1823]… yéigo joobaʼ dóó tʼáá aaníí íinisingo Diyin God Ayóó Átʼéii bichʼįʼ sodiszin.…

“Diyin God bichʼįʼ sodiszingo, adinídíín hooleełgo wónáásdóó ałnéʼéʼaah biláahgi átʼéego adinídíín silį́į́ʼ, tʼáá hooshchʼįʼ ayóó ájítʼéii léiʼ shitsáskʼeh bíighahgi hojizlį́į́ʼ, doo niʼgi nikídeesʼeezgóó, níłchʼi yiyiʼ dasizį́.

“Ééʼ tsʼídá nizhónígo łigai léiʼ yiiʼ sitį́. Nahasdzáán bikáaʼgi díigi átʼéego łigaiígíí tʼah doo łaʼ yiistséeh da; dóó nahasdzáán bikáaʼgi kótʼéego tsʼídá nizhónígo łigai dóó bitsʼádiʼńlíidgo tsʼídá doo łaʼ hodooleeł da nisin. Bílaʼ, doo bigaan ałdóʼ tʼįįhdígo bílátsíín biláahgo doo bikʼeʼéstiʼí da; bikeeʼ, dóó bijáád ałdóʼ tʼįįhdígo bikétsíín biláahgo doo bikʼeʼéstiʼ da. Bitsiitsʼiin dóó bikʼos ałdóʼ doo bikʼeʼéstiʼ da. Ééʼ danineezígíí tʼéí yiiʼ sitį́, ąą átʼéego, biyid yiiłtsą́.

“Doo éí beʼééʼ tʼéiyá tʼáá íiyisíí łigai da, bitsʼíís tʼáá átʼé ałdóʼ doo baa hojoolneʼ átʼéego ayóó átʼé, dóó biniiʼ éí nʼdiilchʼilgo ińʼdíldlaʼígíí bił aheełtʼé. Hooghan góneʼ tʼáá íiyisíí adinídíín, ákondi sizínígíí binaagóó aláahgo bitsʼádiʼńdíín. Tʼóó áłtsé hołtsánę́ędą́ą́ʼ, násdzid ńtʼę́ę́ʼ; ákondi násdzidę́ę tʼáá áko nahjįʼ kódzaa.

“Shízhiʼ yee shíizhiʼ, áádóó Diyin God bitsʼą́ą́dę́ę́ʼ naalʼaʼii nishłį́įgo nichʼįʼ ashiʼdoolʼaʼ shidííniid, dóó Moroni wolyéego; Diyin God naanish bá ádeeshłíiłgo; dóó nihookááʼ dineʼé, dah deíkáahgo, ahidaʼdiilchíín dóó saad aheełtʼé bił nahazʼą́ bitahgóó, shízhiʼ yáʼátʼéehgo baa haʼniih dóó doo bił yáʼáshǫ́ǫ da dooleeł; éí doodago bílaʼashdlaʼii bitahgóó yáʼátʼééh dóó doo yáʼáshǫ́ǫ́góó baa yáʼátiʼ dooleeł.

“Naaltsoos léiʼ łeeyiʼ siʼą́ shidííniid, béésh óola tʼą́hí ályaago bikʼi naʼasdzo, díí kéyah yikááʼ kéédahatʼínę́ę, dóó háádę́ę́ʼ yíkahígíí bikááʼ yaa halneʼ. Tʼáá ałtso hoolʼáágóó Jesus Christ Binaʼnitin ałdóʼ biyiʼ dííniid, Yisdáʼiiníiłii ałkʼidą́ą́ʼ kéédahatʼínę́ę yichʼįʼ kóyiilaa yę́ęgi átʼéego.

“Áádóó tsé naaki béésh łigai binázʼáago—dóó éí tsé, ayidgi dah siʼánígíí beʼestłʼǫ́ǫgo, Urim dóó Thummim wolyéego bee hadítʼé—béésh tʼą́hí bił łeeyiʼ sinil; dóó tʼáá háiida díí tsé bee hólǫ́ǫ́góó dóó choyoołʼį́įgo ałkʼidą́ą́ʼ diné Ééhózin Yaa Halneʼii deiłníí ńtʼę́ę́ʼ; dóó Diyin God díí tséhígíí bee béésh óolaa tʼą́hí bilagáanaa bizaadkʼehjí ádoolnííł biniiyé hashtʼeyiilaa.

