1 Hinataq, yachachisqankunata Jesus kamachirqan, Payman t’antata vinotawan apamunankupaq.

2 T’antaman vinomanwan paykuna rishanankukamataq, runakunata kamachirqan panpapi tiyarikunankupaq.

3 Yachachisqakuna t’antawan vinopiwan kutirimuqtinkutaq, t’antata hap’irqan, phatmispataq samincharqan; yachachisqakunamantaq qorqan, mikhunankupaq paykunata kamachispa.

4 Mikhuspanku hunt’asqa kaqtinkutaq, runakunaman qonankupaq kamachirqan.

5 Runakuna mikhuspanku saksasqa kaqtinkutaq, yachachisqakunaman nirqan: Hukmi qankuna puramanta kamachisqa kanqa, paymantaq atiyta qosaq, t’antata phatmispa saminchananpaq, iñeqkuna-huñuymanta kaq runakunaman qonanpaq, sutiypi kreyispa llapan unuchasqa kanqaku chaykunaman.

6 Kaytataq pasaqlla ruwankichis, noqa ruwasqayta hina, t’antata phatmispa saminchaspa ima, qankunaman qosqayta hina.

7 Kaytataq ruwankichis qankunaman qhawachisqay runakurkuy yuyariypi. Kaytaq Taytaman sut’inchay kanqa pasaqllapuni yuyariwasqaykichismanta. Pasaqllapuni yuyariwankichis chaytaq, qankunawan Nunay kanqa.

8 Hinataq, kay simikunata niqtin, yachachisqankunata kamachirqan, qeropi vinomanta hap’ispa ukyanankupaq, runakunamanpas chaymanta ukyanankupaq qonankupaq ima.

9 Chhaynatataq ruwarqanku, ukyaqtinkutaq hunt’asqa karqanku. Runakunamantaq qorqanku, ukyaspankutaq paykunapas hunt’asqa karqanku.

10 Yachachisqakuna kayta ruwaqtinkutaq, paykunata Jesus nirqan: Saminchasqan kankichis kay ruwasqaykichismanta; kayqa kamachiyniykuna hunt’aymi, Taytamantaq kay sut’inchan, kamachisqay imaymanakunata ruway munasqaykichismanta.

11 Pasaqllapunitaq kayta ruwankichis, yuyayninkuman kutirimuspa sutiypi unuchakuqkunaman; qankunarayku sut’uchisqa yawarniy yuyariypitaq kayta ruwankichis; Taytaman pasaqllapuni yuyariwasqaykichismanta sut’inchanaykichispaq. Pasaqllapuni yuyariwankichis chaytaq, qankunawan Nunay kanqa.

12 Qankunatataq kamachiykichis kaykunata ruwanaykichispaq. Kay imaymanakunata pasaqllapuni ruwankichis chayqa, saminchasqan kankichis, qaqaypi hatarichisqa kasqaykichisrayku.

13 Pipas qankunamanta kaymanta aswanta, utaq pisitapas ruwanqa chayqa, manan qaqaypi sayarichisqachu kanku; ichaqa, aqopi teqsichasqan kanku; para urayamuqtin, unukuna hamuqtin, wayra phukumuqtinpiwan paykunata soq’aqtintaq urmanqaku; supay wasiq punkuntaq kichasqaña kashan paykunata chaskinanpaq.

14 Chhaynaqa, saminchasqan kankichis qankunaman qonaypaq Tayta kamachimuwasqan kamachiykunata waqaychankichis chayqa.

15 Cheqaqta cheqaqtapunin niykichis, pasaqllan qhawakunaykichis yayaman-rimarikunaykichis ima saqraq wateqasqan kaspa hark’asqa apasqa mana kanaykichispaq.

16 Qankuna chawpipi Yayaman rimarikusqayta hinataq iñeqkuna-huñupi yayaman-rimarikuychis, yuyayninkuman kutirimusqa sutiypi unuchakuq llaqtay purapi. Noqan k’anchay kani, imaynata ruwanaykichispaqtaq qhawachirqaykichis, nispa.

17 Hinataq, kay simikunata yachachisqankunaman Jesus rimariqtin, yapamanta runakunaman kutirispa nirqan:

18 Cheqaqta cheqaqtapunin niykichis, pasaqllapunin qhawakunaykichis, yayamantaq-rimarikunaykichis wateqaypi mana haykunaykichispaq; hap’iytan saqra munasunkichis trigota hina suysunasuykichispaq.

19 Chhaynaqa, pasaqllapuni sutiypi Taytaman rimarikuychis.

20 Imatapas chanin kaqta Taytamanta sutiypi mañakunkichis chaskinanykichispaq kreyispaykichis chayqa, qankunaman qosqan kanqa.

