Helamanpa Qelqan

1 Hinataq pusaq chunka soqtayoq watapi, millay ruwaykunapiraq nefitakuna karqanku; ari, ancha hatun millay ruwaypi, lamanitakunataq mana pantay Yayaq kamachiyninkunata waqaycharqanku, Moisespa kamachisqa-siminman hina.

2 Kay watapitaq huk Lamanita Samuel Zarahemla hallp’aman hamurqan, runakunamantaq yachachiyta qallarirqan. Hinataq, askha p’unchawkunan yuyayman kutirimuyta runakunaman yachachirqan, paykunataq payta qarqorqanku, paytaq hallp’anman kutiripunanpaq hinaña kasharqan.

3 Ichaqa, Wiraqochaq arun payman hamurqan, yapamanta kutispa, imaña sonqonman hamusqantapas runakunaman unanchananpaq.

4 Hinataq, llaqtaman haykunanta mana kacharirqankuchu, chayraykutaq llaqtaq perqan pataman seqarqan, makinkunata chutarispataq wapu kallpayoq aruwan qaparirqan; runakunamantaq unancharqan imataña sonqonman Wiraqocha churasqanta.

5 Paytaq paykunata nirqan: Uyariychis, noqa Lamanita Samuel, Wiraqochaq rimayninkunata rimarini, sonqoyman churasqan simikunata; Paytaq sonqoyman churarqan, chaninchaypa q’anchinan kay runakuna patapi warkurayasqanta kay runakunaman ninaypaq; manaraq tawa pachak wata pasashaqtintaq chaninchayninpa q’anchinan kay runakunaman urmayamunqa.

6 Ari, ancha hatun wañuymi kay runakunata suyan, cheqaqtapunitaq kay runakunaman hamunqa; manataq imapas kay runakunata qespichiyta atinmanchu, ichaqa, yuyayman kutirimuy, Wiraqocha Jesucristopi iñiyllapiwan; Paytaq cheqaqtapuni kay pachaman hamunqa, askha imaymanakunatataq Pay ñak’arinqa, llaqtanraykutaq wañuchisqa kanqa.

7 Wiraqochaq huk angelninmi chayta willawarqan, ancha sumaq willaykunatataq nunayman apamuwarqan. Qankunamanpas kay willanaypaqmi kachamusqa karqani, sumaq willaykunayoq kanaykichispaq; ichaqa manan chaskiwayta munarqankichischu.

8 Chhaynaqa, khaynatan Wiraqocha nin: Nephitakunaq rumiyasqa sonqonkurayku, yuyayninkuman mana kutirimunqakuchu chayqa, rimayniyta paykuna puramanta horqosaq, Nunaytataq paykunamanta hitirichisaq, manañataq astawan paykunata awantasaqchu, wawqenkunaq sonqonkutataq paykuna kontra kutirichisaq.

9 Manaraq tawa pachak wata pasashaqtintaq paykunata k’irisaq; ari, q’anchinawan, yarqaywan, phawaq onqoykunapiwan paykunamanta watukusaq.

10 Ari, ancha millay phiñarikuyniypin paykunamanta watukusaq, awqaykichiskunamanta tawakaq miraymantataq runakuna kawsanqaku lliwtapuni qolluchisqa kanaykichista rikunankupaq. Cheqaqtapunin kay kanqa, yuyayniykichisman mana kutirimunkichischu chayqa, nispan Wiraqocha nin. Tawakaq miraymantataq wañuchisqa kanaykichismanta watukunqaku.

11 Ichaqa, yuyayniykichisman kutirimuspa Wiraqocha Yayaykichisman kutirimunkichis chayqa, phiñarikuyniytan kutirichisaq, nispan Wiraqocha nin; ari, khaynatan Wiraqocha nin: Saminchasqan kanku yuyayninkuman kutirimuspa noqaman kutirimuqkuna; ichaqa, ay yuyayninkuman mana kutirimuqkunamanta.

12 Ari, ay kay ancha hatun Zarahemla llaqtamanta. Chanin kaqkunaraykun qespichisqa kay llaqtaqa; ari, ay kay ancha hatun llaqtamanta, nispan Wiraqocha nin, ari, rikushanin kay hatun llaqtamanta aswan askhan runankuna noqa kontra sonqonkuta rumiyachinankuta, nispan Wiraqocha nin.

13 Ichaqa, saminchasqan kanku yuyaninkuman kutirimuqkuna, paykunatan amachasaq. Ichaqa, kay ancha hatun llaqtapi chaninkuna mana kankumanchu chayqa, hanaqpachamantan ninata urayachimuyman kay llaqtata qolluchinaypaq.