“Ánááshiłní, béésh óola tʼą́hí yaa yááłtiʼę́ę sheiníʼą́ągo—shaa dootʼáałjįʼ tʼah doo baa hoolzhíish da—doo éí háiida bichʼįʼ ííshjání ádeeshłíił da; áádóó ayidgi dasiʼáanii Urim dóó Thummim biłgo ałdóʼ; bił ííshją́ą́ ádíílííł shidiʼdooʼniiłígíí tʼéiyá; ákwíisdzaago éí shidiʼyoolyééł. Béésh óola tʼą́hí yee shichʼįʼ yáłtiʼgo, shíniʼ bił áhoodzaago béésh óola tʼą́hí łeeyiʼ sinilígíí yiiłtsą́, dóó éí tʼáá íiyisíí yitʼį́ dóó tʼáá báhátʼáádígíí biniinaa áadi níyáago hazʼánígi bééhosésįįd.

“Díí ałtso disétsʼą́ąʼgo, hooghan góneʼ adinídínígíí bichʼįʼ yáshtiʼígíí binaagóó tʼéiyá tʼáadoo hodíínaʼí silį́į́ʼ, áádóó tʼáá ałchʼįʼ kwáániiłgo, wónáásdóó hooghan góneʼ chahałheeł náhásdlį́į́ʼ, tʼáá hazhóʼó hanaagóó tʼéiyá, áádóó tʼáá hooshchʼįʼ yáʼąąsh ąą kódzaa, dóó ákódei ííyáago áajįʼ ájísdįįd, áádóó hooghan góneʼ tʼah doo yáʼąąshdę́ę́ʼ adinídíín haleehę́ęgi átʼé násdlį́į́ʼ.

“Haashį́į́ yitʼéego shił áhoodzaaígíí hazhóʼó baa ntséskeesgo sétį́, dóó naalʼaʼii doo łaʼ kótʼéego shił halneʼ da ńtʼę́ęʼgo tʼáá íiyisíí baa ntséskees; tʼáá íiyisíí ntséskeesgo, hooghan góneʼ anááʼdoodlałgo tʼáá hooshchʼįʼ baa ákonáániisdzįįh, dóó tʼáadoo hodíinaʼí shił nahalingo, tʼáá éí yáʼąąshdę́ę́ʼ naalʼaʼii tʼah ńtʼę́ę́ʼ shitsáskʼeh bíighahgi náánásdzį́.

“Ayánááʼniiłtiʼ, dóó áłtséédą́ą́ʼ níyáago yee haadzíʼę́ę yee hanáánáádzííʼ; tsʼídá doo łahgo átʼéego; ałtso yááłtiʼgo, nahasdzáán bikáaʼgi yéigo ánihwiitʼaah yee shił nááhoolneʼ, dichin, daʼahijigą́, dóó naałniihii bee hodoochxǫǫł; dóó díí tʼáá naʼńleʼdii nahasdzáán bikáaʼgi nahwiitʼaah éí kʼad óchíłígíí biyiʼ áhodoonííł. Tʼáadoo leʼé ałtso yaa hoolneʼgo, áłtséédą́ą́ʼ ádzaa yę́ęgi átʼéego dah nínáádiidzá.

“Ákweʼé hoolzhishgo, shíniʼ tʼáá íiyisíí biʼdíisnáaʼgo biniinaa, doo bił nisingóó áshiilaa, áádóó yiiłtsą́ dóó disétsʼą́ʼígíí tʼáá íiyisíí shiyaa hodeesyizgo sétį́. Shitsáskʼeh bíighahgi tʼáá éí naalʼaʼii náánásdzį́įgo bikʼee náádeesyiz, dóó tʼáadoo leʼé áłtséédą́ą́ʼ yaa hoolneʼę́ę náádisétsʼą́ą́ʼ éí doodago yaa nááhoolneʼ áádóó baa áháshyą́ą dooleełígíí shił chʼíiníʼą́, Satan beʼiiníziinii nínítáahgo ninaalnish dooleeł shidííniid (Shizhéʼé baghan hazʼáanii doo daʼatʼínígíí biniinaa), béésh óola tʼą́hí ńdiitʼą́ągo bee ashtʼį́į dooleeł shóʼníigo. Díí éí doo ádíílíił da shidííniid, Diyin God bee baa haʼniih dooleełgo tʼéiyá biniiyé béésh óola tʼą́hí naa dootʼááł shidííniid, áádóó Bisodizin bá hooghan bił nahazʼą́ą dooleełgo tʼéiyá bíká áshtʼį́į dooleeł nááná łaʼ éí dooda; doo kótʼéégóó éí doo shaa dootʼáał da.

