1 Ao ngkai e a koro bukina bwa n te kawanibwi ma onoua n ririki, ao Nibwaite a bon tiku n aroia ni buakaka, eng, n te buakaka ae korakora, ao Reimwanaite a bon matoatoa ni kaawakin ana tua te Atua, n aron ana tua Mote.

2 Ao e a koro bukina bwa n te ririki aio ao bon iai temanna ae Tamuera te Reimwanaite, ae roko nakon te aba are Taraemera, ma ni waaki ni kabwarabwara nakoia aomata. Ao e a koro bukina bwa e bon kabwarabwara, i nanon boong aika a mwaiti, taekan te rairannano nakoia aomata, ao a bon tewenakoa, ao e nang bon oki nakon abana.

3 Ma nooria, e taku bwanaan te Uea nakoina, bwa e na riai n oki riki, ma n taetae ni burabeti nakoia aomata taekan bwaai aika a na roko irouia.

4 Ao e a koro bukina bwa a bon aki tangiria bwa e na rin n te kaawa; ngaia are e nako ma n toka iaon te oo, ma n arora baina man tang n te bwanaa ae takarua, ma n taetae ni burabetii bwaai ake e karin te Uea i nanona.

5 Ao e taku nakoia: Nooria, Ngai, Tamuera, te Reimwanaite, ao I bon taekin taeka aika e karin te Uea inanou; ao nooria e bon kamena inanou bwa N na kangai nakoia te botanaomata aio bwa te kabaang ni momotiraoi e bon tine i aoia te botanaomata aio; ao e na bon aki koro abubua te ririki ao e na bwaka te kabaang ni momotiraoi i aoia te botanaomata aio.

6 Eng, bon iai te urubwai ae korakora ae tataningaiia te botanaomata aio, ao e na bon roko nakoia te botanaomata aio, ao bon akea te bwai ae kona ni kamaiuia te botanaomata aio ma ti te rairannano ao te onimaki iroun te Uea ae Iesu Kristo, are e na bon roko nakon te aonaba aio, ma ni karaoi bwaai aika a mwaiti ao e na bon tiringaki ibukiia ana botanaomata.

7 Ao nooria, e a tia n taekinna ana anera te Uea nakoiu, bwa e bon uota te rongorongo ae kakukurei nakon tamneiu. Ao nooria, I bon kanakomaiakaki nakoim bwa N na tataekinna nakoimi naba, bwa e aonga n ae kam karekea te rongorongo ae kakukurei naba; ma nooria kam bon rawa ni butimwaeai.

8 Ngaia are, e taku te Uea: Ibukin matoatoan nanoia te botanaomata ae Nibwaite, ao ngkana aki rairinanoia ao N na anaa au taeka ma irouia, ao N na anaa Tamneiu ma irouia, ao N na aki manga taotaona nanou ibukiia, ao N na katannakoa nanoia tariia bwa a na kaaitaraia.

9 Ao e na bon aki koro abubua te ririki i mwaain ae N na karekea te anga ae a na oreaki iai; eng, N na kawaria ma te kabaang ao te rongo ao taian aoraki n aekaia nako.

10 Eng, N na kawaria ngkana e korakora uniu, ao iai kaain te kaaua n roro aika a na maiu, aika ami kairiribai, bwa a na noora korakoran te urubwai nakoimi; ao e na bon riki aio ngkana kam aki rairinanomi, e taku te Uea; ao naake kaain te kaaua n roro a na karika te urubwai nakoimi.

11 Ma ngkana kam rairinanomi ma n okira te Uea ae Atuami ao N na katannakoa uniu, e taku te Uea; eng, e taku te Uea, a na kakabwaiaki aika a na rairinanoia man okirai, ma e na maraia ane e aki rairananona.

12 Eng, e na maraia te kaawa ae bubura ae Taraemera; bwa nooria, e bon kawakinaki ibukiia aika a raoiroi; eng, te maraia nakon te kaawa ae bubura aio, bwa I nooria, e taku te Uea, bwa a mwaiti, eng, a na mwaiti riki kaain te kaawa ae bubura aio, aika a na kamatoatoa nanoia ni kaaitaraai, e taku te Uea.

13 Ma a na kakabwaiaki aika a na rairinanoia, bwa N na kamaiuia. Ma nooria, ngke arona bwa akea aika a raraoi ake a mena n te kaawa ae bubura aio, nooria, N na karekea te anga ae e na bwaka te ai ma i karawa ma ni kamauna.

