1 Hinataq kay simikunata Nephiman, waqyasqa kaqkunamanwan rimareqtin, (unuchanankupaq kallpata atiytawan chaskiq waqyasqakunaqa chunka ishkayniyoqmi karqanku) runakunaman makinta chutarispa nirqan: Saminchasqan kankichis, sirviqniykichis kanankupaq, warmaykichis kanankupaqwan qankuna puramanta kay chunka ishkayniyoq akllasqaykunaq rimayninkunata uyarinkichis chayqa Unuwan unuchanasuykichispaqmi paykunaman atiyta qorqani; unuwan unuchasqa kasqaykichis patamantaq, ninawan Qollanan Nunawan ima noqa unuchasaykichis; chhaynaqa, saminchasqan kankichis, rikuwasqaykichis pataman, noqa kasqayta yachasqaykichis patamanwan noqapi kreyispa unuchasqa kankichis chayqa.

2 Yapamantataq—aswan saminchasqan kanqaku, rimayniykichispi kreyiqkuna, rikuwasqaykichismanta noqa kasqaymantawan paykunaman sut’inchasqaykichisrayku. Ari, saminchasqan kanku, rimayniykichispi kreyispa llanp’u sonqo kayman hamuspa unuchasqa kaqkunaqa. Ninawan Qollanan Nunawan iman watukusqa kanqaku, huchanku panpachaytataq chaskinqaku.

3 Ari, saminchasqan kanku noqaman hamuq nunapi wakchakuna, paykunaqmi hanaqpacha qhapaq-suyu.

4 Yapamantataq—saminchasqan kanku lliw waqaqkuna, sonqochasqan paykuna kanqaku.

5 Saminchasqan kanku llanp’u sonqoyoqkuna, hallp’atan paykuna chaskinqaku.

6 Saminchasqan kanku, chaninchayrayku yarqachikuqkuna ch’akichikuqkunapiwan, Qollanan Nunawanmi hunt’asqa kanqaku.

7 Saminchasqan kanku khuyapakuywan hunt’asqa kaqkuna, khuyapakuytan chaskinqaku.

8 Saminchasqan kanku ch’uya sonqoyoq kaqkuna, Yayatan paykuna rikunqaku.

9 Saminchasqan kanku sumaq kawsay hataricheqkuna, Yayaq wawankuna nispan waqyasqa kanqaku.

10 Saminchasqan kanku, sutiyrayku qatikachasqa kaqkuna, paykunaqmi hanaqpacha qhapaq-suyu kanqa.

11 Saminchasqataqmi kankichis noqarayku runakuna k’amisuqtiykichis, qatiqachasuqtiykichis, mana imamanta imaymana millayta qankuna kontra rimaqtinku.

12 Ancha hatun kusikuyniyoq, ancha k’uchikuyniyoqtaqmi kankichis; ancha hatunmi hanaqpachapi suñaykichis kanqa; chay hinatan paykuna qatikacharqanku ñawpaqniykichis riq unanchaqkunata.

13 Cheqaqta cheqaqtapunin niykichis—hallp’aq kachin kanaykichispaqmi qoykichis; ichaqa mishk’iyninta kachi chinkanqa chayri, imawanmi hallp’a kachichasqa kanqa? Chhaynaqa, manan imapaqpas kachi allinchu, ichaqa choqasqa kaspa runakunaq sarukachasqan kanallanpaqmi.

14 Cheqaqta cheqaqtapunin niykichis—kay runakunaq k’anchaynin kanaykichispaqmi qoykichis. Moqo patapi kaq llaqtaqa manan pakasqa kayta atikunmanchu.

15 Velata k’ancharichispachu runakunari kanasta ukhupi chayta churanku? Manan, ichaqa, k’aspi patapin churanku, wasipi llapan kaqkunamantaq k’anchayta qon.

16 Chhaynaqa, kay runakunaq ñawpaqenpi k’anchayniykichis k’ancharinanta kachariychis, allin ruwayniykichista rikuspanku hanaqpachapi kaq Taytaykichista yupaychanankupaq.

17 Ama yuyaychischu kamachisqa-simita, utaq unanchaqkunatapas chinkachinaypaq hamusqayta. Manan chinkachiqchu hamurqani, ichaqa, hunt’aqmi.

18 Cheqaqtapunin niykichis, manan huk ch’iñillapas ni huk seq’ellapas kamachisqa-simimanta pasarqanchu, ichaqa noqapin llapan hunt’akurqan.

19 Taytaypa kamachisqa-siminta, kamachiyninkunatawanmi qorqaykichis, noqapi kreyinaykichispaq, huchaykichiskunamanta kutirimunaykichispaq; p’akillisqa sonqowan p’akillisqa nunapiwan noqaman hamunaykichispaq. Ñawpaqeykichispin kamachiykuna kashan, kamachisqa-simitaq hunt’asqa kapun.

20 Chhaynaqa, noqaman hamuychis, qespichisqataq kaychis; cheqaqtapunitaq niykichis, kunan pacha qankunaman kamachisqaykunata mana waqaychankichischu chayqa, manan imaynatapas hanaqpacha qhapaq-suyuman haykunkichischu.

