1 Hinataq, kay simikunata Jesus niqtin, yachachisqankunaman huk hukmanta rimarirqan: Imatan noqamanta munankichis, Taytaman ripusqay pataman, nispa paykunata nispa.

2 Llapankutaq (kinsallataq mana) rimarirqanku: Runaq kawsayninman hina kawsasqayku pataman, waqyawasqaykiku yachachina tukukuyniyoq kaqtin, usqhaylla qhapaq suyuykiman hamunaykutan munayku, nispa.

3 Paytaq paykunata nirqan: Saminchasqan kankichis kayta noqamanta munasqaykichisrayku; chhaynaqa, qanchis chunka ishkayniyoq watayoq kasqaykichis pataman, noqaman qhapaqsuyuypi hamunkichis, noqawantaq samariyta tarinkichis, nispa.

4 Paykunaman rimariqtintaq, kinsa runakunaman kutirispa paykunata nirqan: Imatan qankunapaq ruwanayta munankichis, Taytaman ripuqtiy, nispa.

5 Sonqonkupitaq llakikurqanku, munasqankumanta Payman niyta mana qhariykachasqankurayku.

6 Paytaq paykunata nirqan: Yachanin yuyasqaykichista, manaraq judiokunaq hoqarisqan kashaqtiy ruwayniypi noqawan kaq ancha munasqay Juanpa noqamanta munasqantan munashankichis.

7 Chhaynaqa, aswan saminchasqan qankuna kankichis; manan hayk’aqpas wañuyta mallinkichischu; ichaqa, runakunaq wawankunaman Taytaq llapan ruwayninkuna rikunaykichispaqmi kawsankichis, Taytaq munayninman hina llapan imaymanakuna hunt’akunankamapuni, hanaqpachaq atiyninwan kusiqellpuypi hamuqtiy.

8 Manataqmi hayk’aqpas wañuypa nanayninkunata ñak’arinkichischu; ichaqa, kusiqellpuypi hamuqtiyqa, ñawiq ch’illmiriynillanpin wañuymanta mana-wañuyman t’ikrasqa kankichis; hinamantaq Taytaypa qhapaq-suyunpi saminchasqa kankichis.

9 Yapamantataq—mana nanayniyoqmi kankichis aychapi tiyanaykichiskama, nitaq llakikuyniyoqpas, ichaqa, runakunaq huchankunaraykulla. Kay llapantataq ruwasaq noqamanta munasqaykichisrayku. Kay pacha kanankama noqaman runakunaq nunankuta apamuytan munarqankichis.

10 Kayraykutaq kusikuyniyoq hunt’a kankichis, Taytaypa qhapaq-suyunpitaq tiyankichis; ari, hunt’an kusikuyniykichis kanqa, noqaman Taytaq qowasqan kusikuy hinapuni; noqa hinapunitaq kankichis, noqataq Tayta hinapuni kani; Tayta noqapiwantaq huklla kayku.

11 Qollanan Nunataq Taytamanta noqamantawan sut’inchan; Taytataq Qollanan Nunata noqarayku runakunaq wawankunaman qon, nispa.

12 Hinataq, kay simikunata Jesus rimariqtin, sapankankuta ruk’ananwan llamirqan, qhepakunanku kaq kinsallatataq mana; hinamantaq ripurqan.

13 Hanaqpachataq kicharisqa karqan, paykunataq hanaqpachaman apasqa karqanku, mana-rimay atina imaymanakunatataq rikurqanku, uyarirqankupiwan.

14 Rimanankupaq hark’asqataq karqanku; manataqmi paykunaman qosqachu atiy karqan, rikusqanku uyarisqankupiwan imaymanakunamanta rimanankupaq.

15 Runa-kurkunkupichu ichari manachu runa-kurkunkupi kasqankutaqa manan niyta atirqankuchu; paykunaq lliphipipisqa hinan paykunaman rikch’akurqan, kay aycha runa-kurkumanta mana wañuqman t’ikrasqa hina, Yayaq imaymanankuna rikuy atinankupaq.

16 Ichaqa, yapamantan hallp’a patapi yachachirqanku; chaypiwanpas manan uyarisqankumantachu, nitaq rikusqankumantawanchu yachachirqanku, hanaqpachapi paykunaman kamachiy qosqa kasqanrayku.

17 Kunanqa, wañuqchu ichari mana wañuqchu karqanku lliphipipisqa kasqankumanta chaytaqa manan yachanichu.

18 Ichaqa, kaytan yachani qosqa kasqa qelqaman hina—hallp’a patantan rirqanku, llapan runakunamantaq yachachirqanku; yachachiyninkupi llapan kreyiqkunata iñeqkuna-huñuman huñuspanku, paykunata unuchaspanku; llapan unuchakuqkunataq Qollanan Nunata chaskirqanku.

19 Iñeqkuna-huñumanta mana kaqkunataq watana wasiman paykunata churarqanku. Manataq watana wasikuna paykunata hark’ayta atirqankuchu, ishkaypi ch’eqtakusqankurayku.

20 Hallp’a ukhuman churasqataq karqanku; ichaqa, Yayaq rimayninwanmi hallp’ata k’irirqanku, hinataq Yayaq atiyninwan hallp’a ukhumanta qespichisqa karqanku; chhaynataq, paykuna hark’ananpaq hina t’oqokunata mana hasp’iyta atirqankuchu.

