1 Hinataq, isqon chunka hukniyoq wata tukukurqan, soqta pachak watataq karqan Jerusalenmanta Lehi lloqsimusqan pachamanta. Kay watapitaq Lachoneus hallp’api hatun taripaq kamachikuqpiwan karqan.

2 Helamanpa churin Nephitaq, Zarahemla hallp’amanta ripurqan, kurak churin Nephimantaq bronse raphikunata qorqan, waqaychasqa kasqan qelqakunatawan, Jerusalenmanta Lehi lloqsimusqanmantapacha qollanan waqaychasqa imaymanakunatawan.

3 Chay patamantaq kay hallp’amanta ripurqan, manataq pipas yachanchu mayman risqanta; churin Nephitaq paypa rantinta qelqakunata waqaycharqan, ari, kay runakunaq qelqankunata.

4 Hinataq, isqon chunka ishkayniyoq watapi, aswantapuni unanchaqkunaq unanchayninkuna hunt’akuyta qallarirqan; aswan hatun señalkuna aswan hatun milagrokunapiwan runakuna purapi ruwasqa kaspa.

5 Ichaqa, karqanmi huk runakuna, Lamanita Samuelpa rimayninkuna hunt’akunanpaqqa tukukunñan pacha, nispa niqkuna.

6 Wawqenkunamantataq asikuyta qallarirqanku: Tukukunñan pacha, Samuelpa rimayninkunataq mana hunt’akunchu; chhaynaqa, kay imaymanakunamanta kusikuyniykichis, iñiyniykichispiwanqa yanqapaqmi karqan, nispa.

7 Hinataq, hallp’antinpi ancha hatun ch’aqwaytta hatarichirqanku; iñiq runakunataq anchatapuni llakikurqanku, imaynapas chay rimasqa kasqan imaymanakuna mana hunt’akunmanchu, nispa.

8 Ichaqa, mana kuyuqmi huk p’unchaw hinalla mana tutayoq kanan chay p’unchawta, chay tutata, chay p’unchawtawan suyarqanku, iñiyninku mana yanqapaqchu kasqanta yachanankupaq.

9 Hinataq, mana kreyiqkuna huk p’unchawta sapaqcharqanku, unanchaq Samuelpa qosqan señalkuna mana hunt’akunmanchu chayqa, chay imaymanakunapi kreyiqkuna wañuchisqa kanankupaq.

10 Nephiq churin Nephiq sonqontaq anchatapuni llakikurqan, runankunaq millay ruwayninkuta rikuspa.

11 Hinataq lloqsispa hallp’a patapi k’umurikurqan, tukuy atiyninwantaq Yayanta llaqtanrayku waqyakurqan; ari, taytankuq kostumbrenkunapi iñisqankurayku yaqaña wañuchisqa kaq runakunarayku.

12 P’unchawnintintaq Wiraqochata llapan kallpanwan waqyarqan; Wiraqochaq aruntaq khaynata payman hamurqan:

13 Hoqariy umaykita kusirikuytaq; sispallapiñan pacha kashan, kunan tutapitaq señal qosqa kanqa, tutamantanpitaq kay pachaman hamusaq, qollanan unanchaqkunaq siminkuwan llapan rimachisqay hunt’anayta llapan runakunaman qhawachinaypaq.

14 Noqaq kaqkunamanmi hamuni, pachaq kamasqa kasqanmantapacha, runakunaq wawankunaman yachachisqay llapan imaymanakunata hunt’anaypaq; Taytaq munayninta, Churiq munaynintawan ruwanaypaq—Taytamantaqa noqarayku, Churimantataq aychayrayku. Sispallapiñan pacha kashan, kunan tutataq señal qosqa kanqa, nispa.

15 Hinataq Nephiman hamusqan rimaykuna hunt’akurqan, rimasqa kasqanman hina; intiq haykuynin pachapitaq mana tutayaq karqanchu; runakunataq utirayayta qallarirqanku, tuta hamuqtin mana laqhayaq kasqanrayku.

16 Askha runakunataq karqan, unanchaqkunaq rimayninkunata ñawpaqta mana kreyiqkuna, panpamantaq paykuna urmarqanku wañusqapas kankuman hina; yacharqankun paykuna, unanchaqkunaq rimayninkunapi kreyiqkunapaq allichasqanku wañuchiy waqllisqanta, señalkunataq qosqa karqan chayqa.

