1 Hinataq, Nephiq llaqtanmanta askhapuni runakuna huñunasqa karqanku, Waleq hallp’api kaq Wiraqochaq Wasinpa muyureqninpi. Utirayasharqankun, paykuna purataq tapunakusharqanku qhawachinakusharqankupiwan susidisqan ancha hatun ancha sumaq t’ikraykuna kasqanmanta.

2 Wañusqanmanta señal qosqa kaq kay Jesucristomanta imataqmi rimanakusharqanku.

3 Hinataq khaynata paykuna pura rimashaqtinku, hanaqpachamanta hamuqta hina huk aruta uyarirqanku; muyureqnintataq qhawarirqanku, uyarisqanku aruta mana hamut’arqankurayku; manataqmi ch’ila aruchu nitaq wapu kallpayoq aruchu karqan; chaypiwanpas, huch’uy arukalla karqan chaypas, uyariqkunaq sonqonkukaman haykurqan; hinataq mana karqanchu runa-kurkunkuq ima kaqninpas mana khatatatachisqa; ari, nunankukamapunin haykurqan, sonqonkutataq rawrarichirqan.

4 Hinataq, yapamanta chay aruta uyarirqanku, manataq hamut’arqankuchu.

5 Yapamantataq kinsakaq kutita chay aruta uyarirqanku, rinrinkutataq uyarinankupaq kicharirqanku, aru hamusqan qayllamantaq qhawarqanku, mana kuyurispataq aruq hamusqan hanaqpachaneqman qhawarqanku.

6 Kinsakaq kutipitaq uyarisqanku aruta hamut’arqanku, paykunatataq nirqan:

7 Qhawariychis Ancha-munasqay Churiyta, Paypin allin kusisqa kani, Paypitaqmi sutiyta kusiqellpuchirqani—Payta uyariychis, nispa.

8 Hinataq hamut’asqankuman hina yapamanta hanaqpachaneqman qhawarirqanku, huk Qharitataq hanaqpachamanta urayamuqta rikurqanku, yuraq p’achawan p’achayusqataq Pay karqan; urayamuspataq paykunaq chawpinkupi sayarqan; llapan runakunaq ñawinkutaq Paypi karqan, manataq paykuna purallapas siminku kichariyta qhariykacharqankuchu, manataq yacharqankuchu ima ninanta; paykunaman huk angel rikhurimusqantataq yuyarqanku.

9 Hinataq makinta chutarispa khaynata runakunata nirqan:

10 Jesucriston kani, pachamanmi hamunqa nispa unanchaqkunaq sut’inchasqanku.

11 Noqan kani pachaq k’anchaynin kawsayninpiwan; Taytaq qowasqan p’oshqo qeromantataqmi ukyarqani, Taytatataq kusiqellpuchirqani runakunaq huchankunata noqapi apaspa; chaypitaq Taytaq munayninta ñak’arirqani, qallariymantapacha llapa imaymanakunapi, nispa.

12 Hinataq kay simikunata Jesus rimariqtin, llapan runakuna panpaman urmarqanku; yuyarirqankun, hanaqpachaman seqasqan pataman paykunamanta Cristo watukunanmanta paykuna purapi unanchasqa kasqanta.

13 Hinataq paykunaman Wiraqocha nirqan:

14 Sayariychis noqamantaq hamuychis, waqtaypi makiykichista churanaykichispaq; makiykunapi, chakiykunapiwan killay takarpuq k’irisqanta llaminaykichispaq; Israelpa Yayan, llapa pachantinpa Yayanpiwan kasqayta, runakunaq huchankunarayku wañuchisqa kasqaytawan yachanaykichispaq, nispa.

15 Hinataq runakunaqa ñawparispaku waqtanpi makinkunata churarqanku; makinkunapi, chakinkunapiwan killay takarpuq k’irinkunatataq llamirqanku. Kaytataq ruwarqanku huk hukmanta rispanku, llapanku rinankukama; ñawinkunawantaq rikurqanku, makinkunawantaq llamirqanku, cheqaqtapunitaq yacharqanku sut’incharqankutaq, hamunanmanta unanchaqkunaq qelqasqan Pay kasqanta.

16 Llapanku rispanku paykuna kikinkumanta rikuspankutaq, huk kunkallapi qaparirqanku:

17 Hosanna! Saminchasqa kachun Aswan Hatun Yayaq sutin! nispa. Jesuspa chaninkunaman urmaykuspataq Payta yupaycharqanku.

18 Hinataq Nephita rimarirqan (runakuna chawpipin Nephi karqan) paytataq achhuykamunanpaq kamachirqan.

19 Nephitaq sayarispa ñawparirqan, Wiraqochaq ñawpaqenpi k’umurikuspataq chakinkunata much’arqan.

20 Wiraqochataq sayarinanpaq payta kamachirqan. Sayarispataq ñawpaqenpi Nephi sayarqan.

21 Wiraqochataq payta nirqan: Atiyta qanman qoyki yapamanta hanaqpachaman seqaqtiy kay runakunata unuchanaykipaq, nispa.

22 Yapamantataq hukkunata waqyarqan, chhaynallatataq paykunata nirqan; paykunamantaq unuchanankupaq atiyta qorqan. Paytaq paykunata nirqan: Khaynatan unuchankichis; amataq ima churanakuypas qankuna purapi kanqachu.