21 Kinsa kutitaq hornuman choqasqa karqanku, manataq k’iriyta chaskirqankuchu.

22 Ishkay kuti salqa uywakunaq wasinman choqasqa karqanku, paykunataq salqa uywakunawan pukllarqanku, uña ovejawan erqeq pukllasqanta hina, manataq k’irisqachu karqanku.

23 Hinataq, Nephiq llapan runankuna purapi purirqanku, hallp’a patapi llapan runakunamantaq Cristoq yachachiyninta yachachirqanku; runakunataq Wiraqochaman t’ikrakurqanku, Cristoq iñeqkuna-huñunman huñunakuspanku. Khaynatataqmi chay runa-miraypa runankuna saminchasqa karqanku, Jesuspa rimayninman hina.

24 Kunantaq noqa Mormon kay imaymanakunamanta rimayta tukuni, huk pachallaqa.

25 Mana hayk’aqpas wañuyta malliqkunaq sutinkuta qelqanaypaqñan kasharqani, ichaqa, Wiraqochan hark’awarqan; chhaynaqa, manan qelqanichu, runakunamanta pakasqan kanku.

26 Ichaqa, rikurqanin paykunata, serviwarqankutaqmi.

27 Hawarunakuna chawpipin kanqaku, manataq paykunata hawarunakuna reqsinqakuchu.

28 Judiokuna chawpipipas kanqakun, manataq paykunata judiokuna reqsinqakuchu.

29 Hinataq, yachaysapa kayninpi allin kasqanta Wiraqocha rikuqtin, Israelpa ch’eqerisqa llapan t’aqankunaman yachachinqaku, llapan llaqtakunaman, ayllukunaman, simikunaman, runakunamanwan; paykunamantataq askha nunakunata Jesusman apamunqaku, munasqanku hunt’anankupaq, konbensinapaq Yayaq atiynin paykunapi kasqanraykupiwan.

30 Yayaq angelninkuna hinan kanku, Jesuspa sutinpi Taytaman paykuna rimarinkuman chaytaq, paykuna kikinku qhawachikunkuman, paykunaman allin rikhurisqanpi runamanpas.

31 Chhaynaqa, ancha hatun ancha sumaq ruwaykunan paykunaq ruwasqan kanqa, Cristoq taripanan-tiyananpa ñawpaqenpi runakuna sayanankupaq hamuq hatun p’unchawpa ñawpaqinta.

32 Ari, hawarunakuna purapipas ancha hatun ancha sumaq ruwaymi paykunaq ruwasqan kanqa, chay taripana p’unchawpa ñawpaqenta.

33 Cristoq llapan ancha sumaq ruwayninkunamanta rimaq llapan qelqakunayoq kawaqchis chayqa, yachawaqchismi Cristoq rimayninman hina kay imaymanakuna cheqaqtapuni wakinanta.

34 Ay! Jesuspa rimayninkunata, Paypa akllasqanta, paykunaman kachasqanpa rimayninkunatawan mana uyariy munaqmanta. Jesuspa rimayninkunata, Paypa kachasqanpa rimayninkunatawan mana chaskiy munaqkunaqa, manan Payta chaskinkuchu; chhaynaqa, manan paykunata qhepa p’unchawpi Pay chaskinqachu.

35 Aswan allinmi paykunapaq kanman karqan mana paqarinanku. Qespiy hamunanpaq runakunaq saruykachasqan phiñarichisqa Yayaq phiñakuyninmanta lloqsiytachu yuyarqankichis?

36 Kunantaq Wiraqochaq akllasqan runakunamanta rimasqayta; ari, hanaqpachaman apasqa kinsamantapuni; manan yachanichu, wañuymanta mana-wañuyman ch’uyanchasqachus kasqankuta.

37 Ichaqa, qelqasqaymantapachaqa Wiraqochatan tapurqani, Paytaq yachachiwarqan, runa-kurkunkupi huk t’ikray kananta, mana chayqa wañuytan mallinanku.

38 Chhaynataq, wañuyta mana mallinankupaq runa-kurkunkupi huk t’ikray ruwasqa karqan; mana nanayniyoq ni llakikuyniyoqpas kanankupaq, ichaqa, runakunaq huchankunaraykulla.

39 Kay t’ikrayqa manan qhepa p’unchawpi kanan t’ikrayman hinachu karqan; ichaqa, paykunapi ruwasqan huk t’iray karqan; hinataq saqraqa mana paykunapi atiyniyoq kayta atinmanchu, paykunata mana wateqananpaq. Aychapi qollanachisqan karqanku, chanintaq karqanku; hallp’aq atiyninkunataq mana paykunata hap’iyta atirqanchu.

40 Khayna kaypin paykuna qhepananku karqan, Cristoq taripaynin p’unchawkama; chay p’unchawpitaq aswan hatun t’ikrayta chaskinanku karqan, Taytaq qhapaq-suyunpi chaskisqa kanankupaq, manaña astawan lloqsinankupaq; ichaqa, hanaqpachapi Yayawan wiñaypaq tiyanankupaq.