1 Hinataq, hanaqpachaman Jesus wichayapuqtin, runakuna ch’eqeripurqanku; sapanka runataq warminta wawankunatawan apayukuspa wasinman kutipurqan.

2 Chay pachapunitaq runakunaman willasqa karqan, manaraq tutayashaqtin, askha runakuna Jesusta rikusqankumanta, paykunata Pay servisqanmanta, runakunaman yapamanta tutamantanpi qhawachikunanmantawan.

3 Ari, tukuy tutantin iman Jesusmanta willasqa karqan; hinataq runakunaman kachasqanku askha karqanku; ari, ancha askhatapunitaq chay tutantin llank’arqanku, runakunawan Jesus maypi qhawachikunanpaq tutamantanpi kanankupaq.

4 Hinataq, tutamantanpi runakuna huñusqa kashaqtinku, Nephi, wañusqakunamanta hatarichisqan wawqen Timoteo sutiyoq, Jonas sutiyoq churinpas; Mathoni, wawqen Mathoniahpiwan, Kumen, Kumenonhi, Jeremiah, Shemnon, Jonas, Sedekiah, Isaiaspiwan—kaymi Jesuspa akllasqan yachachisqakunaq sutinkuna karqan—hinataq rispanku runa-runapi paykuna sayarqanku.

5 Ancha askhapuni runakuna kaqtinkutaq, chunka ishkayniyoq t’aqakunapi paykunata t’aqachirqanku.

6 Chunka ishkayniyoqkunataq runakunata yachachirqanku; runakunatataq panpapi qhonqorichirqanku, Jesuspa sutinpi Taytaman rimarikunankupaq.

7 Yachachisqakunapas Jesuspa sutinpin Taytaman rimarikurqanku. Sayarispataq runakunata servirqanku.

8 Jesuspa rimasqan kikin rimaykunata paykunaman yachachispankutaq—Jesuspa rimasqan simikunamanta mana imata t’ikraspa—yapamanta qhonqorikuspanku Jesuspa sutinpi Taytaman rimarikurqanku.

9 Aswantapuni munasqankuraykutaq Taytaman rimarikurqanku; paykunaman Qollanan Nuna qosqa kanantataq munarqanku.

10 Khaynata Taytaman rimarikuqtinkutaq unu pataman rirqanku, runakunataq paykunata qatikurqanku.

11 Hinataq, unuman Nephi haykurqan, unuchasqataq karqan.

12 Unumanta lloqsimuqtintaq unuchayta qallarirqan. Jesuspa akllasqankunatataq unucharqan.

13 Llapanku unuchasqa kaspanku, unumanta lloqsimuqtinkutaq paykunaman Qollanan Nuna urayamurqan; Qollanan Nunawan ninawan ima hunt’asqataq karqanku.

14 Ninawan hinataq muyurisqa karqanku, hanaqpachamantataq chay urayamurqan, runakunataq rikurqanku sut’incharqankutaq. Angelkunataq hanaqpachamanta urayamuspanku paykunata servirqanku.

15 Hinataq, yachachisqakunata angelkuna servishaqtinku Jesus hamurqan, chawpinkupi sayaspataq paykunata servirqan.

16 Hinataq, runakunaman rimarirqan, yapamanta panpapi qhonqorikunankupaqtaq paykunata kamachirqan, yachachisqankunapas panpapi qhonqorikunankupaq.

17 Llapanku panpapi qhoqorikuqtinkutaq, yachachisqankunata yayaman-rimarikunakupaq kamachirqan.

18 Hinataq, paykunaqa yayaman-rimarikuyta qallarirqanku, Jesusmantaq rimarikurqanku, Payta—Wiraqochayku, Yayayku, nispa waqyaspanku.

19 Jesustaq paykuna chawpimanta lloqsirqan, paykunamanta huk chikanta hitirispataq panpaman k’umurikuspa nirqan:

20 Taytay, añaychaykin kay akllasqaykunaman Qollanan Nunata qosqaykimanta; noqapi kreyisqankuraykun paykunata kay runakunamanta akllarqani.

