1 Hinataq, kay imaymanakunata Jesus niqtin, runakunaman qhawarirqan, hinaspataq paykunata nirqan: Uyarirqankichismi, Taytayman manaraq seqashaqtiy yachachisqay imaymanakunata; chhaynaqa, kay rimayniykunata yuyarispa ruwaqtaqa, paytan qhepa p’unchawpi hatarichisaq, nispa.

2 Kay rimaykunta Jesus niqtintaq Payqa rikurqan, paykuna purapi wakin runakuna utirayasqankuta, Moisespa kamachisqa-siminwan ima ruwananta tapukusqankuta; manan paykuna hamut’arqankuchu—mawk’a imaymanakunaqa tukukunmi, llapan imaymanakunataq mosoq wakipunku, nispa nisqata.

3 Paykunatataq Pay nirqan: Ama utirayaychischu qankunaman—mawk’a imaymanakunaqa tukukunmi, llapan imaymanakunataq mosoq wakipun nispa nisqaymanta.

4 Nisaykichis—Moisesman qosqa kamachisqa-simiqa hunt’akunmi.

5 Noqan chay kamachisqa-simi qoq kani, noqataqmi kani Israel llaqtaywan rimanakuq; chhaynaqa, noqapin kamachisqa-simi hunt’akun, kamachisqa-simi hunt’aqmi hamurqani; chhaynaqa, tukukuyniyoqmi.

6 Manan unanchaqkunataqa qolluchinichu; noqapi mana hunt’akuq imaymanakunaqa, cheqaqtapunin niykichis, llapanmi hunt’akunqa.

7 Mawk’a imaymanakunaqa pasanmi nispa qankunaman niqtiyqa, manan chinkachinichu hamunan imaymanakunamanta rimasqa imaymanakunataqa.

8 Llaqtaywan rimanakusqayqa manan llapanchu hunt’akun; ichaqa, Moisesman qosqa kamachisqa-simiqa noqapin tukukun.

9 Noqan kamachisqa-simi k’anchaypiwan kani. Noqata qhawariwaychis, tukukuykamataq takyaychis, hinataq kawsankichis. Tukukuykama takyaqmanmi wiñay kawsayta qosaq.

10 Qankunamanmi kamachiykunata qorqaykichis; chhaynaqa, kamachiyniykunata waqaychaychis. Kaytaqmi kamachisqa-simi unanchaqkunapiwan, cheqaqtapunin noqamanta sut’incharqanku.

11 Hinataq, kay simikunata Jesus niqtin, chay akllasqan chunka ishkayniyoqkunaman nirqan:

12 Yachachisqaykunan kankichis, Joseq wasinpa puchun kaq kay runakunamanmi k’anchay kankichis.

13 Kaytaqmi chashkikuyniykichis hallp’a, Taytataq kayta qankunaman qorqasunkichis.

14 Manataqmi hayk’aqpas Tayta kamachiwarqanchu kayta Jerusalenpi wawqeykichiskunaman ninaypaq.

15 Manataqmi hayk’aqpas Tayta kamachiwarqanchu, chay hallp’amanta Taytaq horqosqan Israelpa wasinpa hukkaq t’aqakunamanta paykunaman willanaypaqqa.

16 Kaytan Tayta kamachimuwarqan paykunaman ninaypaq:

17 Huk ovejaykunapas kanmi mana kay t’aqamanta kaqkuna; paykunatapas apamunaymi, uyarinqakutaq aruyta; huk t’aqallataq, huk micheqllataq kanqa, nispa.

18 Kunantaq, k’ullu umankurayku, mana kreyiyninkuraykupiwan, mana rimayniykunata hamut’arqankuchu; chayraykutaq Taytaq kamachisqan karqani kay imaymanakunamanta paykunaman mana astawan rimarinaypaq.

19 Ichaqa, cheqaqtapunin niykichis, Taytan kamachimuwarqan, qankunamantaq willaykichis—millay ruwayninkuraykun paykunamanta t’aqasqa karqankichis; chhaynaqa, millay ruwayninkuraykun paykunaqa mana qankunamanta yachankuchu.

20 Cheqaqtapunitaq yapamanta niykichis, hukkaq t’aqakunata paykunamanta Tayta t’aqasqanta; millay ruwayninkunaraykutaq paykunaqa mana paykunamanta yachankuchu.

21 Cheqaqtapunitaq niykichis, qankunan kankichis—kanmi huk ovejaykunapas mana kay t’aqamanta kaqkuna; paykunatapas apamunaymi, uyarinqakutaq aruyta; huk t’aqallataq huk micheqllataq kanqa, nispa nisqay.

22 Manataqmi hamut’awarqankuchu, hawarunakuna kanankupaqtaq yuyarqanku. Manataqmi hamut’arqankuchu paykunaq yachachiyninkuwan hawarunakuna wakichisqa kanankuta.

23 Manataqmi hamut’awarqankuchu—uyarinqakun aruyta paykuna nispa nisqayta; manataqmi hamut’awarqankuchu hawarunakuna mana ima pachapipas aruyta uyarinankuta, paykunamanta noqa kikiy mana watukunayta, ichaqa, Qollanan Nunallawan.

24 Ichaqa, uyarirqankichismi aruyta, rikuwarqankichistaqmi; ovejaykunataq kankichis, Taytaq qowasqankunawantaq yupasqa kankichis.