1 Cheqaqtapunin niykichis, huk señaltan qosqaykichis, kay imaymanakuna kananpaq hinaña kanan pachata yachanaykichispaq—Unay ch’eqechisqa kasqankumanta llaqtayta huñumusaq, O Israelpa wasin, yapamantataq Sionniyta paykuna purapi hatarichisaq;

2 Kaytan señalpaq qosqaykichis—Cheqaqtapunin qankunaman niykichis, kay willasqay imaymanakuna, kunan p’unchaw pataman noqa kikiymanta, Taytamanta qankunaman qosqa Qollanan Nunaq atiyninpiwan qankunaman willanay imaymanakuna hawarunakunaman reqsichisqa kaqtin, Jakobpa wasinpa puchun kaq kay runakunamanta, paykunaq ch’eqechinanku kay llaqtaymantawan yachanankupaq;

3 Cheqaqta cheqaqtapunin niykichis, kay imaymanakuna paykunaman Taytamanta reqsichisqa kaqtin, Taytamantataq lloqsimoqtin, paykunamantataq qankunaman;

4 Yachaysapa kaymi Taytapi kan, kay hallp’api paykuna hatarichisqa kananku; Taytaq atiyninwantaq qespi llaqta hatarichisqa kananku, kay imaymanakuna paykunamanta ch’awchuykichispa puchunkuman hamunanpaq, llaqtanwan rimanakusqan Taytaq rimanakuynin hunt’akunanpaq, O Israelpa wasin;

5 Chhaynaqa, kay ruwaykuna, kunanmanta qhepaman qankuna purapi ruwakunan ruwaykunapiwan hawarunakunamanta, millay ruwaykunarayku mana kreyiypi urmaq ch’awchuykichisman lloqsimuqtin;

6 Khaynatan Tayta munan, hawarunakunamanta lloqsimunanpaq, hawarunakunaman atiyninta qhawachinanpaq; kayrayku hawarunakuna sonqonkuta mana rumiyachinqakuchu chayqa, yuyayninkuman kutirimuspa noqaman hamunankupaq, sutiypi unuchasqa kanankupaq, yachachiyniypa cheqaqninkunata yachanankupaq, llaqtaywan yupasqa kayta atinankupaq O Israelpa wasin.

7 Kay imaymanakuna hamuqtintaq, kay imaymanakunata ch’awchuykichis yachayta qallarinqaku—paykunapaq kay señal kanqa, Taytaq ruwaynin ña qallarisqantaña yachanankupaq, Israelpa wasinmanta kaq runakunaman ruwasqan rimanakuynin hunt’akunanpaq.

8 Chay p’unchaw chayamuqtintaq, inkakuna siminkuta wishq’anqaku; paykunaman mana willasqa kasqantan rikunqaku, mana uyarisqankutataq yuyaykunqaku.

9 Haqay p’unchawpin noqarayku huk ruwayta Tayta ruwanqa, chaytaq paykuna purapi ancha hatun ancha sumaq ruwana kanqa; chay imaymanakuna mana kreyiqkunataq paykuna purapi kanqa, huk runaña paykunaman willanqa chaypas.

10 Ichaqa, warmaypa kawsayninqa makiypin kanqa, chhaynataq mana paykuna payta k’irinqakuchu, paykunaraykuña q’oyusqa kanqa chaypas. Chaypiwanpas paytan alliyachisaq, paykunamantaq qhawachisaq saqraq atoqrayayninmanta yachayniy aswan hatun kasqanta.

11 Chhaynataq, noqa Jesucristoq rimayniykunapi mana kreyiqkunaqa—chaytataq Tayta paywan hawarunakunaman apachimunqa, paymantaq atiyta qonqa chaykunata hawarunakunaman apamunanpaq (Moisespa nisqanman hinapunin ruwasqa kanqa)—rimanakuyniypa llaqtay chawpimantan qarqosqa kanqaku.

