1 Hinataq, runakunata yachachisqankunatawan kamachirqan, manaña yayaman-rimarikunankupaq. Kamachillarqantaqmi, sonqonkupi yayaman-rimarikuyta mana samanankupaq.

2 Paykunatataq kamachirqan hatirispa sayarinankupaq. Paykunataq hatarispanku sayarirqanku.

3 Hinataq, yapamata t’antata phatmirqan samincharqan ima, yachachisqankunamantaq mikhunankupaq qorqan.

4 Paykuna mikhuqtinkutaq, paykunta kamachirqan t’antata phatmispa runakunaman qonankupaq.

5 Runakunaman qoqtinkutaq, vinotapas paykunaman ukyanankupaq qorqan; runakunaman qonankupaqtaq kamachirqan.

6 Kunanqa, manan t’antapas ni vinopas yachachisqakunaq ni runakunaq apamusqanchu karqan;

7 Ichaqa, cheqaqtapunin t’antata mikhunankupaq, vinotapas ukyanankupaq paykunaman qorqan.

8 Paykunatataq nirqan: Kay t’anta mikhuqqa, runa-kurkuymantan nunanpaq mikhun; kay vinomanta ukyaqtaq yawarniymanta nunanpaq ukyan; nunantaq mana hayk’aqpas yarqayniyoqchu ni ch’akichikuyniyoqchu kanqa, ichaqa hunt’asqan kanqa, nispa.

9 Kunantaq, runakunaqa mikhuqtinku ukyaqtinkupiwan, nunawan hunt’a karqanku, huk arullapitaq qaparirqanku, rikusqanku uyarisqankupiwan Jesustataq yupaycharqanku.

10 Hinataq, llapanku Jesusman kusiqellputa qoqtinku, paykunaman Pay nirqan: Kunanqa tukunin Israelpa wasinmanta kaq kay runakunamanta Taytaq kamachiwasqan kamachita.

11 Yuyarinkichismi qankunaman rimarisqayta, nirqanitaq: Isaiaspa rimayninkuna hunt’akuqtin—qhawariychis qelqasqan kashan, ñawpaqeykichispin kashan, hinaqa, chaykunata t’aqwiychis—

12 Cheqaqta cheqaqtapunin niykichis, chaykuna hunt’akuqtinqa, chaymi llaqtanman Taytaq rimanakuyninpa hunt’akuynin, O Israelpa wasin.

13 Chaymantaq, hallp’a patapi ch’eqechisqa kanan puchukuna huñusqa kanqaku intiq lloqsimunan kinraymanta, intiq haykunan kinraymanta, qheparinamanta, qayllarinamantawan; paykuna kutichikapuq Wiraqocha Yayanku reqsiyman apamusqataq kanqaku.

14 Taytataq kamachimuwarqan, chaskikuyniykichispaq kay hallp’ata qankunaman qonaypaq.

15 Nisaykichistaq, llaqtayta ch’eqechisqanku pataman, saminchaykunata chaskinanku pataman ima mana hawarunakuna yuyayninkuman kutirimunqakuchu chayqa—

16 Chaymi qankuna, Jakobpa wasinpa puchun kaqkuna, paykuna chawpinta rinkichis; askhapuni paykuna chawpinkupitaq kankichis; sach’a-sach’api uywakuna chawpipi puma hinataq kankichis; ovejakuna chawpipi malta puma hina, chay pumantaq chawpinta rispa sarukachan llik’intaq, manataq pipas hark’ayta atinmanchu.

17 Awqaykikuna patamanmi makiyki hoqarispa kanqa, llapan awqaykikunataq wit’usqa kanqaku.

18 Llaqtaytataq huñusaq, panpapi choqonkunata runa huñusqanta hina.

19 Taytaq rimanakusqan llaqtaytataq ruwasaq, ari, killaymantan waqraykita ruwasaq, bronsemantataq chaki-silluykita. Askha llaqtakunatataq ñut’unki; usachikuyninkutataq Wiraqochapaq sapaqchasaq, kapuqninkunatataq llapan hallp’aq Wiraqochanman. Noqan chay ruwaq kani.

20 Hinataqmi, ninmi Tayta, haqay p’unchawpi chaninchayniypa q’anchinan paykuna patapi warkurayanqa, yuyayninkuman mana kutirimunqakuchu chayqa, paykuna pataman urmanqa, nispan Tayta nin, ari, hawarunakunaq llapan llaqtankunaman.

21 Hinataqmi llaqtayta hatarichisaq, O Israelpa wasin.

22 Kay runakunatataq kay hallp’api churasaq, taytaykichis Jakobwan rimanakusqayta hunt’anaypaq; mosoq Jerusalentaq kanqa. Kay runakunaq chawpinpitaq hanaqpachaq atiyninkuna kankqa, ari, noqapunipas chawpiykichispin kasaq.

23 Noqan kani Moisespa khayna rimasqan: Huk unanchaqtan Wiraqocha Yayayki hatarichinqa wawqeykichiskunamanta qankunaman, noqaman rikch’akuqta; Paytan llapan ima nisqasuykichispipas uyarinkichis. Chay unanchaqta mana uyariqkunataq runakuna chawpimanta wit’usqa kanqaku.

24 Cheqaqtapunin niykichis, ari, llapan unanchaqkunan Samuelmantapacha payman qatiqkunapiwan, llapan rimaqkuna, noqamanta sut’incharqanku.

25 Unanchaqkunaq wawankunan qankuna kankichis, Israelpa wasinmantataqmi kankichis, rimanakuymantataqmi kankichis; chaytataq taytaykichiswan Tayta ruwarqan, khaynata Abrahanman nispa: Ch’awchuykipin pachaq ayllunkuna saminchasqa kanqaku, nispa.