21 Taytay, rimayninkupi llapan kreyiqkunaman Qollanan Nuna qonaykitan mañaykukuyki.

22 Noqapi kreyisqankuraykun paykunaman Qollanan Nunata qorqanki Taytay; rikushankitaqmi noqapi kreyisqankuta paykunata uyarisqaykirayku, noqamantaq rimarikunku; paykunawan kasqayraykutaqmi noqaman rimarikunku.

23 Kunantaq, Taytay, paykunarayku rimarikuyki, rimayninkupi llapan kreyiqkunaraykupiwan, noqapi kreyinankupaq, paykunapi kanaypaq, qan Taytay noqapi kasqaykita hina, huklla kananchispaq, nispa.

24 Hinataq, khaynata Taytaman Jesus rimarikuqtin, yachachisqankunaman hamurqan, paykunataq Payman rimarikusharqanku mana samaspa; manataqmi askha simikunatachu yapaparqanku; qosqan paykunaman karqan ima rimarikunankupaqpas, munaywantaq hunt’asqa karqanku.

25 Hinataq, paykunata Jesus samincharqan Payman rimarikushanankukama; paykunamantaq asirirqan, uyanpa k’anchaynintaq paykunaman k’ancharirqan; hinataq, paykunaqa yuraqpuni karqanku, Jesuspa uyan hina, p’achan hinapiwan; chay yuraqyaytaq atiparqan llapan yuraqyayta; ari, manataqmi imapas hallp’a patapi kanmanchu chaypa yuraqyaynin hinaqa.

26 Jesustaq paykunata nirqan: Rimarikuyta qatillaychis nispa, chaypiwanpas manan rimarikuyta tatirqankuchu.

27 Paykunamantataq yapamanta kutirirqan, huk chikanta hitirispataq panpaman k’umurikuspa yapamanta Taytaman rimarikurqan:

28 Taytay, añaychaykin akllasqaykunata iñiyninkurayku ch’uyanchasqaykimanta; paykunaraykun, rimayninkunapi kreyiq runakunaraykupiwan rimarikuyki; rimayninkupi iñiywan noqapi ch’uyanchasqa kanankupaq, paykuna noqapi ch’uyanchasqa kasqankuta hina.

29 Taytay, manan pacharaykuchu rimarikuyki, ichaqa, iñiyninkurayku pachamanta qowasqayki runakunaraykun; noqapi ch’uyanchasqa kanankupaq, noqapi kasqaykita hina, Taytay, paykunapi kanaypaq, huklla kananchispaq; paykunapi kusiqellpusqa kanaypaq, nispa.

30 Kay simikunata Jesus rimariqtintaq, yapamanta yachachisqankunaman hamurqan; paykunataq mana samaspa mana sayk’uspa Payman rimarikusharqanku; Paytaq yapamanta paykunaman asirirqan, hinataq Jesus hinapuni yuraq paykuna karqanku.

31 Hinataq, yapamanta huk chikanta hitirispa Taytaman rimarikurqan;

32 Manataqmi rimayta simi atinmanchu rimarisqan simikunata, manataqmi rimarisqan simikunaqa runaq qelqasqan kayta atikunmanchu.

33 Runakunataq uyarirqanku, sut’inchankutaq; sonqonkutaq kicharisqa karqan, hamut’arqankutaq sonqonkupi Paypa rimarisqan simikunata.

34 Chaypiwanpas, ancha hatun ancha sumaqpuni Paypa rimarisqan simikuna kasqanraykutaqmi, mana qelqasqa kayta atikunmanchu, nitaq runaq rimasqanpas kayta atikunmanchu.

35 Hinataq, rimarikuyta Jesus tukuspa yachachisqankunaman yapamanta hamuspa paykunata nirqan: Chhayna hatun iñiytaqa manan hayk’aqpas llapan judiokuna chawpipi rikurqanichu; chhaynataq mana chhayna hatun milagrokunata paykunaman qhawachiyta atirqanichu, mana kreyiyninkurayku.

36 Cheqaqtapunin niykichis, manan pipas paykunamanta kanchu, rikusqaykichis hina ancha hatun imaymanakunata rikuqkunaqa; manataqmi uyarisqaykichista hina ancha hatun imaymanakunatapas uyarirqankuchu.