14 Ma nooria, bon ibukiia aika a raoiroi ae e kawakinaki iai. Ma nooria, e a roko te tai, e taku te Uea, ae ngkana kam teweia nako aika a raoiroi ma i buakomi, ao ngkanne kam a bon tai nakon te kamaunaki; eng, e na maraia te kaawa ae bubura aio, ibukin te buakaka ma mwakuri aika bati n ribaki are i nanona.

15 Eng, e na maraia te kaawa are Kiteon, ibukin te buakaka ao mwakuri aika bati n ribaki are i nanona.

16 Eng, ao a na maraia kaawa aika a mena n te aba n uakaan, ake a bwainaki irouia Nibwaite, ibukin te buakaka ao mwakuri aika bati n ribaki ake inanoia.

17 Ao nooria, e na roko te maraia nako aon te aba, e taku aia Uea Taanga ni Buaka, ibukiia te botanaomata ake a mena iaon te aba, eng, ibukin buakakaia ma aia mwakuri aika bati n ribaki.

18 Ao e na koro bukina bwa, e taku aia Uea Taanga ni Buaka, eng, Atuara ae korakora ma ni koaua, bwa ane a karabai kaubwaia n te tano a na manga bon aki kunei, ibukin te maraia ae korakora nakon te aba, ti ngkana te aomata ae raoiroi ao e karaba ibukin te Uea.

19 E taku te Uea, I tangiria bwa a na karabai kaubwaia nakoiu; ma a na maraia naake aki karabai kaubwaia mai irou; bwa bon akea aika a na karabai kaubwaia nakoiu ma ti naake a raoiroi; ao ane e aki karaba kaubwaina mai roou, e na bon maraia, ao kaubwaina naba, ao bon akea ae e na kunea ibukin te maraia are e na taona te aba.

20 Ao e na roko te bong are a na karabai kaubwaia iai, ibukina bwa a bon kabanei nanoia iaon te kaubwai; ao ibukina bwa a bon kabanea nanoia iaon kaubwaia, ao a na karabai kaubwaia ngkana a birinako ma irouia aia kairiribai; ao ibukina bwa a na bon aki karabai mai irou, a na maraia ao kaubwaia naba; ao n te bong anne ao a na bon oreaki, e taku te Uea.

21 Nooria ngkami, te botanaomata ae n te kaawa ae bubura ae korakora aei, ma n ongo n au taeka; eng, ongo nakon taeka ake e taekin te Uea; bwa nooria, e taku bwa kam kamaraiaki ibukin kaubwaimi, ao a maraia naba kaubwaimi ibukina bwa kam kabanei nanomi i aoia, ma n rawa n ongo n ana taeka teuare e anganingkami.

22 Kam aki uringa te Uea ae Atuami ni bwaai ake e kakabwaiaingkami iai, ma kam aki toki n uringa kaubwaimi, tiaki ibukina bwa kam na karabwa te Uea ae Atuami ibukina; eng, e aki bane nanomi nakon te Uea, ma a bon onrake ibukin te kainikatonga, n te kamoamoa, ao e a korakora onrakena, n te bakantang, te kauntaeka, te kairiribai, bwainikirinaia aomata, ao te tiriaomata, ma aekan bure nako.

23 Ao ibukin aio ao te Uea ae te Atua e karekea te anga ae e na roko te maraia iaon te aba, ao iaon naba kaubwaimi, ao e riki aio ibukin ami bure.

24 Eng, a na maraia te botanaomata aio ibukin te tai aio are e a roko, ao kam bon teweia nako burabeti, ma ni bwainingareia, ma ni karebanaia n te atibu, ma n tiringia, ma ni karaoi aekan buakaka nako, n aron are a karaoia kaaina ngkoa.

25 Ao ngkai ngkana kam taetae, kam kangai: Ngke arona bwa ti maiu n aia bong ara bakatibu, ti na bon aki tiringia burabeti; ti na bon aki karebanaia n te atibu, ma n teweia nako.

26 Nooria kam a buakaka riki nakoia; bwa ngkai e maiu te Uea, ao ngkana e roko te burabeti i buakomi ma n taekina ana taeka te Uea, are e kaoti buremi ma buakakami, kam na bon un irouna, ma n teweia nako ma n ukoukori aanga are kam na kamauna iai; eng, kam na taekinna bwa te burabeti ni kewe, ao bon te tia bure, ao e roko mai iroun te riaboro, ibukina bwa e tataekina koauan buakakan ami mwakuri.

