1 Hinataq, paykunata Pay kamachirqan, Malakiasman Taytaq qosqan rimaykunata qelqanankupaq, chayta paykunaman Pay ninanta. Qelqasqa kasqan patamantaq, chayta paykunaman hamut’achirqan. Kaytaqmi paykunaman nisqan rimaykuna: Khaynatan Malakiasman Tayta nirqan: Willaqniytan kachamusaq, ñawpaqeytataq ñanta allichanqa, mashkasqaykichis Wiraqochataq qonqayllamanta Wasinman hamunqa, Paypi kusikusqaykichis rimanakuypa willaqnintapuni; hamunqan Pay, nispan nin Awqasuyukunaq Wiraqochan.

2 Ichaqa, pin hamunan p’unchawta awantanqa, pitaq sayanqa rikhurimuqtinri? Ch’uyanchaqpa ninan hinan Pay, t’aqsaqpa ch’aqon hinan Pay.

3 Qolqe allinyachiq ch’uyanchaq hinan Pay tiyanqa; Leviq churinkunatataq ch’uyanchanqa, qorita qolqetawan hinataq paykunata maqchinqa, chaninchaypi munachiyta Wiraqochaman munachinankupaq.

4 Chaymi Judaq Jerusalenpa ima munachiyninku Wiraqochapaq sumaq kanqa, mawk’a pachakunapi hina, ñawpa watakunapi hina.

5 Taripaypaqtaq sispayniykichisman hamusaq, usqhaylla sut’inchaqtaq layqakuna, wasanchaqkuna, mana cheqaq juraqkuna ima kontrapi kasaq; mink’asqa runata chaninchayninkupi ñit’iqkuna kontra, ikmakunata, mana taytayoqkunatawan ñitiqkuna kontrapiwan; mana reqsisqa runata qarqoqkuna kontra, noqata mana manchakuq kontrapiwan, nispan Awqasuyukunaq Wiraqochan nin.

6 Noqan Wiraqocha kani, manataqmi kanbiyanichu; chhaynaqa manan ruphasqachu kankichis Jakobpa churinkuna.

7 Taytaykichiskunaq p’unchawninkumantapunin qollanan-ruwanaykunamanta hitirirqankichis, manataq chaykunata waqaycharqankichischu. Noqaman kutirimuychis, qankunamantaq noqa kutirimusaq, nispan Awqasuyukunaq Wiraqochan nin. Ichaqa, qankunaqa ninkichis—maymanmi kutirisaqku, nispa.

8 Suwakunqachu runa Yayamanta? Chaypiwanpas suwawarqankichismi. Ichaqa ninkichis: Imapin suwakurqaykiku, nispa. Chunkan t’aqapi munachikuykunapiwanmi.

9 Huk ñakaywan ñakasqan kankichis, suwawasqaykichisrayku, kay llapan llaqtantinpas.

10 Llapan chunqan t’aqata apamuychis waqaychana wasiman, wasiypi mikhuna kananpaq; kaywantaq probawaychis, manachus hanaqpachaq ventanankunata kicharimusaykichischu; huk saminchaytataq hich’arimusaykichis, maypi chayta chaskinaykichispaqtaq mana ch’usaq kanqachu.

11 Mikhukuqtataq qankunarayku anyasaq, manataq pay qolluchinqachu chakraykichispa rurunkunata, manataq uvasniykichispas chakrakunapi ruruta qonqachu manaraq ruruna uhu kashaqtinqa, ninmi Awqasuyukunaq Wiraqochan.

12 Llapan llaqtakunataq saminchasqa nispa waqyasunkichis ancha sumaq hallp’a kasqaykichisrayku, ninmi Awqasuyukunaq Wiraqochan.

13 Llasan rimayniykichis noqa kontra karqan, ninmi Wiraqocha. Chaypiwanpas ninkichismi: Imatan qan kontra rimarqayku, nispa.

14 Yanqapaqmi Yaya serviy, imapaqtaq allin kawanchis kamachiyninkuna waqaychasqanchis, Awqasuyukunaq Wiraqochanpa ñawpaqenpi khuyay purisqanchis? nispan nirqankichis.

15 Kunantaq anchayaqta kusiy-kusi nispa waqyanchis; ari, millay ruwaqkunan hatunchasqa kanku, ari, Yaya wateqaqkunapiwanpas kacharisqan kanku.

16 Chaymantaq Wiraqocha manchakuqkuna pasaqlla rimanakurqanku, Wiraqochataq uyarispa uyarirqan; huk yuyarikuna qelqataq ñawpaqenpi qelqasqa karqan Wiraqocha manchakuqkunapaq, sutinpi yuyaqkunapaq.

17 Noqaqtaqmi kanqaku, umiñaykunata ruwanay p’unchawpi, paykunatataq waqaychasaq, serviqnin churinta huk runa panpachasqanta hina, nispan Awqasuyukunaq Wiraqochan nin.

18 Chaymi kutirimuspa riqsinkichis chanin kaqkunata millay kaqkunamanta, Yaya serviqta Pay mana serviqmanta.