1 Hinataq, Jesuspa yachachisqankuna, uyarisqankuta rikusqankutawan yachachispa, Jesuspa sutinpi unuchaspa ima purishaqtinku, yachachisqakunaqa huñunaykukuspa kasharqanku, ancha hatun yayaman-rimarikuypi sasiypiwantaq hukllanakurqanku.

2 Yapamantataq paykunamanta Jesus watukamurqan, sutinpi Taytaman rimarikusqankurayku. Hamuspataq chawpinkupi Jesus sayarqan, paykunatataq nirqan: Qankunaman ima qonaytan munankichis? nispa.

3 Paykunataq Payta nirqanku: Wiraqocha, kay iñeqkuna-huñuta ima sutiwan waqyanaykuta niwanaykikutan munayku; kaymantan churanakuykuna runakuna purapi kan, nispa.

4 Wiraqochataq paykunata nirqan: Cheqaqta cheqaqtapunin niykichis, imaqtintaq runakunari kaymantari rimapakunkuman, churanakunkuman imari?

5 Manachu qelqakunata paykuna ñawincharqanku, qankunapin churakunaykichis Cristoq sutinta nispa niqta? chaytaqmi sutiy. Kay sutiwanmi qhepa p’unchawpi waqyasqa kankichis.

6 Sutiyta paypi churakuspa tukukuykama takyaq runaqa, qespichisqan qhepa p’unchawpi kanqa.

7 Chhaynaqa, ima ruwasqaykichistapas sutiypin ruwankichis; hinaqa, sutiypin iñeqkuna-huñuta waqyankichis; sutiypitaq Taytaman waqyakunkichis, noqarayku iñeqkuna-huñuta saminchananpaq.

8 Imaynataq iñeqkuna-huñuyri kanman sutiypi mana waqyasqa kaspari? Moisespa sutinpi huk iñeqkuna-huñu waqyasqa kan chayqa, Moisespa iñeqkuna-huñunmi; huk runaq sutinpi waqyasqa kanman chaytaq, chay runaq iñeqkuna-huñun; ichaqa, sutiypi waqyasqa kanqa chayqa, iñeqkuna-huñuymi, yachachiyniypi hatarichisqa kanqa chayqa.

9 Cheqaqtapunin niykichis, yachachiyniypin hatarichisqa kankichis. Chhaynaqa, imataña waqyankichis chayqa sutiypin waqyankichis; hinaqa, iñeqkuna-huñuyrayku sutiypi Taytaman waqyakunkichis chayqa, uyarisunkichismi Tayta.

10 Iñeqkuna-huñu yachachiyniykunapi hatarichisqa kanqa chayqa, kikin ruwayninkunatan chaypi Tayta qhawachinqa.

11 Ichaqa, mana yachachiyniypichu hatarichisqa kanqa, runakunaq ruwayninkunapitaq, utaq saqraq ruwayninkunapipas hatarichisqa kanqa chayqa, cheqaqtapunin niykichis, manan unaychu ruwayninkunapi kusikunku, asllamantaq tukukuy hamun, paykunataq wit’usqa kaspanku ninaman choqasqa kanku, manataq chaymanta kutirimuy kanchu.

12 Ruwayninkun paykunata qatin, ruwayninkuraykutaq wit’usqa kanku; chhaynaqa, yuyariychis qankunaman nisqay imaymanakunata.

13 Yachachiyniytan qorqaykichis, kaytaqmi qankunaman qosqay yachachiyniy—Taytaypa munayninta ruwanaypaqmi pachaman hamurqani, Taytay kachamuwasqanrayku.

14 Taytaytaq kachamuwarqan chakatapi hoqarisqa kanaypaq, chakatapi hoqarisqa kasqay patamantaq llapan runakunata noqaman apamunaypaq; runakunaq hoqarisqan kasqayta hina runakuna Taytaq hoqarisqan kanankupaq, ñawpaqeypi sayanankupaq; allinña, utaq millayña ruwayninku kasqanman hina taripasqa kanankupaq—

15 Kayraykun hoqarisqa karqani; chhaynaqa, Taytaq atiyninman hinan, llapan runakunata noqaman apamusaq, ruwayninkuman hina taripasqa kanankupaq.

16 Hinataq, yuyayninman kutirimuspa sutiypi unuchasqa kaq, hunt’asqa kanqa; tukukuykama takyaqtintaq payta Taytaypa ñawpaqenpi mana ima huchayoqta kachisaq, runakunata taripanaypaq sayanay p’unchawpi.

