1 Hinataq, kay imaymanakunata Jesus willaqtin, runakunaman chayta hamut’achirqan; paykunamantaq, llapan imaymanakunata hatuntapas huch’uytapas hamut’achirqan.

2 Paytaq nirqan: Kay mana kapusqasuykichis qelqakunataqa, Taytan kamachimuwarqan qankunaman qonaypaq; allin yachaymi Paypi karqan, hamuq mirayman qosqa kananpaq.

3 Llapan imaymanakunatataq paykunaman hamut’achirqan, qallariymantapachapuni, kusiqellpunpi hamunan pachakama; ari, hallp’a pataman llapan hamunan imaymanakunata, wapu ruphaywan imamanta hallp’a ruwasqa kasqan imaymanakuna chullunankama, hallp’ataq mayt’u raphi hina mayt’ukunankama, hanaqpacha kay pachapiwan pasanankama ima;

4 Ancha hatun qhepa p’unchawkamapuni; llapan runakuna, ayllukuna, llaqtakuna, simikunapiwan Yayaq ñawpaqenpi sayaqtinku; ruwayninkumanta—allinña mana allinña kaqtinpas—taripasqa kanankukamapuni.

5 Allin ruwaykuna kaqtinqa, wiñay kawsaypaq kawsariyman; millay kaqtintaq kondenasionpaq kawsariyman; kushkalla kaspanku, huk huk makipi, hukkaqtaq hukkaq makipi; manaraq pacha qallariqtin kaq Cristopi khuyapakuyman, chaninchayman, qollanan kayninmanwan hina.

6 Manan huk pachaknin t’aqallantapas kay qelqapi qelqakuyta atikunmanchu, runakunaman cheqaqtapuni Jesus yachachisqanmanta;

7 Ichaqa, Nephiq raphinkunapin kashan, runakunaman yachachisqanpa aswan ashkanninkuna.

8 Kaykunatataq qelqarqani, runakunaman yachachisqan imaymanakunamanta aswan chikanninta; kaykunatataq qelqani, hawarunakunamanta kay runakunaman yapamanta apamusqa kananpaq, Jesuspa rimasqan simikunaman hina.

9 Kayta chaskiqtinkutaq—nesitakuntaqmi qallariypi kaykunayoq kananku, iñiyninkuta pruebananpaq—kay imaymanakunata kreyinqaku chaytaq, aswan hatun imaymanakuna paykunaman willasqa kanqa.

10 Kay imaymanakunata mana kreyiqtinkutaq, chay hatun imaymanakuna paykunamanta hark’asqa kanqa, kondenasionninkupaq.

11 Nephiq raphinkunapi llapan qelqasqa kasqanta qelqanaypaq hinaña kasharqani, ichaqa Wiraqocha hark’awarqan—llaqtaypa iñiynintan pruebasaq, nispa.

12 Chhaynaqa, Wiraqochaq kamachiwasqan imaymanakunatan noqa Mormon qelqani. Kunantaq noqa Mormon rimayniykunata tukuni, kamachisqa kawasqan imaymanakuna qelqaytataq qatillani.

13 Chhaynaqa, cheqaqtapuni runakunata Wiraqocha kinsa p’unchaw yachachisqantan yachanaykichista munayman; chay patamantaq pasaqlla paykunamanta watukamurqan, pasaqllataq t’antata phatmirqan, saminchaspataq paykunaman qorqan.

14 Hinataq, rimasqa runakunaq wawankunaman yachachirqan, servirqanpiwan; qallunkuta pashkariqtintaq ancha hatun ancha sumaq imaymanakunata taytankuman rimarirqanku, runakunaman Pay rimasqanmanta aswan hatuntaraq; qallunkutan Pay pashkarirqan rimayta atinankupaq.

15 Hinataq, hanaqpachaman seqayapusqan pataman—ishkaykaq kutitan paykunamanta watukamusqa karqan, Taytamantaq ripusqa karqan, llapan onqosqankunata weqrunkunatawan alliyachisqan pataman, ñawsankuq ñawinkuta kicharisqan pataman, upakunaq rinrinkuta kicharisqan pataman; imaymana laya hanpiykunata paykuna purapi ruwasqan pataman, wañusqakunamanta huk runata hatarichisqan patamanwan, paykunaman atiyninta qhawachisqan, Taytamantaq seqasqan patamanwan—

16 Hinataq tutamantanpi runakuna huñunakurqanku, paykunataq rikurqanku uyarirqanku ima kay erqekunata; ari, wawakunapas siminkutan kicharirqanku, ancha sumaq imaymanakunatataq rimarirqanku; erqekunaq rimasqanku imaymanakunataq mana pipas qelqananpaq hark’asqa karqan.

17 Hinataq, Jesuspa akllasqan yachachisqakuna, chay pachamantapacha paykunaman llapan hamuqkunata unuchayta yachachiytawan qallarirqanku. Jesuspa sutinpi llapan unuchasqa kaqkunataq Qollanan Nunawan hunt’a karqanku.

18 Askhataq paykunamanta rikurqanku uyarirqankutaq mana rimay atina imaymanakunata, chaykunataq qelqasqa kananmanta hark’asqa kapun.

19 Paykunataq yachachinakurqanku, servinakurqankupiwan; llapan imaymanakunataq hukllapi kachirqanku paykuna purapi, sapanka runa chaninchaywan paykuna purapi ruwaspanku.

20 Hinataq, llapan imaymanakunata ruwarqanku Jesus kamachisqanman hina.

21 Jesuspa sutinpi unuchasqa kaqkunataq, Cristoq iñeqkunahuñun nispa waqyasqa karqanku.