“Táadi shaa níyá dóó bikʼijįʼ, áłtséédą́ą́ʼ yę́ęgi átʼéego yáʼąąsh gódei nínáánádzá, dóó haashį́į́ yitʼéego shił áhoodzaaígíí yéigo baa ntsínáánáskeesgo ánááshiidlaa; yáʼąąshdę́ę́ʼ naalʼaʼii táadi náádzá azlį́į́ʼ dóó tʼáá áko, naʼahóóhai ádííniid, dóó jį́įjįʼ ahoolzhiizhgo baa ákoniizį́į́ʼ, áko ałchʼįʼ yéiiltiʼgo tłʼééʼ bíighah azlį́į́ʼ lá.

“Áádóó bikʼijįʼ shitsáskʼehdóó ńdiishʼnaʼ, dóó, naanish ánáshʼįįh yę́ęgo dah diiyá; ákondi, naashnish ánáshʼįįh yę́ę baa ńdiisdzáago, sheʼedziilii tʼáá íiyisíí chʼééh deeyáago ndeeshnish yę́ę doo bíighahgóó baa ákoniizį́į́ʼ. Shizhéʼé, shíighahgi yilnishgo, haashį́į́ nishtʼéego yaa ákoniizį́į́ʼ, dóó hoghangóó nídídááh shidííniid. Kin siʼą́ą́góó ńdeeshdááł nisingo dah diiyá; ákondi dáʼákʼeh dóó tłʼóóʼjígo anítʼiʼ báhátis yishááh ńtʼę́ę́ʼ; tʼáá ałtsojįʼ doo shidziil da sélį́į́ʼ, dóó niʼjįʼ doo shidziilgo íítłizh, dóó nízaadjįʼ shił chʼaa hazlį́į́ʼ.

“Tsʼídá áłtsé tʼáadoo leʼé bénáshniihígíí éí łaʼ shijózhíigo, shichʼįʼ yájíłtiʼ. Dego déeʼį́į́ʼ, dóó tʼáá éí naalʼaʼí yę́ę shitsiitsʼiinjígo wódahgo dah sizį́, adinídíín binázʼáago áłtséédą́ą́ʼ átʼéhę́ęgi átʼéego, áádóó áłtsé tłʼę́ę́dą́ą́ʼ yee shił hoolneʼę́ę yee shił nááhoolneʼ, dóó nizhéʼé bichʼįʼ díínááł dóó nił áhoodzaa yę́ę dóó beehazʼáanii naaheesyá yę́ę bee bił hodíílnih shidííniid.

“Bikʼeh hóółʼįįd; dáʼákʼehgi shizhéʼé baa nánísdzá, dóó tʼáá ałtso shił áhoodzaa yę́ę bee bił hweeshneʼ. Diyin God bitsʼą́ą́dę́ę́ʼ nił áhoodzaa lá shidííniid, dóó naalʼaʼii yee nił hoolneʼígíí bikʼehgo ádíílííł shidííniid. Dáʼákʼehdóó dah diiyá, dóó naalʼaʼii béésh óola tʼą́hí łeeyiʼ sinil dííniid yę́ęgo níyá; dóó tʼáá íiyisíí yitʼį́įgo shił áhoodzaaígíí biniinaa, áadi níyáago doo nanitłʼahgóó bikʼíníyá.

“Manchestergi kin sinil, dóó Ontario hahoodzohgi, dóó New York ntsaago hahoodzoh binaashiigi, ntsaago dóó aláahdi nineezgo dah yiskʼid. Dah yiskʼid eʼeʼaah bąąhjígo, kʼasdą́ą́ʼ bílátahdi, tsé ntsaa léiʼ biyaagi, béésh óola tʼą́hí siʼą́, tsé tsitsʼaaʼ ályaago biyiʼgi. Díí tséhígíí bikááʼdę́ę́ʼ ałníiʼgi ditą́ dóó nímaz, dóó bibąąhjígo áłtʼą́ʼí, áko ałníiʼgi tʼéiyá yitʼį́, ákondi bibąąh gónaa éí łeezh bikʼi shijaaʼ.

“Łeezh nahjįʼ íishłaago, tsin łaʼ ńdiitą́, éí tsé biyaa íítsih, dóó de íishłaa. Biiʼ dééʼį́į́ʼ, dóó béésh óola tʼą́hí, Urim dóó Thummim, dóó béésh ééʼ, naalʼaʼii yaa hoolneʼę́ę yiiłtsą́. Tsitsʼaaʼ biiʼaznilígíí tsé nádleehí biyiʼ tsé ałhąąh naheesnil nahalingo bee ályaa. Tsitsʼaaʼ bitłʼáahdi tsé naaki sinil, dóó bikáaʼgi béésh óola tʼą́hí dóó tʼáadoo leʼé łaʼígíí bił sinil.

