1 Askhan uyarirqanku, llaqtaq perqan patapi Lamanita Samuelpa rimasqan rimaykunata. Siminkunapi llapan kreyiqkunataq Nephi mashkaq rirqanku; payta tarispankutaq payman huchankunata willarqanku mana mananchaspanku, Wiraqochapi unuchakuyta munaspanku.

2 Ichaqa, Samuel mana kreyiqkunaqa paywanmi phiñarikurqanku; rumikunatataq payman perqa patapi ch’aqerqanku; perqapi sayashaqtintaq askha runakuna payta wach’irqanku; ichaqa, Wiraqochaq Nunanmi paywan karqan, chayraykutaq mana payta ruminkunawan nitaq wach’inkunawanpas hap’ichiyta atirqankuchu.

3 Payta mana hap’ichiyta atisqankuta rikuspataq, askha runakuna rimayninkunapi kreyiqkuna karqan, hinataq Nephiman rirqanku unuchasqa kanankupaq.

4 Nephitaq unucharqan, unancharqan, yachachirqanpiwan; runakunaman yuyayninkuman kutirimuyta qaparispa, señalkunata, utirayaykunatawan qhawachispa, runakuna purapi milagrokunata ruwaspa, asllaman Cristo hamunanta yachanankupaq;

5 Asllaman hamunan imaymanakunata paykunaman nispa; chay imaymanakunaq hamusqan pachapi, ñawpaqtaraq paykunaman yachachisqa kasqanta yachanankupaq, yuyarinankupaqwan, chaywan kreyinankupaq. Chhaynataq Samuelpa rimayninkunapi kreyiqkuna Nephiman rirqanku, unuchasqa kanankupaq yuyayninkuman kutirimuspa, huchankunata willaspa ima.

6 Ichaqa paykunamanta aswan askha kaqkunaqa, manan Samuelpa siminkunapi kreyirqankuchu; chhaynataq, ruminkunawan wach’inkunapiwan payta mana hap’ichiyta atisqankuta rikuspa, khaynata apunkunaman qaparirqanku: Kay runata hap’ispa chaqnamuychis, saqrayoqmi; paypi kaq saqraq atiyninraykun mana ruminchiskunawan, wach’inchiskunapiwan hap’ichiyta atinchischu; chhaynaqa, hap’ispa payta chaqnamuychis, wañuchimuychistaq, nispa.

7 Payta hap’imunankupaq reqtinkutaq, perqamanta p’itaykuspa hallp’ankumanta ayqekurqan, ari, hallp’anman; kikin llaqtan purapi unanchaytataq qallarirqan.

8 Manañataq hayk’aqpas nefitakuna purapi paymanta uyarikurqanchu. Khaynan runakunaq ruwayninkuna karqan.

9 Khaynatataq tukukurqan Nephiq llaqtanpi taripaqkunaq kamachiyninkuq pusaq chunka soqtayoq wata.

10 Khaynallatataqmi tukukurqan taripaqkunaq kamachiyninkuq pusaq chunka qanchisniyoq watapas; runakunamanta aswan askha kaqkunataq anchayayninkupi, millay ruwayninkupiwan qheparqanku; aswan pisi kaqtaq Yayaq ñawpaqenpi qhawarikuspa purirqanku.

11 Khaynallataqmi karqan, taripaqkunaq kamachiyninkuq pusaq chunka pusaqniyoq watapipas.

12 Taripaqkunaq kamachiyninkuq pusaq chunka esqonniyoq watapipas huk chikallantan kambiyarqan runakunaq ruwayninkuna; aswantan runakuna millay ruwayninkupi rumiyarqanku, astawan astawanraqtaq ruwarqanku Yayaq kamachiynninkuna kontra kaqta.

13 Hinataq taripaqkunaq kamachiyninkuq esqon chunka watapi, ancha hatun señalkuna, utirayanakuna ima runakunaman qhawachisqa karqan, unanchaqkunaq rimayninkunataq hunt’akuyta qallarirqan.

14 Angeltaq runakunaman rikhurimurqan, yachaysapa runakunaman, ancha hatun kusikuy sumaq willaykunatataq paykunaman willarqanku. Khaynatan kay watapi qelqakuna hut’asqa kayta qallarirqan.

15 Chaypiwanpas, sonqonku rumiyachiytan runakuna qallarirqanku, llapankupuni nefitakunamanta lamanitakunamantawan, aswan iñeqkunallataq mana—paykuna kikinkuq kallpankupi, yachayninkupi ima samariyta qallarispanku, khaynata nispanku:

16 Chhayna askha imaymanakunamantaqa wakinninta watunkumanmi karqan; ichaqa, yachanchismi rimarisqa kaq kay ancha hatun sumaq ruwaykuna mana kananta, nispa.

17 Paykuna purataq khaynata nispanku rimanakuyta churanakuytawan qallarirqanku:

18 Manan rasunchu Cristo hina runa hamunan; chhayna kaqtinqa, Yayaq Churintaq kanman, rimakusqanman hinataq hanaqpachaq kay pachaqpiwan Taytan kan chayri, imanaqtintaq mana noqanchiswan qhawachikunqachu, Jerusalenpi runakunawan hinari?

19 Ari, imanaqtinmi Pay mana kay hallp’api qhawachikunqachu, Jerusalen hallp’pi hinari?

20 Ichaqa, yachanchismi millay kreyiy kay kasqanta, taytanchiskunamanta noqanchisman haywasqa, hamunan ancha hatun ancha sumapi kreyichiwananchispaq; mana noqanchis purapichu, ichaqa, noqanchismanta kharupi kaq mana reqsisqanchis hallp’api; chhaynataq, mana ima yachaypi kachiwananchispaq; cheqaq kasqankumanta kikin ñawinchiswan mana rikusqanchisrayku.

21 Paykunataq—saqraq atuqrayay kayninwan, mana pakasqa ruwayninkunapiwan ruwanqaku mana hamut’ay atinanchis ancha hatun pakasqa imaymanakunata; chaytaq kachiwasunchis rimayninkunaman warmanku kananchispaq, paykunaq warmanku kananchispaqwan, chay rimayta yachachiwananchispaq paykunamanta suyasqanchisrayku. Khaynatataq mana-ima-yachaypi kachiwasunchis, paykunaman kawsayninchispa llapan p’unchawninkuna haywakuswan chayqa, nispa.

22 Huk askha waq’a, yanqapaqwan imaymanakunatawanmi sonqonkupi runakuna yuyarqanku. Mana qasillataq karqanku, pasaqllataq paykunata saqra inkitarqan millay kaqta ruwanankupaq, ari, rimaykunata, churanakuykunatawan hallp’antinpi mast’arispan saqra rirqan, runakunaq sonqonkuta allin kaq kontra, hamuq kontrapiwan rumiyachinanpa.

23 Wiraqochaq runankuna chawpipi señalkunataña, ancha hatun imaymanakunataña, askha milagrokunatawanña paykuna ruwarqanku chaypas, hallp’antinpi runakunaq sonqonkumantan allintapuni saqra hap’ipakurqan.

24 Khaynatataq tukukurqan, Nephiq llaqtanpi taripaqkunaq kamachiyninkuq esqon chunka watan.

25 Khaynatataqmi Helamanpa qelqan tukukurqan; Helamanpa, churinkunaqpa ima qelqankuman hina.