1 Kunantaq nisaykichis ancha munasqay wawqeykuna—yuyayniykichisman mana kutirimunkichischu chayqa, ch’inmi wasiykichis saqesqa kapusunkichis.

2 Ari, yuyayniykichisman mana kutirimunkichischu chayqa, warmiykichismi hatun rasunniyoq waqanankupaq kanqaku, erqenkuta ñuñuchinanku p’unchawpi; ayqeytan munankichis, manataq maypi pakakunapaq kanqachu; ari, ay wiksayoqkunamanta, llasa kaspankun mana ayqeyta atinqakuchu, chayraykutaq sarukachasqa kanqaku, wañunankupaqtaq saqesqa kanqaku.

3 Ari, ay kay runakunamanta, Nephiq llaqtan nispa waqyasqa kaqkunamanta, kay señalkunata, ancha utirayana imaymanakunatawan paykunaman qhawachisqa kaqtin yuyayninkuman mana kutirimuqtinkuqa. Wiraqochaq akllasqan llaqtan karqanku, ari, Nephiq llaqtantan Pay munakurqan, paykunatataq anyakurqan; ari, millay ruwayninkuna p’unchawkunapin paykunata Pay anyarqan paykunata munakusqanrayku.

4 Ichaqa wawqeykuna, lamanitakunatan Pay cheqnikurqan pasaqllapuni ruwayninku millay kaqtin; kaytaq, taytankuq kustumbrenku millay kasqanrayku. Ichaqa, qespiymi paykunaman hamurqan, nefitakunaq yachachiyninkuwan; kayraykutaq p’unchawninkuta Wiraqocha hatunyachirqan.

5 Paykunamanta aswan askhannin ima ruwanankuq ñanninpi kasqankuta rikunaykichistan munayman, qhawarikuspankutaq Yayaq ñawpaqenpi purinku, kamachiyninkunata, yuyaqankunata, taripayninkunatawantaq waqaychanku Moisespa kamachisqa-siminman hina.

6 Ari, paykunamanta aswan askha runakunan kayta ruwashanku niykichismi; mana sayk’uq k’uchi kaywantaq llank’ashanku puchuq wawqenkunata cheqaq yachayman apamunankupaq; chhaynaqa, askhan sapa p’unchaw paykunaman huñunakunku.

7 Qankuna kikiykichismantataq yachankichis, rikurqankichistaq chayqa, cheqaq kaq yachayman, taytankuq kostumbrenkuq millay ruwayninku millay millananku yachaymanwan apamusqa kaqkunaqa, qollanan qelqakunapi kreyiyman pusasqapiwan kaqkunaqa, ari, qollanan unanchaqkunaq unanchayninkuna kreyiyman, kaytaq paykunata pusan Wiraqochapi iñiyman, yuyayman kutirimuymanwan; chay iñiy, yuyayman kutirumuypiwantaq paykunaman sonqopi t’irakuyta apamun—

8 Chhaynaqa, yachankichismi qankuna kikiykichismanta, kayman llapa hamuqkuna, iñiypi, imawan qespi ruwasqa kasqankupiwan, qaqa mana kuyoq kasqankuta.

9 Yachankichistaqmi, awqanakunapaq maqanakunata p’anpasqankuta, manchakunkutaqmi chay maqanakuna hap’iyta, imaynapipas huchallikunankumanta; ari, rikuwaqchismi huchallikuy manchakusqankuta; awqankuq sarukachasqan, wañuchisqa ima kanankutan saqenku, manataq q’anchinankunata paykuna kontra hoqarinqakuchu; kaytaq Cristopi iñiyninkurayku.

10 Chay kreyisqankupi kreyiyninku mana-kuyoq kasqankurayku, k’ancharisqa kaqtinku mana-kuyuriq kasqankuraykupuwantaq paykunata Wiraqocha saminchanqa, p’unchawninkunatataq hatunyarichinqa, millay ruwayniyoqña kanku chaypas.

11 Ari, mana kreyiypiña urmanqaku chaypas, p’unchawninkunatan Wiraqocha hatunyachinqa, wawqenchis lamanitakuna yapamanta cheqaq yachayman apamusqa kanankumanta taytanchiskunaq, unanchaq Zenospa, huk askha unanchaqkunapiwan rimasqanku p’unchawkuna hamunankama.

12 Ari, nisaykichismi—qhepa p’unchawkunapin Wiraqochaq promesankuna wawqenchis lamanitakunaman haywarisqa karqan, askha ñak’ariyniyoqña kanqachu chaypas, hallp’a patapiña kayman haqayman qatikachasqa, wañuchisqa, k’irisqa, ch’eqechisqapiwanmi kanqaku, maypi pakakunankupaq mana kaspa chaypas, khuyakuyniyoqmi paykunawan Wiraqocha kanqa.

13 Kaytaq unanchaykunaman hina, cheqaq yachayman apamusqa kanqaku, kaytaq Kutichikapuqninku ancha hatun cheqaq micheqninkumanta yachay, owejankunawantaq yupasqa kanqaku.

14 Chhaynaqa niykichismi, aswan allinmi paykunapaq kanqa qankunamantaqa, yuyayniykichisman mana kutirimunkichischu chayqa.

15 Qankunaman ancha hatun qhawachisqa ruwaykuna paykunaman qhawachisqa kanman karqan chayqa, ari, taytankuq kostumbrenkurayku mana-kreyiypi urmaqkunaman qhawachisqa kanman karqan chayqa—qankuna kikiykichismantan rikuyta atiwaqchis—manan hayk’aqpas yapamanta mana-kreyiypi urmankumanchu karqan.

16 Chhaynaqa, khaynatan Wiraqocha nin: Manan lliwtapunichu paykunata qolluchisaq, ichaqa yachaysapa kayniy p’unchawniypin paykunata yapamanta noqaman kutirichimusaq, nispan Wiraqocha nin.

17 Kunantaq nefitakunamanta Wiraqocha nin: Yuyayninkuman mana kutirimunqakuchu manataq munayniytachu ruwanqaku chayqa, lliwtapunin paykunata qolluchisaq, ninmi Wiraqocha, mana-kreyiyninkurayku, paykuna chawpipi ancha hatun ruwaykunataña ruwarqani chaypas; cheqaqtapunin Wiraqochaq kawsasqanta hina kay imaymanakuna kanqa, ninmi Wiraqocha.