“Haashnííł ńtʼę́ę́ʼ, naalʼaʼii dooda shidííniid, dóó baa náhodoonihígíí tʼah doo baa hoolzhíish da nááshiʼdooʼniid, dį́į́ʼ nááhaigo índa shiʼdooʼniid, ákondi tsʼídá tʼááłáʼí nááhai azlį́įʼgo éí kweʼé hazʼą́ąjįʼ ńdíídááł shidííniid, dóó áadi baa deeshááł, dóó tʼáá ákóshtʼį́įgo béésh óola tʼą́hí shaa dootʼáałjįʼ ahodoolzhish shidííniid.

“Bee shił hóóneʼę́ę, bikʼehgo, ałtso nínáhahgo náshdááh, dóó tʼáá éí naalʼaʼii néistsééh, dóó naʼnitin dóó bééhózinii shaa yiléehgo baa náshdááh, Bóhólníihii haʼátʼíí yaa ndoogaałígíí, dóó bił hazʼánígíí haitʼáo dóó haitʼéego akéeʼdi deiyoołkáałgo ádoolníłígíí.

“Índa béésh óola tʼą́hí, Urim dóó Thummim, dóó béésh ééʼ hadooʼniłjįʼ ayííłką́. Biniʼantʼą́ą́tsohgi yiziłígíí naadiin–naakigóó yoołkáałgo, tʼááłáʼídi mííl dóó baʼaan tseebíidi neeznádiin dóó baʼaan naadiin–tsostsʼidgóó yihahgo, nínáánááhai bikʼeh łeeyiʼ sinil yę́ęgi xii nínáánísdzáago, tʼáá éí naalʼaʼii sheiníʼą́ kóshiłníigo: Baa áhólyą́ą doo; tʼáá naʼńleʼdii naashʼáago shitsʼą́ą́ʼ ńdiitʼą́ągo, éí doodago tʼáá ádzaagi átʼéego naashʼáago, tʼóó nahjįʼ kóshidiʼdoolnííł; ákondi tʼáá ałtso bee hadíníshtʼéhígíí bee baa áháshyą́ągo, naalʼaʼii yíká nádzáajįʼ baa áháshyą́ągo, éí baa áháyą́ą doo.

“Haʼátʼíí biniiyé tʼáá íiyisíí baa áhólyą́ shiʼdooʼniidígíí shił bééhoozin, dóó naalʼaʼii haʼátʼíí biniiyé tʼáadooleʼé ádíílííł shiʼdooʼniid yę́ę íishłaago, shaa ńdoodááł dóó nínéididootʼáłígíí shił bééhoozin. Tʼáá áko diné díí naashʼáhígíí bił béédahoozingo, ląʼída tʼáadoo leʼé bee shighaʼdootʼáłígíí chodayoosʼįįd. Tʼáá ałtso bee aghaʼdooniłgo baa ntsíháskézígíí choozʼįįd. Achʼįʼ nahwiiʼnánígíí tʼóó tsíkʼeh dóó tʼóó tsé ádin silį́į́ʼ, dóó ląʼída diné shighadeidootʼáałgo áłahjįʼ hadashisííd. Ndi Diyin God bibee ééhózinii binahjįʼ, baa áháshyą́ągo shílákʼee siʼą́ą́ ńtʼę́ę́ʼ, ádíílííł shiʼdooʼniid yę́ę ałtso íishłaago índa. Yee nahoníʼánę́ę bikʼehgo, á naalʼaʼii yíká nádzá, dóó baa níʼą́; dóó díí jį́įjįʼ yaa áhályą́, Tʼą́ą́tsoh yiziłígíí naakigóó yoołkáałgo, tʼááłáʼídi mííl dóó baʼaan tseebíidi neeznádiin dóó baʼaan tádiin dóó baʼaan tseebíigo yihahgo.”

Díí tʼáá ałtso naʼasdzooígíí, Joseph Smith—History, Pearl of Great Price wolyéhígíí biyiʼ, dóó History of the Church of Jesus Christ of Latter-day Saints, naaltsoos 1, dóó óltaʼ 1 dóó 6jįʼ.

Ałkʼidą́ą́ʼ naʼasdzooígíí nahasdzáán biyiʼdóó haatʼą́ diné hanááhaaskai yę́ę binééʼ yádaałtiʼ nahalingo. Dóó Diyin God bibee aʼiilyéii dóó bibee adziilii bee tʼáá aaníí átʼé níigooígíí bee díí jį́įdi saadígíí bee ályaa, tsʼídá áłtsé bilagáanaa bizaadkʼehjí naaltsoos ályaago nihookááʼ dineʼé bichʼįʼ kólyaa 1830 yihahą́ądą́ą́ʼ The Book of Mormon wolyéego.