17 Ashllaman Yayaq Churin rikhurimunantataq yachayta qallarirqanku; ari, huk rimaypiqa, lliw hallp’antinpi, intiq haykunanmanta intiq lloqsimunankama, qayllarina hallp’apipas, qheparina hallp’apipas runakunaqa, anchatapunin utirayarqanku, panpamantaq urmarqanku.

18 Yacharqankun kay imaymanakunamanta askha watakuna unanchaqkuna sut’inchasqankuta, qosqanku señalkuna sispallapiña kasqantawan. Millay ruwayninkurayku, mana kreyiyninkurayku imataq manchakuyta qallarirqanku.

19 Hinataq mana laqhayay karqanchu chay tukuy tutantin, ichaqa chawpi p’unchaw hina k’anchayniyoqmi karqan. Pacha paqariqtintaq yapamanta inti lloqsimurqan imayna kananta hina; yacharqankutaqmi chay p’unchawpi Wiraqocha paqarisqanta, señal qosqa kasqanrayku.

20 Hinataq karqan, ari, llapan imaymanakuna, sapanka rimaykuna, unanchaqkunaq rimayninkuman hina.

21 Huk mosoq qoyllurpas rikhurimurqanmi, rimaykunaman hina.

22 Kunan p’unchawmantapachataq, runakuna puraman llullakuykuna sarqaq apachisqan karqan, sonqonkuta rumiyachinankupaq, rikusqanku señalkunata, ancha hatun utirayaykunatawan mana kreyinankupaq; ichaqa, kay llullakuykunaña, yukaykunapiwanña karqan chaypas, runakunamanta aswan askhanmi kreyirqanku, Wiraqochamantaq t’ikrakurqanku.

23 Hinataq, runakuna chawpinta Nephi huk runakunapiwan rirqanku, yuyayman kutirimuyman unuchaspanku; chaypitaq huchakunapaq ancha hatun panpachay karqan. Chhaynataq yapamanta qasi kawsayniyoq runakuna karqanku.

24 Manataq ima maqanakuypas karqanchu, ichaqa, huk chikan runakunallan qelqakunawan sut’inchaspa yachachiyta qallarirqanku—manañan Moisespa kamachisqa-simin waqaychay nesitakunñachu nispa. Kaypiqa pantarqankun, qelqakunata mana hamut’asqankurayku.

25 Ichaqa asllamanmi wakichisqa paykuna karqanku, pantasqa kasqankumantataq konbensikurqanku; paykunaman yachachisqataq karqan kamachisqa-simi manaraq hunt’asqa kasqanmanta, sapanka rimaypi hunt’akunanmanta; ari, hunt’asqa kananmantan paykunaman simi hamurqan; ari, manan huk ch’iñillanpas utaq seq’ellanpas chinkananchu llapan hunt’akunankama. Chhaynataq chay kikin watapi pantayninku yachayman apamusqa karqanku, huchankutataq willarqanku.

26 Khaynatataq tukukurqan isqon chunka ishkayniyoq wata; runakunaman sumaq willaykunata apamuspa, kasqan señalkunarayku, llapan qollanan unanchaqkunaq unanchayninkuq rimayninkunaman hina.

27 Hinataq, isqon chunka kinsayoq watapas qasi kawsayllapi pasarqan. Orqokunapi tiyaq Gadiantonpa suwankunallataq hallp’api hunyarqanku; ancha kallpasapa hap’iyninku, maypi pakasqa kanankupiwan kaqtintaq runakunaqa mana paykunata atipayta atirqankuchu. Chhaynataq paykunaqa askha runa wañuchiykunata ruwarqanku, askhatataq runakuna purapi wañuchirqanku.

28 Hinataq, isqon chunka tawayoq watapi anchatapuni yapakuyta qallarirqanku, nefitakunamanta t’aqakuqkuna paykunaman ayqekuqkunarayku; kaytaq anchatapuni hallp’api qhepaq nefitakunata iiakichirqan.

29 Kallarqantaqmi lamanitakuna purapipas askha llakikuypaq; askhan wawankuna karqan, wiñaspankutaq watakunapi kallpasapa kayta qallarirqanku, sapallankumanta wakispanku; Gadiantonpa suwankunaman huñunakunankupaqtaq llullakuyninkuwan, mishk’i rimayninkupiwan zoramita kaqkunaq waqllichisqan karqanku.

30 Khaynatataq lamanitakunapas muchuchisqa karqanku; iñiyninkupi, chanin kayninkupiwantaq pishiyayta qallarirqanku, wiñaq miraypa millay ruwayninkurayku.