1 Kunantaq qelqaykuman hina—yachaykutaqmi qelqayku cheqaq kasqanta, chanin runataqmi karqan qelqa waqaychaqqa; cheqaqtapunin askha milagrokunata ruwarqan Jesuspa sutinpi; manataqmi pipas karqanchu Jesuspa sutinpi milagro ruway atiq, huchallikuyninkunamanta lliwtapuni mana maqchisqa kaspaqa—

2 Hinataq, tiempoyku yupaypi mana kay runa pantarqanchu chayqa, kinsa chunka kinsayoq wataqa tukukurqanmi;

3 Runakunataq ancha hatun kallpachakuywan unanchaq Lamanita Samuelpa qosqan señalkunata suyayta qallarirqanku; ari, hallp’antinpi kinsa p’unchaw tutayaq kanan pachata.

4 Runakuna purapitaq ancha hatun ishkayaykuna, churanakuykunapiwan kayta qallarirqan, askha señalkunaña qosqa karqan chaypas.

5 Hinataq kinsa chunka tawayoq watapi, ñawpaq kaq killaq tawa kaq p’unchawninpi, ancha hatun wayra-para hatarirqan, manataq khaynaniraq wayra-paramanta yachakurqanchu llapan hallp’antinpi.

6 Kallarqantaqmi ancha hatun millay sallallallayay, ancha millay qhaqyakunataq karqan, lliw hallp’antintataq chhapchirqan, ch’eqtakunmanpas hinapuni.

7 Ancha k’anchayniyoq illapakunataq karqan, lliw hallp’antinpi mana hayk’aq reqsisqa hinapuni.

8 Zarahemla llaqtataq rawrayurqan.

9 Moroni llaqtataq mamaqocha ukhupi chinkayurqan, chaypi runakunataq wañurqanku.

10 Hallp’ataq Moronihah llaqta pataman apasqa karqan, llaqtaq rantinpitaq ancha hatun orqo rikhurimurqan.

11 Qheparina hallp’apitaq ancha millay taqmay karqan.

12 Ichaqa, aswan millay taqmaymi qayllarina hallp’api karqan; llapan hallp’antinmi t’ikrasqa karqan, sallallallayrayku, muyoq wayrakuna, qhaqyakuna, illapakuna, hallp’antin chhapchikusqanpiwanrayku.

13 Hatun ñankunataq p’akisqa karqan, panpa ñankunataq waqllichisqa; askha sumaq llanp’u hallp’akunataq wank’ayarqan.

14 Askha ancha hatun allin reqsisqa llaqtakunataq chinkayurqanku, askhataq rawrayurqanku, askhataq chhapchisqa karqan chaypa wasinkuna panpaman urmayunankukama, runankunataq wañuchisqa karqanku; ch’intaq chay hallp’akuna saqesqa karqan.

15 Karqantaqmi qhepaq llaqtakuna, ichaqa ancha hatunmi chay llaqtakunaq thuñiynin karqan, askhataq runakunamanta wañuchisqa karqanku.

16 Muyoq wayrapitaq wakin runakuna apasqa karqanku, manataq pipas yachanchu mayman apasqa kasqankuta; apasqa kasqallankutan yachanku.

17 Khaynatataq lliw hallp’antinpa uyan waqllichisqa karqan, sallallallayrayku, qhaqyakuna, illapakuna, pacha chhapchikunapiwanrayku.

18 Qaqakunataq ishkaypi ch’eqtakurqanku; llapan hallp’antinpin p’akisqa karqanku, hinataq p’akisqa ch’iptikunapi, k’akrakunapi, ch’eqtakunapiwan tarisqa karqan.

19 Hinataq qhaqyakuna, illapakuna, wayra-para, sallallallay, pacha chhapchikunapiwan tukukuqtin—yaqa kinsa horaskunan chay karqan, wakin runakunataq nirqanku aswan unay kasqanta; chaypiwanpas kay llapan millay imaymanakunaqa ruwasqa karqan, yaqa kinsa horaspin—hinamantaq lliw hallp’antinpi laqhayaq karqan.

20 Hinataq llapan hallp’antinpi pipu laqhayaq karqan, mana wañuq runakunataq chay laqhayaq pachaphuyuta llamiyta atirqanku.

21 Manataq k’anchay kanmanchu karqan laqhayaqrayku, manataqmi velakunapas ni rawraq k’aspikunapas; nitaq ninatapas ancha qhashñu ch’aki k’aspikunawanpas hatarichiyta atirqankuchu; hinataq mana ima k’anchaypas karqanchu.

22 Manataqmi ima k’anchaypas rikukurqanchu, nitaq ninapas, nitaq llipllipas, nitaq intipas ni killapas ni qoyllurkunapas, hallp’a patapi ancha hatun laqhayaq pachaphuyu kasqanrayku.

23 Hinataq kinsa p’unchaw mana ima k’achaypas rikusqa karqanchu; ancha hatun waqay, anchiy, qaparqachaypiwantaq llapan runakuna purapi pasaqlla karqan; ari, ancha hatunpunin runakunaq waqayninku karqan, tutayaqrayku, paykunaman ancha hatun qolluchiy hamusqanraykupiwan.

24 Huk qayllapitaq khayna waqaqta uyarirqanku: Yuyayninchisman kutirimuswan karqan, kay ancha hatun millay p’unchawpa ñawpanintaraq, chhaynataq wawqenchiskuna mana wañunkumanchu karqan, manataq chay hatun Zarahemla llaqtapi kanasqachu kankuman karqan, nispa.

25 Huk qayllapitaq khayna waqaqta uyarirqanku: Yuyayninchisman kutirimuswan karqan, kay ancha hatun millay p’unchawpa ñawpaqnintaraq, manataq unanchaqkunata rumikunawan ch’aqespa wañuchiswanchu karqan, nitaq qarqoswanchu karqan; hinataq mamanchiskuna, sumaq ususinchiskuna, wawanchiskunapas saqesqa kankuman karqan, manataq p’anpasqachu kankuman karqan chay ancha hatun Moronihah llaqtapi, nispa. Khaynan runakunaq waqayninkuna ancha hatun millaypuni karqan.