14 Ichaqa, chaninkunaraykun hark’asqa. Ichaqa, hamushanmi pacha, chaninkunata qankuna puramanta qarqonaykichispaq, hinamantaq wañuchisqa kanaykichispaq poqosqaña kankichis; ari, ay kay ancha hatun llaqtamanta, millay ruwaykuna, millay-millanakunapiwan chaypi kasqanrayku.

15 Ari, ay Gideon llaqtamanta, chaypi kaq millay ruwaykunarayku millay-millanakunarayku ima.

16 Ari, ay muyureqnintin hallp’api kaq nefitakunaq hap’isqanku llaqtakunamanta, millay ruwaykuna millay-millanakunapiwan chaykunapi kasqanrayku.

17 Huk ñakaymi hallp’aman hamunqa, ninmi Awqasuyukunaq Wiraqochan, kay hallp’api kaq runakunarayku, ari, millay ruwayninkunarayku millay-millanankunapiwanrayku.

18 Hinataqmi kanqa, ninmi Awqasuyukunaq Wiraqochan, ari, ancha hatun cheqaq Yayanchis; panpapi qhapaqyaykuna llapa pakaqkunaqa, manañan astawan chayta tarinqakuchu, hallp’api ancha hatun ñakayrayku, chanin runa kaspa Wiraqochapaq mana pakaqtinkuqa.

19 Noqapaq qhapaqyayninkunata pakanankutan ruwasaq, nispan Wiraqocha nin; ñakasqataq kanqaku mana noqapaq qhapaqyayninkuna pakaqkuna; manan pipas noqapaq qhapaqyayninkunata pakankuchu, ichaqa, chaninkunalla. Noqapaq qhapaqyayninkuna mana pakaqtaq ñakasqa kanqa paypas qhapaqyayninpas, manataq pipas chayta tarinqachu hallp’api ñakay kasqanrayku.

20 Chayamunqataqmi p’unchaw, qhapaqyayninkunapi sonqonkuta churasqankurayku, qhapaqyayninkunata pakanankupaq. Qhapaqyayninkunapi sonqonkuta churasqankuraykutaq qhapaqyayninkunata pakasaq, awqankunamanta ayqekuqtinku. Noqapaq mana pakasqankuraykutaq, paykunapas qhapaqyayninkupas ñakasqa kanqaku; haqay p’unchawpitaq maqasqa kanqaku, nispan Wiraqocha nin.

21 Kay ancha hatun llaqtaq runankuna, uyariychis rimayniykunata; ari, uyariychis Wiraqochaq nisqan simikunata; kaytan Pay nin: qhapaqyayniykichiskunaraykun ñakasqa kankichis, qhapaqyayniykichispas ñakasqan, chaykunapi sonqoykichista churasqaykichisrayku, chaykuna qosoqniykichispa rimayninkunata mana uyarisqaykichisraykupiwan.

22 Manan Wiraqocha Yayaykichista yuyarinkichischu saminchasqasuykichis imaymanakunapi; ichaqa, pasaqllan qhapaqyayniykichiskunata yuyarinkichis, manataq chaykunarayku Wiraqocha Yayaykichista añaychayta yuyarinkichischu. Ari, manan sonqoykichis Wiraqochaman achhuyunchu, ichaqa ancha hatun anchayaypi alabakuypi, ancha hatun puynkiriypi, munapakuypi, churanakuypi, millay yuyaypi, qatikachaypi, runa wañuchiykunapi, imaymana millay ruwaykunapi iman punkirin.

23 Kayraykun huk ñakayta Wiraqocha Yaya kay hallp’amanpas qhapaqyayniykichiskunamanpas kachamurqan, millay ruwayniykichiskunarayku.

24 Ari, ay kay llaqtamanta, kay chayamusqan pacharayku. Unanchaqkunatan qarqonkichis, paykunamanta asikunkichis, rumikunata paykunaman chanqankichis, wañuchinkichis, imaymana millaykunatataq paykunaman ruwankichis, ñawpa pachakunapi runakuna ruwasqankuta hinapuni.

25 Kunantaq rimaqtiykichis ninkichis: P’unchawninchiskuna ñawpa taytanchiskunaq p’unchawninkunapi kanman karqan chayqa, manan unanchaqkunata sipiswanchu karqan, manan rumichaswanchu karqan, qarqoswanchu karqan, nispa.

26 Ichaqa, paykunamanta aswan millaymi qankuna kankichis; Wiraqochachu kawsan chhaynan, huk unanchaq qankuna puraman hamuspa Wiraqochaq rimayninkunata willasunkichis, chaytaq huchaykichiskunamanta, millay ruwayniykichismantawan sut’inchan chayqa, paywanmi phiñarikunkichis, qarqonkichis ima, wañuchinaykichispaqtaq imaymanata mashkankichis; ari, manacheqaq unanchaqmi pay, huchallikuqmi, saqramantan, nispa ninkichis, ruwayniykichis millay kasqanta sut’inchasqanrayku.

