1 Cheqaqta cheqaqtapunin niykichis, kanmi huk ovejaykuna mana kay hallp’amanta nitaq Jerusalen hallp’amantapas kaqkuna, nitaq watukusqay hallp’aq muyureqnintinmantapas.

2 Chay rimasqay runakunaqa manaraqmi aruyta uyarinkuraqchu; manataqmi hayk’aqpas paykunamanta watukurqanichu.

3 Ichaqa, Taytamantan huk kamachita chashkirqani, paykunamanta watukamunaypaq, aruyta uyarinankupaq, ovejaykunawan kushkataq yupasqa kanqaku; huk t’aqalla huk micheqllapiwan kananpaq. Chhaynaqa, rinin paykunamanta watukamunaypaq.

4 Kamachiykichistaq, ripusqay pataman kay rimaykunata qelqanaykichispaq, Jerusalenpi rikuwaq runaykuna, noqawan yachachiyniypi kaqkuna, Taytamanta manapas sutiypi mañakunkumanchu qankunamanta, mana reqsisqanku hukkaq t’aqakunamantapas Qollanan Nunawan yachayta chashkinankupaq; kay qelqanaykichis rimaykuna waqaychasqa kananpaq, hawarunakunaman reqsichisqa kananpaq; hawarunakunaq hunt’a kayninkuwan hallp’a patantinpi mana kreyiyninkurayku ch’eqechisqa kananku ch’awchunkuq puchunku apamusqa kanankupaq, utaq noqa Kutichikapuqninku reqsiyman apamusqa kanankupaq.

5 Hinamantaq hallp’aq tawantin k’uchunkunamanta paykunata huñumusaq, chaymantaq Israelpa wasinmanta llapan runakunaman Taytaq rimanakusqanta hunt’asaq.

6 Saminchasqataq hawarunakuna kanku, noqapi, noqamanta Taytamantawan sut’inchaq Qollanan Nunapi ima kreyisqankurayku.

7 Noqapi kreyisqankurayku—nispan Tayta nin—mana kreyisqaykiraykupiwantaq O Israelpa wasin, qhepa p’unchawkunapi hawarunakunaman cheqaq hamunqa; kay imaymanakunaq hunt’aynintaq paykunaman yachachisqa kanqa.

8 Ichaqa, ay mana kreyiq hawarunakunamanta, nispan Tayta nin—kay hallp’a patamanña hamurqanku chaypas, Israelpa wasinmanta kaq llaqtaytaña ch’eqechirqanku chaypas; Israelpa wasimanta kaq llaqtaytaq paykuna puramanta qarqosqa paykunaq saruykachasqanpiwantaq karqanku chaypas;

9 Hawarunakunapaq Taytaq khuyapakuyninkunarayku, Israelpa wasinmanta kaq llaqtayman Taytaq taripayninkunaraykupiwantaq, cheqaqta cheqaqtapuni niykichis, kay llapan pataman, Israelpa wasinmanta kaq llaqtayta maqachisqay, ñak’arichisqay, sipichisqay ima pataman; paykuna puramanta qarqosqa kanankuta, paykunaq cheqnisqan kasqankuta ima ruwaspa, mana munasqa, mana allin rimasqa wakisqanku patamantaq—

10 Khaynatataq Tayta kamachimuwarqan qankunaman ninaypaq: Yachachiyniy kontra hawarunakuna huchallikuqtinku p’unchawpi, llapa llaqtakuna patapi, lliw hallp’antinpi kaq runakuna patapiwan sonqonkuq anchayayninpi hoqarikuqtiku, imaymana llullakuykunawan, q’otoykunawan, millaykunawan, llapa laya ishkay-uya kaywan, runa wañuchiykunawan, waqllichisqa kurakkunawan, map’akuykunawan, pakallapi millay-millanakunapiwan hunt’a kaqtinku; kay llapan imaymanakunata ruwanqaku, hunt’a yachachiyniytataq qarqonqaku chayqa, hunt’a yachachiyniytan paykuna puramanta horqosaq, nispan Tayta nin.

11 Hinamantaq llaqtaywan rimanakusqayta yuyarisaq, O Israelpa wasin, paykunamantaq yachachiyniyta apamusaq.

12 Qanmantaq qhawachisayki O Israelpa wasin, hawarunakuna qanpi mana atiyniyoq kasqankuta; ichaqa qanwan rimanakusqaytan yuyarisaq, O Israelpa wasin, qantaq yachachiyniypa hunt’aynin yachayman hamunki.

13 Ichaqa, hawarunakuna yuyayninkuman kutirimuspa noqaman kutirimunqaku chayqa, llaqtaywan kushkan yupasqa kanqaku O Israelpa wasin, nispan Tayta nin.

14 Manataqmi kacharisaqchu, Israelpa wasinmanta kaq llaqtayta, paykuna chawpinta rispa saruykachanankuta, nispan Tayta nin.

15 Ichaqa, noqaman mana kutirmunqakuchu, nitaq aruyta uyarinqakuchu chayqa, kacharisaqmi paykunata, ari, llaqtaytan kacharisaq O Israelpa wasin, paykuna chawpinta rispa paykunata saruykachanankupaq, paykunataq kanqaku mishk’iynin chinkaq kachi hina; chhaynaqa, manan imapaqpas chay kachi allinchu, ichaqa, choqasqa kanallanpaq, llaqtaypa saruykachasqan kanallanpaqwan, O Israelpa wasin.

16 Cheqaqta cheqaqtapunin niykichis, khaynatan Tayta kamachimuwarqan—kay runakunaman kay hallp’ata chashkikuyninkupaq qonaypaq.

17 Hinamantaq unanchaq Isaiaspa khayna nisqan rimaykuna hunt’akunqa:

18 Qhamiyaqniykikunan arunta hoqarinqaku, kushka aruwanmi takinqaku, ñawi purataq rikunqaku, yapamanta Sionta Wiraqocha apamuqtin.

19 Kusirikuypi phanchiriychis, kushka takiychis Jerusalenpa purun hallp’ankuna; llaqtantan Wiraqocha kallpacharqan, Jerusalentan kutichikapurqan.

20 Llapa llaqtakunaq ñawpaqenpin makinta Wiraqocha q’alanarqan; pachaq llapan k’uchunkunataq Yayaq qespiyninta rikunqaku.