23 Cheqaqtapunin niykichis, rimayniykichiswan pipas yuyayninman kutirimunqa, sutiypitaq unuchakuyta munanaqa chayqa, khaynatan paykunata unuchankichis—Rispan unupi sayankichis, sutiypitaq paykunata unuchankichis.

24 Kaymi ninaykichis simikuna—paykunata sutinkumanta waqyaspa khaynata ninkichis:

25 Jesucristomanta atiy qowasqa kaspan, noqa unuchayki Taytaq, Churiq, Qollanan Nunaqpiwan sutinpi. Hinataq kachun, nispa.

26 Hinamantaq unupi paykunata winankichis, yapamantataq unumanta lloqsimunkichis.

27 Khaynatan sutiypi unuchankichis; cheqaqtapunitaq niykichis, Tayta, Churi, Qollanan Nunapiwanqa hukllan kanku; Taytapin noqa kani, noqapitaq Tayta; Tayta noqapiwantaq huklla kayku.

28 Kamachisqayman hinataq unuchankichis. Amataq ima churanakuykunapas qankuna purapi kanqachu, kunankama kasqanta hina; nitaq qankuna purapi ima churanakuykunapas kanqachu yachachiyniykunamanta, kunankama kasqanta hina.

29 Cheqaqta cheqaqtapunin niykichis, churanakuy nunayoq kaqqa manan noqamantachu; ichaqa llapan churanakuykunaq taytan saqraqmi; paytaq runakunaq sonqonkuta qaywirin paykuna pura phiñarikuywan churanakunankupaq.

30 Phiñarikuyman runakunaq sonqonkuta paykuna pura kontra qaywiriyqa manan yachachiyniychu; ichaqa, kaymi yachachiyniy—chay imaymanakuna qollochisqa kanan.

31 Cheqaqta cheqaqtapunin niykichis, willasaykichismi yachachiyniyta.

32 Kaytaqmi yachachiyniy, Taytaq qowasqan yachachiytaqmi kay; noqataq Taytamanta sut’inchani, Taytataq noqamanta sut’inchan, Qollanan Nunataq Taymanta noqamantawan sut’inchan; noqataq sut’inchani tukuy runakunata yuyayman kutirimuspa noqapi kreyinankupaq Tayta kamachisqanta.

33 Noqapi kreyispa unuchakuqtaq qespichisqa kanqa; paykunataqmi Yayaq qhapaq suyunta chaskinqaku.

34 Noqapi mana kreyiq mana unuchakuq imataq kondenasqa kanqa.

35 Cheqaqta cheqaqtapunin niykichis, kay, yachachiyniy kasqanta, kaymantataq Taytamanta sut’inchani. Noqapi kreyiqtaq kreyillantaq Taytapipas, paymantaq Tayta noqamanta sut’inchanqa, paymantataq ninawan Qollanan Nunapiwan watukunqa.

36 Khaynatataq noqamanta Tayta sut’inchanqa, Qollanan Nunataq payman sut’inchanqa Taytamanta noqamantawan. Tayta, noqa, Qollanan Nunapiwanqa hukllan kayku.

37 Yapamantataq niykichis, yuyayniykichismanmi kutirinaykichis, huch’uy erqe hinataq kanaykichis, sutiypitaq unuchakunaykichis; mana chayqa, manan imaynatapas kaykunata chaskiyta atinkichischu.

38 Yapamantataq niykichis, yuyayniykichismanmi kutirimunaykichis, sutiypitaq unuchasqa kanaykichis, huch’uy erqe hinataq kanaykichis, mana chayqa, manan imaynatapas Yayaq qhapaq suyunta chaskinkichischu.

39 Cheqaqta cheqaqtapunin niykichis, kay, yachachiyniy kasqanta, kay patapi pipas hatarichisqataq qaqay patapi perqan, manataq supay wasiq punkunkuna paykuna kontra sayanqachu.

40 Pipas kaymanta aswan askhata utaq aswan pisitapas willanqa yachachiyniyta hinataq hatarichinqa chayqa, saqramantan hamun, manataqmi qaqaypi perqasqachu; ichaqa, aqopi teqsichasqatan perqan; supay wasiq punkuntaq kicharisqa kashan chaykunata chaskinanpaq, unukuna hamuqtin, paykunta wayrakuna soq’aqtin.

41 Chhaynaqa, riychis kay runakuna puraman, rimarisqay simikunatataq hallp’aq tukukuyninkunaman willamuychis.