27 Ichaqa, huk runa qankunaman hamunman, hinaspataq: Kayta ruwaychis, manan huchachu; haqayta ruwaychis manataqmi ñak’arinkichischu; ari, paymi ninqa: Sonqoykichispa anchayayninpi puriychis; ari, ñawiykichispa anchayayninpi puriychis, sonqoykichispa ima munasqantataq ruwaychis, nispa qankunaman huk runa hamuspa kayta ninman chayqa, paytan chaskinkichis, unanchaqmi pay nispataq ninkichis.

28 Ari, hatunyachinkichismi, kapusoqniykichismantataq payman qonkichis; qoriykichismanta, qolqeykichismantawanmi payman qonkichis, ancha chaninniyoq p’achawantaq payta p’achankichis. Qankunaman mishk’i simikunata rimariqtin, llapanpas allillanmi nisqanraykupiwantaq mana ima huchatapas paypi tarinkichischu.

29 O huchasapa waqllisqa runakuna; ch’ilayasqa k’ullu umayoq runakuna, hayk’a pacha Wiraqocha awantanasuykichistan yuyankichis?. Ari, hayk’a pachan kacharinkichis, mana allin yuyayniyoq pusaqkuna, ñawsa pusaqkunapiwan pusanasuykichista? Ari, hayk’a pachan tutayaqta akllankichis k’anchay akllanaykichismanta?

30 Rawrarichisqañan Wiraqochaq phiñarikuynin qankuna kontra kashan, millay ruwayniykichiskunaraykun hallp’ata Pay ñakarqan.

31 Hamushanñan pacha, qhapaqyayniykichiskunata ñakananpaq, llusk’a kaqtin mana hap’iyta atinkichispaq; wakcha kayniykichis p’unchawkunapitaq mana qhepachiyta atinkichischu.

32 Wakcha kayniykichis p’unchawkunapitaq Wiraqochata waqyankichis, yanqapaqtaq Payta waqyankichis, hamunñataq qankuna pataman qollunaykichis p’unchaw chayqa, qollunaykichistaq sut’ipuniña kapun. Chay p’unchawpitaq waqankichis, qaparqachankichis ima, nispan Awqasuyukunaq Wiraqochan nin. Chaytaq waqankichis khaynatataq ninkichis:

33 Yuyayniyman kutirimuyman karqan, amataq unanchaqkunata wañuchiymanchu, rumichaymanchu, qarqoymanchu karqan, nispa. Ari, chay p’unchawpin ninkichis: Wiraqocha Yayanchismanta yuyariswan karqan, qhapaqyayninchiskuna qowasqanchis p’unchawpi, hinataq, manan llushk’achu qhapaqyayninchiskuna wakinman karqan chinkachinanchispaq; noqanchismantan qhapaqyaynichiskuna ayqen.

34 Kaypin ruwananchiskunata churarqanchis, tutamantanpitaq mana kapunchu; q’anchinanchispas noqanchismanta qechusqan kapun, awqanakunanchispaq mashkasqanchis p’unchawpi.

35 Ari, qhapaqyayninchiskunata pakarqanchis, noqanchismantataq llushk’arparirqan, hallp’a ñakasqa kasqanrayku.

36 Yuyayninchisman kutirimuswan karqan, noqanchisman Wiraqochaq rimaynin hamuwasqanchis p’unchawpi. Ñakasqan hallp’a, llapan imaymanakunataq llusk’ayan, manataq hap’iyta atinchischu.

37 Saqrakunaq muyurisqanmi kanchis; ari, nunanchis qolluchiy munaqpa angelninkunawan muyurisqan kanchis. Ancha hatunmi millay ruwayniykichiskuna. O Wiraqocha, manachu phiñakuyniykita noqaykumanta kutirichiyta atiwaq? nispa. Kaymi rimayniykichis kanqa haqay p’unchawkunapi.

38 Probakunaykichis p’unchawkunaqa ñan tukukunña; sayachirqankichismi qespinaykichis p’unchawta, wiñay-wiñaypaq sinchi tardi kanankama, qollunaykichistaq cheqaqpuni ruwasqa. Ari, mana aypay atinaykichistan kawsayniykichispa llapan p’unchawninkuna mashkarqankichis; millay kaqta ruwaspan kusikuyta mashkarqankichis; chaytaq, ancha hatun Wiñay Umanchispi kaq chaninchaynin kontra.

39 Kay hallp’aq runankuna, rimayniykuna uyariy munaqkuna! Wiraqochaq phiñarikuynin qankunamanta kutirinantan mañakuni, yuyayniykichisman kutirispa qespichisqa kanaykichispaq.