21 Uyarirqankichismi, ñawpa pacha runankunaq nisqankuta, qelqastaqmi ñawpaqeykichispi kashan—aman runata wañuchinkichu, pipas runata wañuchinqa chayqa, Yayaq taripayninpa ch’ikinpin rikukunqa, nispa nisqata.

22 Ichaqa noqa niykichis—pipas wawqenwan phiñarisqa kaqqa, taripayninpa ch’ikikuyninpin kanqa. Pipas wawqenta hat’upa nispa ninqa chayqa, konsejoq ch’ikikuyninpin kanqa; pipas ninqa—yaw upa nispa chayqa, supay wasiq ninanpa ch’ikikuyninpin kanqa.

23 Chhaynaqa, noqaman hamunkichis, utaq noqaman hamuyta munankichis, hinaspataq yuyarinkichis qankunawan wawqeykichis phiñarisqa kasqanata chayqa,

24 Riychis wawqeykichisman, ñawpaqtataq wawqeykichiswan allipuranakamuychis, hinamantaq noqaman hamuychis sonqoq hunt’a munayninwan, noqataq chaskisaykichis.

25 Awqaykichiswan usqhaylla rimanakuychis, paywan purishanaykichiskama; ima pachapipasñataq pay hap’isunkichisman, watana wasiman churasqataq kawaqchis.

26 Cheqaqta cheqaqtapunin niykichis, manan imaynatapas chaymanta lloqsimunkichischu, ichaqa, qhepa senine sayachipusqaykichis patamanñan. Watana wasipi kanaykichiskamari sayachiwaqchischu huk seninellatapas? Cheqaqta cheqaqtapunin niykichis, manan, nispa.

27 Ñawpa pachapi runankunaq qelqasqankun kashan—aman wasanchakunkichischu, nispa.

28 Ichaqa, noqa niykichis, pipas huk warmita qhawan payta munapakuspa chayqa, ñan sonqon ukhupi wasanchakunña, nispa.

29 Huk kamachiyta qoykichis, kaykunamanta mana imapas sonqoykichisman haykunanta kacharinaykichispaq.

30 Aswan allinmi kay imaymanakunata mananchanaykichis, chaywantaq chakataykichista apankichis, supay wasiman choqasqa kanaykichismantaqa.

31 Qelqasqan karqan—pipas warminta qarqonqa chayqa, t’aqanakuy qelqata payman qochun, nispa.

32 Cheqaqta cheqaqtapunin niykichis, pipas warminta qarqonqa yoqoy mana kaqtin chayqa, wasanchachinmi payta; pipas chay t’aqasqa warmiwan sawakuqtaq wasanchakun.

33 Qelqasqataqmi kashan—aman qan kikiyki sullullchakunkichu, ichaqa, Wiraqochaman juramentoykikunata ruwanki, nispa.

34 Ichaqa, cheqaqta cheqaqtapunin niykichis—aman jurankichischu, ama hanaqpacharaykupas, Yayaq tiyanan kasqanrayku;

35 Ama kay pacharaykupas, Paypa sarunan kasqanrayku;

36 Amataqmi umarayku jurankichischu, manataq huk chukchatapas yuraqtachu ni yanatachu ruwayta atiwaqchis chayqa.

37 Ichaqa, rimayniykichis kachun—ari, ari, manan, manan nispalla; kaymanta aswan hamuqqa, millaymi.

38 Qelqasqan kashan—ñawita ñawirayku, huk kirutataq kirurayku nispa;

39 Ichaqa noqa niykichis—aman millayta chuchupakunkichischu; ichaqa, pipas paña kaq uya-k’akllaykichispi ch’aqlasunkichis chayqa, huk kaq uya-k’akllaykichista payman kutirichiychis;

40 Pipas kamachisqa-siminan juisiosunkichis, hinaspataq sakoykichista qechusunkichis chayqa, punchuykichistapas payman qoychis;

41 Pipas huk puriy mitata purichisunkichis chayqa, ishkay mitata paywan riychis.

42 Mañakusoqniykiman qoy, qanmanta mañakuy munaqtataq ama qarqoychu.

43 Qelqasqallatami kashan—wasimasiykita munakunki, awqaykitataq cheqnikunki, nispa.

44 Ichaqa noqa niykichis—awqaykichista munakuychis, ñakaqniykichista saminchaychis; cheqnisoqniykichisman allinta ruwaychis; alqochasoqniykichisrayku, qatikachasoqniykichisraykupiwantaq yayaman-rimarikuychis;

45 Hanaqpachapi kaq Taytaykichispa wawankuna kanaykichispaq. Millay runamanpas allin kaqmanpas intintan Payqa lloqsichimun.

46 Chhaynaqa, ñawpa pachapi kasqan imaymanakuna, kamachisqa-simipi kaqkunaqa, noqapin llapan hunt’akun.

47 Mawk’a imaymanakunaqa pasanñan, llapan imaymanakunataq mosoq wakipun.

48 Chhaynaqa, noqa hina, utaq hanaqpachapi kaq Taytaykichis hina hunt’asqa kanaykichistan munayman.