17 Tukukuykama mana takyaqtaq, payllataqmi wit’usqa kaspa ninaman choqasqa kanqa, manañataqmi chaymanta astawan kutirimuyta atinqakuchu, Taytaq chaninchayninrayku.

18 Kaytaqmi runakunaq wawankunaman Paypa qosqan simi. Kayraykutaqmi qosqan simikunata Pay hunt’an, manataqmi Pay llullakunchu, ichaqa, llapan siminkunatan hunt’an.

19 Manataqmi ima qhelli kaqpas qhapaq suyunman haykuyta atinmanchu; chhaynaqa, manan imapas samariyninman haykunchu, ichaqa, iñiyninkurayku, huchankunamanta kutirimuyninkurayku, tukukuykama iñiysapa kasqankurayku ima yawarniypi p’achankuta maqchiqkunalla.

20 Kunanqa, kaymi kamachiy: Yuyayman kutirimuychis hallp’aq llapan k’uchunkuna, noqaman hamusqpataq sutiypi unuchasqa kaychis, Qollanan Nunaq chaskiyninwan qollanachisqa kanaykichispaq, mana ima qhelliyoq ñawpaqeypi qhepa p’unchawpi sayanaykichispaq.

21 Cheqaqta cheqaqtapunin niykichis, kaymi yachachiyniy; yachankichistaqmi iñeqkuna-huñuypi ima ruwanaykichiskunata; ruway rikuwasqaykichis ruwaykunallatataqmi ruwankichis; ruway rikuwasqaykichistapunin qankuna ruwankichis.

22 Chhaynaqa, kaykunata ruwankichis chayqa, saminchasqan kankichis; hoqarisqan qhepa p’unchawpi kankichis.

23 Rikusqaykichista uyarisqaykichiskunatawan qelqaychis, hark’asqa kasqallantataq ama.

24 Kay runakunaq ruwayninkunata qelqaychis, chaytaq kanqa, kasqan imaymanakunamanta ña qelqasqa kasqan hinapuni.

25 Qelqasqa kasqan qelqakunamanta, qelqasqa kananmantawanmi kay runakuna taripasqa kanqaku, chaykunawanmi paykunaq ruwayninku runakunaq reqsisqan kanqa.

26 Llapan imaymanakunan Taytaq qelqasqan; chhaynaqa, qelqasqa kanan qelqakunamantan runakuna taripasqa kanqaku.

27 Yachaychis kay runakunaq taripasqan kanaykichista, qankunaman taripay qonayman hina, chaytaq chanin kanqa. Hinaqa, imayna hina qharikunan kanaykichis? Cheqaqtapunitaq niykichis—noqa hinapuni, nispa.

28 Kunanqa Taytamanmi risaq. Cheqaqtapunitaq niykichis, imataña Taytamanta sutiypi mañakunkichis chayqa, qankunaman qosqan kanqa.

29 Chhayanqa, mañakuychis chaskinkichistaq; waqyakuychis kicharisqataq qankunapaq kanqa. Mañakuqqa chaskinmi, waqyakuqmantaq kicharisqa kanqa.

30 Kunanqa, ancha hatunmi kusikuyniy hunt’ayninkama, qankunarayku, kay runa-mirayraykupiwan; ari, Taytapas kusikunmi, llapan qollanan angelkunapas, qankunarayku, kay runa-mirayraykupiwan; manan mayqenpas chinkasqachu kanku.

31 Hamut’anaykichistan munayman, kunan runa-miraymanta kawsaq kaqkunamantan nini; manataqmi pipas paykunamanta chinkasqachu kanku; paykunapitaq kusikuyniyoq hunt’a kani.

32 Ichaqa, llakichiwanmi kay runa-miraymanta tawakaq runa-mirayrayku; paypa hark’asqa apasqan kanku, waqllisqa churi hina. Qolqerayku, qorirayku suwakuna haykuspa suway atinankurayku, thutaq waqllichisqanrayku iman qhatuwanqaku. Chay p’unchawpitaq paykunamanta watukamusaq, ruwayninkunata paykuna kikinkuq umankuman kutirichispa.

33 Hinataq, kay rimaykunata Jesus tukuqtin, yachachisqankunaman nirqan: k’ikllu punkunta haykuychis; k’ikllun punku, llañutaqmi kawsayman pusaq ñan, chikallantaqmi chayta tarinqaku; ichaqa, hatunmi punku, p’altataqmi wañuyman pusaq ñan, askhataqmi chayman haykunqaku tuta hamunankama, manataq pipas chaypi llank’ayta atinmanchu.