1 Ao ngaia are tia kona n noora kewen, ao aki teimatoan nanoia natiia aomata; eng, ti kona n nooria bwa i nanon ana raoiroi te Uea ae korakora ao e bon kakabwaiaia ma ni kanakoraoa aroia ake a kawenea aia onimaki irouna.

2 Eng, ao ti kona n nooria bwa n te tai are e nakoraoi iai aroia ana botanaomata, eng, n rakan aia marae n ununiki, aia nanai ma aia ikota ni man, ao n aia koora, ma aia tirewa, ao bwaai ni kabane aika a kakawaki n aekaia ma aroia nako; ao ni kawakinan maiuia, ma kainaomatakiia ma i nanon baia aia kairiribai; ao kamarauan nanoia aia kairiribai bwa a na aki kateirakei buaka ni kaaitaraia; eng, ao ni kakimototoa, karaoan bwaai ni kabane ibukin mweraoia ma kukureia ana botanaomata; eng, ao anne ngkanne te tai are a kamatoatoai nanoia, ma ni mwaninga taekan te Uea ae Atuaia, man toubeka Teuare e Tabu i aan waeia—eng, ao e riki aio ibukin beebeten aroia, ma korakoran nakoraoin kaubwaia.

3 Ao ngaia are ti nooria bwa ngkana e aki katuaia ana botanaomata te Uea n taian karawawata aika a bati, eng, ngkana e aki karokoa te mate ma te kakamaku, ma te rongo ao aekan aoraki nako, ao a na bon aki uringnga.

4 O ai burababara, ao ai kainikatongara, ao ai buakakara, ai riaborora, ao ai waekoara ni karaoa ae buakaka, ao ai waeremwera ni karaoa ae raoiroi, natiia aomata; eng, ai waekoara n ongo ana taeka teuare e buakaka, ma ni kamatoai nanoia iaon bwain te aonaba ae akea bonganaia!

5 Eng, ai waekoara n tabekaki rake n te kainikatonga; eng, ai waekoara ni kamoamoa, ma ni karaoi aekan bwaai nako aika a buakaka; ao ai waeremwera n uringa te Uea ae Atuaia, man ongo n ana reirei, eng, ai waeremwera n nakonako n te kawai ae wanawana!

6 Nooria, a bon aki tangiria bwa te Uea ae Atuaia, are e karikiia, e na karaoi ma n tautaeka i aoia; e ngae ngke e korakora raoiroina ma ana nanoanga nakoia, a bon kaakea ana reirei, ao a bon aki tangiria bwa e na riki bwa aia tia kairiri.

7 O ai korakora ra akean bonganaia natiia aomata; eng, a bon aki bongana riki nakon bubun te tano.

8 Bwa nooria, bubun te tano e mwainging ikai ao ikekei, man bwenauaki, n ana babaire Atuara ae korakora ao n aki totoki.

9 Eng, nooria a bon ruru ma n rurubenebene taian tabuki ma taian maunga ni bwanaana.

10 Ao ni mwaakan ana taeka ao a uruaki, ma n riki ni boraoi, eng, n ai aron te mwarua.

11 Eng, ni mwaakan bwanaana ao e bon ioioaki te aonaba ae bwanin;

12 Eng, ni mwaakan bwanaana, ao aan te aonaba e bon mwainging, nakon are i nuka.

13 Eng, ao ngkana e kangai nakon te aonaba—Mwaing—ao e bon mwaing.

14 Eng, ngkana e kangai nakon te aonaba—Ko na oki rikaaki, ao e kananaua riki te bong i nanon te aoa ae mwaiti—ao e na bon karaoaki are e taku.

15 Ao ngaia are, n aron ana taeka ao e oki te aonaba, ao e taraa n tei taai iroun te aomata; eng, ao nooria, e riki aio; bwa e bon mwaing te aonaba ma tiaki taai.

16 Ao nooria, ngkana e kangai naba nakon ranin te marawa ae nano—Ko na mwau—ao e na bon karaoaki are e taku.

17 Nooria, ngkana e taku nakon te maunga—Ko na teirake, ao nako mai ni bwaka iaon te kaawa arei, bwa e aonga n taunaki—nooria e na bon karaoaki are e taku.

18 Ao nooria, ngkana te aomata e karaba kaubwaina n te tano, ao te Uea e na kangai—Ke e kamaraiaki, ibukin buakakan teuare e karaba—nooria, e na bon kamaraiaki.

19 Ao ngkana te Uea e na kangai—Ko na kamaraiaki, bwa a na akea te aomata ae kona ni kuneko ma n te tai aei ao n aki totoki—nooria, bon akea te aomata ae e na reke irouna ma n te tai aei ao n aki totoki.

20 Ao nooria, ngkana te Uea e na kangai nakon te aomata—Ibukin am bure, ao ko na kamaraiaki n aki toki—e na bon karaoaki are e taku.

21 Ao ngkana te Uea e na kangai—Ibukin am bure ao ko na kanakoaki ma imatau—e na bon karekea te anga ae e na karaoaki are e taku.

22 Ao e na reke te maraia nakon are e na taekina aio nakoina, bwa e na bon riki aei nakon are e na karaoa te bure, ao e na bon aki kona ni kamaiuaki; ngaia are, ibukin ae aonga aomata ni kamaiuaki ao e a tia n taekinaki te rairannano.

23 Ngaia are, a na kakabwaiaki ake a na rairinanoia ma n ongo ni bwanaan te Uea ae Atuaia; bwa naakai aika a na kamaiuaki.

24 Ao te Atua i nanon mimitongina, e na kariaia bwa aomata a na kairaki nakon te rairannano ao mwakuri aika a raraoi, bwa a na manga kaokaki nakon te akoi ibukin ae a tia n akoaki, n aron aia mwakuri.

25 Ao I tangiria bwa ni kabane aomata a na bane ni kamaiuaki. Ma ti wareka ae n te kabanea ni bong ae kakannato ao iai tabeman ake a na teweaki nako, eng, ake a na teweaki nako ma i matan te Uea;

26 Eng, ake a na katukaki n te aro n nanokawaki ae aki totoki, ni kakoroi bukin taeka are a kangai: Naake a tia ni karaoa ae raoiroi e na reke irouia te maiu are aki totoki; ao naake a tia ni karaoa ae buakaka e na reke irouia te kabuakakaki ae aki totoki. Ao e na riki n aekan aei. Amen.