1 Hinamantaq chay qelqasqa kaq susedenqa: Takiy, mana wawayoq mana wachakuq; takiypi phanchiriy wapu kallpayoq arupitaq qapariy wawawan mana ñak’ariq, aswan askhan sapan kaqpa wawankuna sawasqa warmimantaqa, ninmi Wiraqocha.

2 Hatunyarichiy maypi karpayki kananta, tiyanaykikunaq arapankunata chutarinankuta kachariy; ama panpachaychu, chutariy watanaykikunata, kallpachaytaq takarpuykikunata.

3 Paña qayllapi lloq’e qayllapiwanmi phanchirinqaku, ch’awchuykitaq hawarunakunata chaskikuyninkupaq chaskinqaku, ch’in llaqtakunatataq runakunawan tiyachinqaku.

4 Ama manchakuychu, manan p’enqachisqachu kanki; amataq pantachisqachu kay, manan p’enqayman churasqachu kanki; wayna kayniykipi p’enqakuytan qonqanki, manataqmi yuyarinkichu wayna kayniykiq anyakuyninta, ikma kayniykiq anyaynintataq manaña astawan yuyarinkichu.

5 Kamaqniykiq, qosaykiq sutinqa Awqasuyukunaq Wiraqochanmi; Qespichiqniykitaq, Israelpa Qollanan llapan hallp’aq Yayanmi waqyasqa kanqa.

6 Wiraqochataq waqyarqasunki qonqasqata, nunapi llakisqa warmita hina; wayna kaypa warmita hinan waqyarqasunki anyasqa kaqtiyki, nispan Yayayki nin.

7 Manan unaychu qonqarqayki, ichaqa ancha hatun khuyapakuykunawanmi huñusayki.

8 Huk chikan phiñarikuypin qanmanta huk chikallanta uyayta pakarqani, wiñay-wiñaypaq kaq sumaq sonqowanmi ichaqa qanwan khuyapakuq kasaq, nispan Kutichikapuqniyki Wiraqocha nin.

9 Noeq ununkuna hinan kapuwanqa; Noeq ununkuna manaña hayk’aqpas hallp’ata pakananmanta jurasqayta hinallatataqmi jurarqani qanwan manaña phiñarisqa kanaypaq.

10 Orqokunan ripunqaku, moqokunataq astasqa kanqaku; sumaq kayniymi ichaqa, mana qanmanta hitirinqachu, manataqmi llaqtaypa rimanakuyninpas hitirichisqachu kanqa, ninmi qanmanta khuyapakuyniyoq kaq Wiraqocha.

11 Yaw ñak’arichisqa, sallallallaywan chhapchisqa, mana sonqochasqa! Sumaq llinpiwanmi rumiykikunta churasaq, umiñakunawantaq teqsiykita ruwasaq.

12 Agatakunawan ventanaykikunata ruwasaq, punkuykikunatataq puka umiñakunawan, sumaq rumikunawantaq llapan pataykikunata.

13 Llapan wawaykikunan Wiraqochamanta yachachisqa kanqaku, ancha hatuntaq wawaykikunaq qasi-kawsayninku kanqa.

14 Chaninchaypin hatarichisqa kanki; kharupin ñit’isqa kaymanta kanki, manataqmi manchakunkichu; kharupin millay manchachiymantapas kanki, sispaykiman mana hamuqtin.

15 Cheqaqtapunin qan kontra huñunakunqaku, ichaqa manan noqaq huñunachisqaychu; pipas qan kontra huñunakuqqa, qankunaraykun urmanqaku.

16 Ninapi sansakunata phukuq herrerotan kamarqani, ruwanatataq llank’ananpaq apamun; usuchiqtapas kamarqanin chinkachinanpaq.

17 Manan qankuna kontra ruwasqa ima maqanapas hatunyanqachu; qan kontra taripaypi hatariq sapanka simitataq qan kondenanki. Kaymi Wiraqochaq warmankunaq chaskikuyninku, chaninchayninkutaq noqamanta, nispan Wiraqocha nin.