26 Taytataq hatarichiwarqan qankunaman ñawpaqta, qankuna saminchanaypaqtaq kachamuwarqan, millay ruwayniykichismanta sapankaykichista kutirichimunaypaq, kaytaq, rimanakuypa wawankuna kasqaykichisrayku.

27 Saminchasqa kasqaykichis patamantaq khaynata Abrahanwan rimanakusqanta Tayta hunt’anqa: Ch’awchuykipin hallp’aq tukuy ayllunkuna saminchasqa kanqaku nisqanta—Noqa ukhunta hawarunakunaman Qollanan Nunata hich’arimuspa; hawarunakuna pataman chay saminchaytaq llapan runakuna patapi aswan kallpasapata paykunata ruwanqa, llaqtayta ch’eqechinankupaq, O Israelpa wasin.

28 Kay hallp’aq runankunaman hasut’itaq paykuna kanqaku. Chaypiwanpas, yachachiyniypa hunt’ayninta chaskisqanku pataman noqa kontra sonqonkuta rumiyachinqaku chayqa, kikin umanku patamanmi millay ruwayninkunata kutirichisaq, nispan Tayta nin.

29 Llaqtaywan rimanakuyniytataq yuyarisaq; paykunawantaq rimanakurqani chanin pachapi paykunata huñumunaypaq, taytankuq hallp’ankuta chashkikuyninkupaq yapamanta paykunaman qonaypaq—chaytaq Jerusalen hallp’a—chaytaq paykunapaq wiñaypaq prometisqa hallp’a, ninmi Tayta.

30 Hinataq pacha hamunqa, yachachiyniypa hunt’aynin paykunaman yachachisqa kananpaq.

31 Noqapitaq kreyinqaku, Yayaq Churin Jesucristo kasqayta, sutiypitaq Taytaman rimarikunqaku.

32 Chaymi qhamiyaqninku arunkuta hoqarinqaku, kushka kunkawantaq takinqaku, ñawi pura rikusqankurayku.

33 Chaymi yapamanta paykunata Tayta huñunqa, chaskikuyninku hallp’ankupaqtaq Jerusalenta paykunaman qonqa.

34 Hinamantaq kusikuypi paykuna phanchirinqaku—Kushka takiychis Jerusalenpa purun hallp’ankuna; llaqtantan Tayta kallpacharqan, Jerusalentan kutichikapurqan.

35 Llapa llaqtakunaq ñawpaqenpin qollanan mak’anta Tayta q’alanarqan, pachaq llapan k’uchunkunataq Taytaq qespiyninta rikunqaku; Tayta noqapiwantaq huklla kayku.

36 Hinamantaq chay qelqasqa kaq ruwasqa kanqa: Rikch’ariy rikch’ariy yapamanta, kallpaykitataq churakuy O Sion; sumaq p’achaykita churakuy O Jerusalen qollanan llaqta; manañan kunanmantapacha qanman hamunqachu mana sircumsidasqa, ni qhelli kaqpas.

37 Ñut’u hallp’amanta chapchirikuy; hatariy, tiyarikuytaq O Jerusalen; kunkaykipi chaqnakunata pashkarikuy, O Sionpa hark’asqa ususin.

38 Khaynatan Wiraqocha nin: Mana chaninpaqmi vemdikurqankichis, mana ima qolqewantaq kutichikapusqa kankichis.

39 Cheqaqta cheqaqtapunin niykichis, llaqtayqa reqsinqakun sutiyta; ari, chay p’unchawpin paykuna yachanqaku noqa rimaq kasqayta, nispa.

40 Hinamantaq paykuna ninqaku: Ancha sumaqmi orqokuna patapi paykunaman sumaq willaykunata apamuqpa chakinkuna, qasi kawsay willaqkuna; allin kaqmanta paykunaman allin willaykunata apamuqkuna, qespiyta willaqkuna—Yayaykin kamachikun, nispa Sionman niqkuna.

41 Hinataq huk qapariy rinqa: Hitiriychis hitiriychis; kaymanta lloqsiychis, ama qhelli kaqta llamiychischu; paypa chawpinmanta lloqsiychis; Wiraqochaq qerunkuna apaqkuna, llunp’aq kaychis.

42 Manan llukullachu rinki, nitaq phawarispachu; Wiraqochan ñawpaqeykita rinqa, Israelpa Yayantaq qhepayki qhawaq kanqa.

43 Allin yuyaywanmi warmaykuna ruwayninkuta ruwanqaku; hatunyachisqa, yupaychasqapiwantaq ancha hanaqpi churasqa imataq Pay kanqa.

44 Qanmantachu askha runakuna utirayarqanku—llapan runamanta aswantan rikuynin qhellichasqa karqan, runa-kurkuntaq runakunaq churinkunamanta astawanraq—

45 Chhaynallatataqmi askha llaqtakunata ch’aqchurinqa; paymanmi inkakuna siminkuta wishq’anqaku, paykunaman mana willasqa kasqantataq paykuna rikunqaku, mana uyarisqankutataq yuyaykunqaku.

46 Cheqaqta cheqaqtapunin niykichis, cheqaqtapunin kay llapan imaymanakuna kanqa, Taytaq kamachiwasqan hinapuni. Chaymi llaqtanwan Taytaq rimanakusqan hunt’asqa kanqa; hinamantaq Jerusalenpi yapamanta llaqtay tiyanqa, chaskikuyninku hallp’ataq kanqa.