1 Hinataq, kay simikunata Jesus rimariqtin, yapamanta runakunaman qhawarirqan, paykunatataq nirqan: Sispallapiñan pachay kashan.

2 Rikushanin mana ancha kallpayoq kasqaykichista, kay pachapi qankunaman ninaypaq Taytamanta kamachisqa kasqay llapan rimayniykunata mana hamut’ay atisqaykichista.

3 Chhaynaqa, wasiykichisman riychis, rimasqay imaymanakunapitaq yuyaymanamuychis, sutiypitaq Taytamanta hamut’anaykichispaq mañakuychis, paqarinpaqtaq yuyayniykichista alistaychis; yapamantataq qankunaman hamusaq.

4 Kunanqa Taytamanmi rini, Israelpa chinkasqa t’aqankunamanwantaq risaq; manan Taytapaqqa chinkasqachu paykuna kanku, yachanmi mayman paykunata apasqanta, nispa.

5 Hinataq khaynata Jesus rimariqtin, yapamanta runakunaman qhawarirqan, waqashaqtataq paykunata rikurqan, mana kuyuspataq Payta qhawasharqanku, paykunawan astawanraq kananpaq mañakushankumanpas hina.

6 Paytaq paykunata nirqan: Qankunapaq khuyapayakuywan hunt’an ñat’iykuna kashan.

7 Kapusunkichischu onqosqakuna qankuna purapi? Kayman paykunata apamuychis. Kapusunkichischu wist’ukuna, ñawsakuna, such’ukuna, qhorosqakuna, qarachayoqkuna, ch’akisqakuna, upakuna, utaq imawanpas ñak’ariqkuna? Kayman paykunata apamuychis, paykunatataq alliyachisaq; khuyapakuyniyoqmi qankunawan kani, khuyapakuywan hunt’an ñat’iykuna kashan.

8 Rikushanin, Jerusalenpi wawqeykichiskunapaq ruwasqayta qankunaman qhawachinaypaq munasqaykichista; rikushanin qankuna alliyachinaypaq iñiyniykichis allin kasqanta, nispa.

9 Hinataq, khaynata Pay rimaqtin, llapan runakuna kushkapuralla onqoyniyoqninkuwan, ñak’ariqninkuwan, wist’unkuwan, ñawsankuwan, upankuwan, imaynapipas ñak’arichisqa kapuqninkupiwan rirqanku. Paytaq paykunata alliyachirqan, sapankanku Payman apamusqa kasqankuman hina.

10 Llapankutaq—alliyachisqa kaqkuna qhali kaqkunapiwan—chakinman k’umurikuspanku Payta yupaycharqanku; runakunamanta llapan hamuy atiqkunataq chakinta much’arqanku, weqenkuwantaq chakinta maqchirqanku.

11 Hinataq, huch’uy wawankuna apamusqa kanankupaq paykunata kamachirqan.

12 Chhaynataq, huch’uy wawankunata apamurqanku, Paypa muyuriqnin panpapitaq wawakunata churarqanku, Jesustaq chawpinkupi sayarqan; runakunataq kacharirqanku, llapan erqenkuna Payman apamusqa kanankukama.

13 Hinataq, llapanku apamusqa kaqtinku, Jesustaq chawpinkupi sayaqtin, runakunata kamachirqan panpapi qhonqorikunankupaq.

14 Panpapi qhonqorikuqtinkutaq, kikin ukhunpi Jesus waqarqan: Taytay llakisqan kashani, Israelpa wasinpa millay ruwayninkunarayku, nispa.

15 Kay simikunata niqtintaq Paypas panpapi qhonqorikurqan; Taytamantaq Pay rimarikurqan; Taytaman rimariykusqan imaymanakunataq mana qelqasqa kayta atikunmanchu; Pay uyariq runakunataq chayta sut’incharqanku.

16 Khaynatataq paykuna willanku: Manan hayk’aqpas ñawpaqqa ñawi rikurqanchu, nitaq rinripas uyarirqanchu, chhayna ancha sumaq imaymanakunataqa, Taytaman Jesus rimareqtin rikusqaykuta, uyarisqaykutawan hinaqa.

17 Manataqmi ima simipas rimayta atinmanchu, nitaq ima runaq qelqay atisqanpas kanmachu; manataqmi runakunaq sonqonku yuyata atinmanchu, chhayna ancha hatun ancha sumaq imaymanakunata, Jesuspa rimasqanta rikusqaykuta uyarisqaykutawan hinaqa; manataqmi pipas yuyayta atinmanchu, nunaykuta kusikuy hunt’asqanmanta, Taytaman noqaykurayku Pay rimarikusqan pachapi.

18 Hinataq, Taytaman rimarikuyta tukuqtin Jesus sayarirqan; ichaqa, ancha hatunpuni runakunaq kusikuyninku kaqtin, atipasqa paykuna karqanku.

19 Paykunamantaq Jesus rimarirqan, sayarinankupaq kamachispa.

20 Paykunataq panpamanta sayarirqanku, Paytaq paykunata nirqan: Saminchasqan kankichis iñiyniykichisrayku. Kunanqa, hunt’an kusikuyniy, nispa.

21 Kay simikunata niqtintaq Pay waqarqan, runakunataq chaymanta sut’inchanku; Paytaq huch’uy wawankunata -hukhukmanta hap’ispa samincharqan, Taytamantaq paykunarayku rimarikurqan.

22 Kayta ruwaspantaq yapamanta waqarqan.

23 Runakunamantaq rimarirqan, khaynatataq paykunata nirqan: Qhawariychis huch’uychaykichiskunata, nispa.

24 Rikunankupaq qhawariqtinkutaq, hanaqpachaniqman qhawarirqanku, kichakuqtataq hanaqpachata rikurqanku, nina chawpipi hina hanaqpachamanta urayamuqtataq angelkunata rikurqanku; urayamuspataq chay huch’uychakunata muyurirqanku, paykunataq ninawan muyurisqa karqanku; angelkunataq paykunata servirqanku.

25 Runakunataq rikurqanku, uyarirqanku, sut’incharqankutaq; yachankutaqmi sut’inchasqanku cheqaq kasqanta; llapankun rikurqanku, uyarirqanku, sapanka runa pay kikinmantapuni; paykunataq karqanku yaqa ishkay waranqa pishqa pachakniyoq nunakuna; qharikuna, warmikuna, wawakunapiwantaq karqanku.