1 Cheqaqta cheqaqtapunin nini—wakchakunaman qoyta qonaykichispaq; munayman; ichaqa, qhawakuychis qoyniykichista runakunaq rikunankupaq runakunaq ñawpaqenkupi ama ruwayta; hukniraqmantaqa manan hanaqpachapi kaq Taytaykichismanta suñayoqchu kankichis.

2 Chhaynaqa, qoyniykichista qoqtiykichisqa, ama ñawpaqeykichispi qeqeriykichista waqachiychischu, ishkay uyakunachu sinagogakunapi k’ikllukunapiwan ruwanku, runakunaq allin nisqan kanankupaq chhaynataqa. Cheqaqtapunin niykichis, suñayoqñan paykuna kanku.

3 Ichaqa, qokuyta qoqtiykichisqa, ama paña makiykichispa ruwasqanta lloq’e makiykichis yachananta kachariychischu,

4 Qoyniykichis pakallapi kananpaq; pakallapi rikuq Taytaykichistaq lliw runa rikushaqtin suñasunkichis.

5 Yayaman-rimarikuqtiykichisqa ama ishkay uyakuna hinachu ruwankichis; paykunaqa wayllunku sinagogakunapi, k’ikllu muyurinakunapiwan sayaspa yayaman-rimarikuytan runakunaq rikusqan kanankupaq. Cheqaqtapunin niykichis—suñayoqñan paykuna kanku.

6 Ichaqa, yayaman-rimarikuqtiykichisqa, wasiykichisman haykuychis, punkuykichista wishq’aspataq pakallapi kaq Taytaykichisman rimarikuychis, pakallapi rikuq Taytaykichistaq llapa runa rikushaqtin suñasunkichis.

7 Yayaman-rimarikuqtiykichisqa, ama yanqakunata yapa-yapamanta rimaychischu, mana kreyiqkuna hina; ashkha rimasqankurayku uyarisqa kanankutan paykuna yuyakunku.

8 Chhaynaqa, ama paykuna hinachu kaychis; Taytaykichisqa yachanmi imakuna nesitasqaykichistapas, Paymanta manaraq mañakushaqtiykichis.

9 Khaynata chhaynaqa yayaman-rimarikuychis: Hanaqpachapi kaq Taytayku, qollanachisqa sutiyki kachun.

10 Munayniyki pachapi ruwasqa kachun hanaqpachapi hina.

11 Manu kasqaykuta panpachawayku, manu kawaqniykuta panpachasqaykuta hina.

12 Ama wateqaykunaman pusawaykuchu, ichaqa millaymanta qespichiwayku.

13 Qanpan suyu, atiypas, kusiqellpupas wiñaypaq. Hinataq kachun, nispa.

14 Runakunaq huchankunata panpachankichis chayqa, panpachasunkichismi hanaqpachapi Taytaykichispas.

15 Ichaqa, runakunaq huchankunata mana panpachankichischu chayqa, manan Taytaykichispas huchaykichiskunata panpachanqachu.

16 Astawanraqtaq—sasiqtiykichisqa ama ishkay-uyakuna hina khuyay uyayoqchu kaychis. Uyankutan allichanku runakunaman sasiq hina rikhurinankupaq. Cheqaqtapunin niykichis, chashkinkuñan suñankuta.

17 Ichaqa, sasiqtiykichisqa umaykichista hawikuychis, uyaykichistataq uphakuychis,

18 Runakunaman mana sasiq hina rikhurinaykichispaq, ichaqa pakallapi kaq Taytaykichisman; pakallapi rikuq Taytaykichistaq llapa runakuna rikushaqtinku suñasunkichis.

19 Ama pachapi qhapaqyaykunata waqaychakuychischu, thutan qhoqayaypiwan waqllichin, suwakunataq haykuspanku suwanku.

20 Ichaqa, hanaqpachapi qhapaqyaykunata waqaychakuychis, manataqmi chaypiqa thutapas ni qhoqapas waqllichinchu, manataq suwakunapas haykunkuchu, nitaq suwankupaschu.

21 Maypi qhapaqyayniykichis kasqanpin sonqoykichispas kanqa.

22 Runa-kurkuq k’anchayninqa ñawin; chhaynaqa, ñawiykichis ch’ullalla kanqa chayqa, lliw runa-kurkuykichismi k’anchayniyoq hunt’a kanqa.

23 Ichaqa, ñawiykichis millay kanqa chayqa, lliw runa-kurkuykichismi laqhayaywan hunt’a kanqa. Chhaynaqa, qankunapi kaq k’anchay laqhayaq kapun chayri, imayna hatunpunin chay laqhayaq!

24 Manan pipas ishkay kamachikuqkunata serviyta atinmanchu; hunninkaqtan cheqnikunqa hukninkaqtataq munakunqa, utaq, hukninkaqmanta hap’ipakunqa, huknin kaqtataq alqochanqa. Manan Yayata qhapaqyaykunatawan serviyta atiwaqchischu.

25 Hinataq kay simikunata Jesus rimariqtin, akllasqan chunka ishkayniyoqkunata qhawarispa paykunata khaynata nirqan: Yuyariychis rimarisqay simikunata. Qankunatan akllarqani kay runakunata servinaykichispaq. Chhaynaqa niykichis, ama kawsayniykichismanta yuyaychischu, ima mikhunaykichistapas ni ima ukyanaykichistapas; nitaq runa-kurkuykichismantapas, ima churakunaykichismanta. Manachu kawsay mikhunamanta aswan, runakurkutaq p’achamanta aswan.

26 Qhawariychis hanaqpi urpikunata, manan paykuna tarpunkuchu nitaq pallankuchu, nitaq taqekunapichu huñunku; chaypiwanpas hanaqpachapi Taytaykichismi paykunata mikhuchin. Manachu paykunamanta aswan allin qankuna kankichis?

27 Pin qankunamanta yuyaspaykichis, sayayniykichisman huk kuartata yapayta atinman.

28 Imaqtintaq p’achamantari yuyawaqchis? Qhawariychis chakrakunapi hamanq’aykuna imayna wiñasqankuta; manan llank’ankuchu nitaq pushkankupastaqchu;

29 Chaypiwanpas nisaykichismi, manan Salomonpas llapan kusiqellpunpi kaykuna hinachu p’achakurqan.

30 Chhaynaqa, chay hinata chakrapi yurakunata Yaya p’achan chayri, chaytaq kunan p’unchaw kan paqarintaq ninaman choqasqa kapun, chhaynallatataqmi Pay p’achasunkichis, mana huch’uy iñiyniyoq kankichis chayqa.

31 Chhaynaqa, ama imatapas yuyaychischu—imatan mikhusunchis, nispa? utaq, imatan ukyasunchis, utaq, imawanmi p’achakusunchis? nispa.

32 Yachanmi hanaqpachapi Taytaykichisqa, kay llapan imaymanakunayoq kanaykichista.

33 Ichaqa, Yayaq qhapaq suyunta chaninkaynintawan ñawpaqta mashkaychis, kay llapan imaymanakunataq qankunaman yapasqa kanqa.

34 Chhaynaqa, ama paqarinpaq yuyaychischu, paqarinqa kikin imaymanankunamantan yuyanqa. Allinñan sapanka p’unchawpaq kikin llakikuyninkuna.