27 Ma nooria, ngkana e roko te aomata i buakomi ma n taku: Karaoa aei, akea te bure; karaoa anne ao kam na bon aki kainnano; eng, e na bon kangai; Nakonako n aron kainikatongan nanomi, nakonako n aron kainikatongan ami taratara, ma ni karaoi bwaai ni kabane ake e tangiri nanomi—ao ngkana e roko te aomata i buakomi ma n taekina aei kam na butimwaia ma n taekinna bwa te burabeti.

28 Eng, kam na tabekia rake, ma n anganna ami bwai; kam na anganna ami koora, ma ami tirewa, ao kam na kunnikaia ni kunnikai aika a bobuaka; ao ibukina bwa e taekin taeka ni kababaingkami, ao e taku bwa a nakoraoi bwaai ni kabane, ao ngkanne a na bon akea ana bure iroumi.

29 O ngkami te roro ae buakaka ma ni kabaouai kawai, ngkami te botanaomata ae kam matoatoa ma ni bonotaninga, maanra te tai ae kam kataua inanomi bwa e na taotaona nanona iai te Uea iroumi? Eng, e na maanra te tai ae kam na kariaia bwa kam na kairaki irouia taan kairiri aika a burababa ma ni mataki? Eng, maanra ami tai ae kam na rinea iai te roo ao tiaki te oota?

30 Eng, nooria, e a ikoiko ngkai unin te Uea ni kaaitaraingkami; nooria, e a tia ni kamaraia te aba ibukin ami bure.

31 Ao nooria, e a roko te tai are e kamaraiai kaubwaimi, n te aro are a kakai bua, ao kam aki kona n tauii; ao i nanon ami bong ni kainnano ao kam bon aki kona n anai.

32 Ao i nanon ami bong ni kainnano kam na tang nakon te Uea; ao e na matebuaka tangimi, bwa e a tauraoi n roko kamaunakimi, ao te urubwai nakoimi e a kamatoaki raoi; ao ngkanne kam na tang ma n tatakarua n te bong arei, e taku aia Uea Taanga ni Buaka. Ao ngkanne kam na bwaebwaeti ma ni kangai:

33 O ngke arona bwa I a tia n rairananou, ma n aki tia n tiringia burabeti, ma ni karebanaia n te atibu, ma n teweia nako. Eng, n te bong arei kam na kangai: O ngke ti a tia n uringa te Uea ae Atuara n te bong are e anganiira iai kaubwaira, ao ngkanne tao ana bon aki kakai bua ma n akea mai iroura; ma nooria, a bua kaubwaira mai iroura.

34 Nooria, ti kawenea te bwai ni mwakuri ikai ao n te ingabong ao e a bua; ao nooria, a bon anaaki ara kabaang mai iroura n te bong are ti ukoukori iai ibukin te buaka.

35 Eng, ti a tia ni karabai kaubwaira ao a tia ni bua mai iroura, ibukin kamaraiakin te aba.

36 O ngke arona bwa ti a tia n rairinanora n te bong are e roko iai ana taeka te Uea; bwa nooria e a kamaraiaki te aba, ao a bane ni kakai bua bwaai ni kabane, ao ti a bon aki kona n tauii.

37 Nooria, ti a bon otabwaniniaki irouia taimonio, eng, ti bon katobibiaki irouia ana anera teuare e ukoukora kan kamaunakin tamneira. Nooria, a korakora ara bure. O te Uea, ko aki kona ni katannakoa unim ma iroura? Ao e na riki aio bwa aron ami taetae ni kawai ni bong akanne.

38 Ma nooria, ami tai n tataninga a bon tia n nako; kam a tia n tautaua bongin kamaiuakimi ni karokoa ae a rianako oi mwina, ao e a kamatoaki kamaunakimi; eng, bwa kam kabanei bongin maiumii n ukoukora te bwai ae e aki kona n reke iroumi; ao kam ukoukora te kukurei ma ni karaoan te bure, are bon te bwai ae kaitara aron te raoiroi are e mena iroun ara Mataniwi ae kakannato ae Akea Tokina.

39 O ngkami aika kaain te aba kam na ongo n au taeka! Ao I tataro bwa e na tannako unin te Uea mai iroumi, ao bwa kam na rairinanomi ao kam na kamaiuaki.