21 Aylluykichispi sutiypipuni Taytaman rimarikuychis, warmiykichiskuna wawaykichiskunapiwan saminchasqa kanankupaq.

22 Pasaqllan huñunakunkichis, amataq pitapas hark’ankichischu huñunakuqtiykichis qankunaman hamunankumanta; ichaqa, kachariychis qankunaman hamunankuta, amataq paykunata hark’aychischu;

23 Paykunaraykun yayaman-rimarikunkichis, amataq paykunata qarqonkichischu; pasaqlla qankunaman hamunqaku chaytaq, sutiypi paykunarayku Taytaman rimarikunkichis.

24 Chhaynaqa, hoqariychis k’anchayniykichista, runakunaman k’ancharinanpaq. Noqan hanaqpi kachinaykichis k’anchay kani—ruwasqay rikusqaykichista. Rikurqankichismi Taytaman rimarikusqayta, llapaykichistaq rikurqankichis.

25 Rikunkichismi qankunamanta mana pipas ripunanpaq kamachisqayta, aswanmá kamachirqani noqaman hamunaykichispaq, llaminaykichispaq rikunaykichispaqwan; chhaynallatataqmi runakunawan ruwankichis. Pipas kay kamachiykunata p’akinqa chayqa, wateqayman pusasqa kananpaqmi kacharin, nispa.

26 Hinataq kay simikunata Jesus rimariqtin, yapamanta ñawinta akllasqan yachachisqankunaman kutirichispa, paykunata nirqan:

27 Cheqata cheqaqtapunin niykichis, huk kamachiytawanmi qoykichis, hinamantaq Taytayman risaq, huk qowasqan kamachiykunata hunt’anaypaq.

28 Kaymi qankunaman qonay kamachiy: Aychaymanta yawarniymantawan qonakuqtiykichisqa, aman pitapas kacharinkichischu yachashaspaykichis, chaypaq hina mana kaqtinku aychaymanta yawarniymantawan hoqarinakunankuta.

29 Pipas aychaymanta mikhunqa, yawarniymantawan ukyanqa mana chaypaq hina kaspa chayqa, nunanpaq kondenasiontan mikhun, ukyan ima; chhaynaqa, aychay mana mikhunanpaq hina, yawarniy mana ukyananpaqwan hina huk runa kasqanta yachankichis chayqa, hark’ankichismi payta.

30 Chaypiwanpas aman qankuna chawpimanta payta qarqonkichischu; ichaqa, paymanmi yachachinkichis, sutiypitaq payrayku Taytaman rimarikunkichis; yuyayninman kutirimuspa sutiypi unuchakunqa chaytaq, payta chaskinkichis, aychaymanta yawarniymantawantaq payman qonkichis.

31 Ichaqa, yuyayninman mana kutirimunqachu chayqa, manan llaqtaywanchu yupasqa kanqa, runaykunata mana chinkachinanpaq; reqsinin ovejaykunata, yupasqataqmi paykuna kanku.

32 Chaypiwanpas aman sinagogaykichismanta, utaq maypi yupaychanaykichismantapas payta qarqonkichischu, pay yachachiytataq qatillankichis; manan yachankichischu kutimuspachus yuyayninkuman kutirimunankuta, sonqonkuq llapan munayninwan noqaman hamunankuta, noqataq paykunata alliyachinayta; qankunataq yanapay kankichis paykunaman qespiyta apamuypi.

33 Chhaynaqa, qankunaman qosqay kamachiykunata waqaychaychis, kondenasionman mana haykunaykichispaq; ay Taytaq kondenasqan runamanta.

34 Kay kamachiykunatataq qoykichis, qankuna purapi churanakuykuna kasqanrayku. Saminchasqataqmi kankichis qankuna purapi churanakuykuna mana kaqtin.

35 Kunanqa Taytamanmi risaq; nesitakunmi qankunarayku Taytaman rinay, nispa.

36 Hinataq, kay niykunata Jesus tukuspa, huk-hukmanta akllasqan yachachisqakunata makinwan llamirqan llapanta llaminankama, llamisqanman hinataq paykunata rimarirqan.

37 Manataqmi runakuna uyarirqankuchu paykunaman rimasqan simikunata, chayraykutaq mana sut’inchankuchu. Ichaqa, yachachisqakunaqa sut’inchankun, Qollanan Nunata qonankupaq paykunaman atiyta qosqanta. Asniqmanñataq qhawachisaykichis, kay willay cheqaq kasqanta.

38 Hinataq, llapankuta Jesus llamisqan pataman, huk phuyu hamurqan, runakunata llanthuqtintaq mana Jesusta rikuyta atirqankuchu.

39 Llanthurisqa kashanankukamataq, paykuna chawpimanta ripurqan, hanaqpachamantaq seqayapurqan. Yachachisqakunataq rikurqanku sut’incharqankutaq hanaqpachaman yapamanta seqayapusqanmanta.