12 Jakobpa puchun kaq llaqtaytaq hawarunakuna chawpipi kanqaku; ari, sach’a-sach’api uywakuna chawpipi puma hina paykuna chawpipi, huñu ovejakuna chawpipi malta puma hina; paytaq chawpinta rispa sarukachan, llik’intaq, manataq pipas hark’ayta atinmanchu.

13 Makinkun awqanku patapi hoqarisqa kanqa, llapan awqankunataq kuchusqa kanqaku.

14 Ari, ay hawarunakunamanta yuyayninkuman mana kutirimunqakuchu chayqa; haqay p’unchawpin kanqa—nispan Tayta nin—chawpiykichismantan kaballuykichista kuchusaq, karruykichistataq ñut’usaq;

15 Hallp’aykiq llaqtankunatapas thuñisaqmi, llapan pukaraykikunatataq taqmasaq;

16 Hallp’aykimantan layqakuykunata chinkachisaq, manañataq astawan watukuy willaqkuna kapusunkichischu.

17 Rikch’ayniykichiskunatapas wit’usaqmi, qankuna chawpimantataq sayariq rikch’ayniykichista; manañataq astawan yupaychankichu makiykiq ruwasqankunata;

18 Sach’a-sach’aykikunatataq chawpiykimanta t’irasaq, chhaynallatataq llaqtaykikunata thuñisaq.

19 Hinataq, llapan llullakuykuna, yukaykuna, munapakuykuna, churanakuykuna, millay kurak kaykuna, map’akuykunapiwan tukukunqa.

20 Hinataq, haqay p’unchawpi, yuyayninman kutirimuspa Ancha-munasqa Churiyman mana hamuqtaqa, paytan llaqtay chawpimanta kuchusaq, O Israelpa wasin, ninmi Tayta.

21 Aynikuyniyta phiñakuytawanmi paykunaman chayachimusaq mana kreyiqkunaman hinapuni, mana hayk’aq uyarisqankuta hina.

22 Ichaqa, yuyayninkuman kutirimuspa rimayniykunata uyarinqaku, manataq sonqonkuta rumiyachinqakuchu chayqa, paykuna purapin iñeqkuna-huñuyta hatarichisaq, paykunataq rimanakuyman haykumunqaku, chaskikuyninkupaq kay hallp’a qosqay kay Jakobpa puchunwan yupasqataq kanqaku.

23 Jakobpa puchun llaqtayta, Israelpa wasinmanta llapan hamuqkunatawantaq yanapanqaku huk llaqtata hatarichinankupaq, Mosoq Jerusalen nispa waqyasqataq kanqa.

24 Hinamantaq llaqtayta yanapanqaku, hallp’a patapi ch’eqechisqa kaqkunata Mosoq Jerusalenman huñusqa kanankupaq.

25 Chaymantaq hanaqpachaq atiynin paykuna puraman hamunqa; noqapas chawpipin kasaq.

26 Hinamantaq haqay p’unchawpi Taytaq llank’aynin qallarinqa, kay runakunaq puchunman yayaq-yachachiynin yachachisqa kashaqtin. Cheqaqtapunin niykichis, haqay p’unchawpin Taytaq llank’aynin qallarinqa, llaqtaypa llapan ch’eqechisqakuna purapi; ari, Jerusalenmanta Taytaq apasqan chinkasqa t’aqakuna purapipas.

27 Ari, llaqtaypa llapan ch’eqechisqakuna chawpipin llank’ay qallarinqa, Taytataq ñanta allichanqa, chhayna noqaman hamunankupaq, sutiypi Taytaman waqyanankupaq.

28 Ari, chaymi Taytawan ruway qallarinqa, llapan llaqtakuna chawpipi ñanta allichanankupaq, chaywan Paypa llaqtan wasinkuman huñusqa kananpaq, chaskikuyninkuq hallp’anman.

29 Paykunataq llapan llaqtakunamanta lloqsimunqaku; manataqmi llukullachu lloqsimunqaku, nitaq phawaspachu; noqan ñawpaqenkuta risaq, noqataq qhepanku qhawaq kasaq, ninmi Tayta.