1 Hinataq, kay simikunta Jesus rimariqtin, yapamanta runakunaman kutirirqan, khaynatataq paykunaman siminta kicharirqan: Cheqaqta, cheqaqtapunin niykichis, ama taripaychischu mana taripasqa kanaykichispaq.

2 Taripasqaykichis taripaywanmi taripasqa kankichis; tupusqaykichis tupunawantaq yapamanta qankunaman tupusqa kanqa.

3 Imaqtintaq wawqeykichispa ñawinpi kaq k’ullpichata qhawankichis, manataq kikin ñawiykichispi kaq kurkumantari yuyankichischu?

4 Imaynatataq wawqeykichista niwaqchis: Ñawiykimanta k’ullpichata horqonaypaq kachariway, nispa, kikin ñawiykichispi huk kurku kashaqtin?

5 Yaw ishkay uya, ñawpaqta kikin ñawiykipi kurkuta horqoy, hinamantaq ch’uyata rikunki wawqeykiq ñawinpi kaq k’ullpichata horqonaykipaq.

6 Ama qollanan kaqta alqokunaman qoychischu, nitaq umiñaykichiskunatapas khuchikunaman choqaychischu, mana saruykachakunanpaq, yapamanta kutirispa mana llik’inasuykichispaq.

7 Mañakuychis, qankunaman qosqataq kanqa; mashkaychis, tarinkichistaq; waqyakuychis, kicharisqataq qankunaman kanqa.

8 Sapanka mañakuqkunaqa chashkinqakun; mashkaqtaq tarinqa; waqyakuqmantaq kicharisqa kanqa.

9 Utaq, ima runan qankuna purapi kan, t’antata churin mañakuqtin payman rumi qoq?

10 Utaq, challwata mañakuqtin mach’aqwayta qonqa?

11 Chhaynari, qankuna millay kaspa allin qoykunata wawaykichiskunaman qoyta yachankichis chayri, hayk’a astawanraqtaq hanaqpachapi kaq Taytaykichis allin imaymanakunata qonqa Paymanta mañakuqkunaman?

12 Chhaynaqa, llapan imaymanakunata qankunapaq runakuna ruwanankuta munasqaykichista paykunaman ruwaychis; kaymi kamachisqa-simi unanchaqkunapiwan.

13 K’itku punkunta haykuychis; hatunmi punku hatuntaqmi chinkayman pusaq ñan, ashkhataqmi chayman haykuqkuna kanqaku.

14 Punku k’itku kaqtin, llañullataq kawsayman pusaq ñan kaqtinpiwantaq, chikallan chay tariqkuna kanqaku.

15 Qhawakuychis qankunaman oveja p’achawan hamuq mana cheqaq unanchaqkunamanta, ukhunkupitaq ichaqa wapu mikhukuq atoqkunan kanku.

16 Rurusqankupin paykunata reqsinkichis. Kishkakunamantachu uvasta runakuna pallanku, utaq higoskunatapas qhana-qhanakunamanta?

17 Chhaynallatataqmi allin sach’akunapas allin ruruta qonku; ichaqa waqllisqa sacha’qa millay rurutan qon.

18 Allin kaq sach’aqa manan millay ruruta qoyta atinmanchu; manataqmi waqllisqa sach’apas allin ruruta qoyta atinmanchu.

19 Allin ruruta mana apamuq sach’akunaqa, wit’usqa kaspan ninaman wikch’usqa kanku.

20 Chhaynaqa, ruruyninkupin paykunata reqsinkichis.

21 Manan llapan Wiraqocha, Wiraqocha nispa niwaqchu hanaqpacha qhapaq-suyuman haykunqa; ichaqa hanaqpachapi kaq Taytaypa munayninta ruwaqkunallan.

22 Ashkhan haqay p’unchawpi niwanqaku: Wiraqocha, Wiraqocha, manachu sutiykipi unancharqayku, sutiykipitaq saqrakunatapas qarqorqayku, sutillaykipitaq ancha sumaq ruwaykunata ruwarqayku, nispa.

23 Hinamantaq paykunata noqa nisaq: Manan hayk’aqpas reqsirqaykichischu, noqamanta hitiriychis millay ruwaqkuna, nispa.

24 Chhaynaqa, kay rimayniykunata uyarispa ruwaqkunataqa, qaqa patapi wasin ruwaq yachaysapa runamanmi rikch’achisaq;

25 Parataq urayamurqan, unukunataq hamurqan, wayrakunataq phukumurqan, chay wasitataq soq’arqan; manataq chay wasi urmarqanku, qaqa patapi teqsichasqa kasqanrayku.

26 Kay rimayniykunata uyarispa mana ruwaqkunatataq aqo patapi wasin ruwaq upa runaman rikch’achisqa kanqaku.

27 Parataq urayamurqan, unukunataq hamurqanku, wayrakunataq phukumurqan chay wasitataq soq’arqan; chay wasitaq urmarqan, ancha hatuntaq urmaynin karqan.