Mormonpa Qelqan
Imayna Allichasqa Kasqan

Kinsa laya Raphi Qelqakunamanta rimarikun Mormonpa Qelqanpa qallareq raphinpi, kaymi chaykuna:

1. Nephiq Raphinkuna, Qelqaq rimasqan hina, ishkaymi karqan—(a) Hatun Raphikuna; (b) Huch’uy Raphikuna. Hatun Raphikunaqa rimarqan runakunaq imayna kayninkumantan astawanqa, Huch’uy Raphikunataq qollanan willaykunamanta astawan.

2. Mormonpa Raphinkuna, Nephiq Raphinkunamanta huch’uyyachisqa qelqakuna, Mormonpa ruwasqan, askha rimaykunapiwan, pay kikinpa willayninpiwan qatisqa; qhepaman hinataq Mormonpa churin Moromi chayman yapan.

3. Etherpa Raphinkuna, jareditakunaq willaynin, chay willaytataq Moroni huch’uyyachirqan, pay kikintaq chaypi rimarin, Etherpa Qelqan nispataq wakin qelqakunaman yapan.

   Kaykunamantaq huk raphikuna yapasqa kanman, pasaqllataq kay qelqamanta Mormonpa Qelqanpi rimakun, kaytaq kay qelqa:

4. Labanpa Bronse Raphinkuna, Lehiq llaqtanmi kayta apamurqanku Jerusalenmanta, kaypitaq karqan Hebreo qelqakuna, ayllu-saphikunapiwan; chaymanta askhataq nephita qelqapi rikhurin.

Chunka pishqayoq t’aqakunan kan Mormonpa Qelqanpi, kaykunataq—hukllataq mana—Qelqakuna nispa reqsisqa kanku, sapanka qelqataq apan qelqaqpa sutinta. Kaykunamanta soqta qelqakunaqa Nephiq Huch’uy Raphinkunamanta t’ikrasqan kanku, kay qelqakunataq kanku: Ñawpaqkaq Nephi, Ishkay kaq Nephi, Jakob, Enos, Jarom, Omnipiwan. Omniq Qelqanpa pataman Mosiahq Qelqanpa ñawpaqenpiwan tarinchis Mormonpa Rimayninkunata; kay rimaykunataq ratachin Nephiq qelqankunata Huch’uy Raphikunamanta qelqasqata hina, qateq pachakunapaq Hatun Raphikunamanta Mormonpa huch’uyyachisqan qelqakunawan. Mormonpa Rimayninkunapiqa kan ña qelqasqa qelqakunamanta hamut’achiy, qateq qelqakunapaq ñawpaq simi ima.

Kay qelqapiqa, Mosiahmanta Mormonpa 7 t’aqankamaqa, Nephiq Raphinkunamanta Mormonpa huch’uyyachisqanmanta t’ikraymi. Mormonpa Qelqanpa qhepa kaqninqa, Mormonpa 8 t’aqanpa qallariyninmanta qelqaq tukukuyninkamaqa, churin Moroniq qelqasqanmi; paytaq qallariypi taytanpa kawsayninpa qelqanta tukurqan, chay patamantaq jareditakunaq qelqanta huch’uyyachiyta qallarirqan, Etherpa Qelqanta hina. Qhepamanñataq pay yaparqan Moroniq Qelqan nispa reqsisqanchista.

Mormonpa Qelqanqa mast’arikun 600 B.C watamanta 421 A.D. watakaman. Qhepa watakunapi hinataq nefitakunaq qhepa kaq willaynin qelqaq Moroni, qollanan qelqakunata intuykurqan; Wiraqochapaqtaq pakarqan, qhepa p’unchawkunapi rikhurimunanpaq, ñawpa unanchaqkunawan Yayaq arunpa nisqanman hina. Kay kikin Moronillataq 1827 A.D. watapi kawsarinpusqa kaspaña, kay qelqayoq raphikunata Jose Smithman qorqan.