1 Jinataj lamanita Samuel ashkha imastawan sut’incharqa, chaykunataj mana escribisqas kayta atinkuchu.

2 Paykunaman nerqataj: Qhawamuychis, señalta qoykcihis; phishqa watas pasanqanku, chantá Diospa Wawan jamonqa tukuy sutimpi creejkunata salvaj.

3 Jamojtintaj kayqa qankunapaj señal kanqa: janaj pachapi jatun k’anchaykuna kanqa jamoj jinaña tuta mana laqhayakunankama, rijch’akonqataj p’unchay jinaman.

4 Chayraykutaj p’unchay kanqa, tutawan, waj p’unchaywan ima uj p’unchay jinalla, manapis tuta kanmanchu jinata; kaytaj qankunapaj señal kanqa; imaraykuchus qankuna intej llojsimunanmanta, yaykunanmantawan yachankichis; chayrayku iskay p’unchay uj tutawan kasqanta yachakonqanku; chaywampis tuta mana laqhayanqachu; jiná nacekuynimpa ñawpaqen tuta kanqa.

5 Mosoj ch’aska rikhurimonqataj, mosoj ch’askataj mana jayk’ajpis rikusqa ch’aska jina kanqa; kaytaj qankunapaj señal kanqa.

6 Kaytaj mana tukuychu, janaj pachapi ashkha señalkuna, t’ukuchisnasqan kanqa.

7 Qankuna maytapuni t’ukunkcihis, pampaman urmanaykichiskama.

8 Pitajchus Diospa Wawampi creen, payqa wiñay kawsayniyoj kanqa.

9 Chay jinamantataj Señor angelninwan kamachimuwan, qankunaman jamunaypaj, kayta willaj; arí, kaykunamanta sut’inchasunaykichispaj kamachiswan; arí, niwan: Kay llajtaman qhapariy, Diosman kutiriychis, Señorpa ñanninta wakichiychistaj, nispa.

10 Kunantaj, lamanita kasqayrayku, Señormanta kamachisqa nisqasta willasusqaykichisraykutaj, sinchi qankunapaj kasqanraykutaj, ñoqawan phiñakunkichis, ñoqata wañuchiwayta munankichistaj, qankunamanta wijch’ullawankichistaj.

11 Chaywampis nisqasniyta uyarinkichis, chayrayku kay llajtaj perqasninman wicharini, Diospa juiciosninta, mayqenkunachus juchasniykichisrayku suyasunkcihis, chaykunata uyarinaykichispaj, chaykunamanta yachanaykichispajtaj, jinapis imaynachus Diosman kutiriy kasqanta yachanaykichispajtaj;

12 Jinataj Jesucristo, Diospa Wawan, janaj pachaj, kay pachajpawan Tatan, paypa jamunanmanta yachaynaykichispaj, pichus qallariymantapacha tukuy imata ruwan; jinapis pay jamunanmanta señalkunamanta yachanaykichispaj, paypa sutimpi creenaykichispaj.

13 Paypa sutimpi creenkichis chayqa, tukuy juchasniykichismanta kutirinkichis, paypa allin ruwayninkunanejta chaykunata pampachasqas kanankupaj.

14 Qhawamuychis, watejmanta, waj señalta qoykichis, arí, wañuyninmanta señalta qoykichis.

15 Cheqamanta pay wañupunan tiyan salvacion jamunampaj; arí, paypaj kusa, allin kanman wañupunampaj, cañupunan tiyallantaj wañusqasta kawsarichimunampaj, chaynejta runas Señorpa ñawpaqenman pusasqas kanankupaj.

16 Arí, kay wañoyqa kawsarimuyta apamun, tukuy runasta ñawpaj wañuymanta kacharichillantaj — mayqenchus espiritumanta wañuy; imaraykuchus tukuy runas Adan urmasqanrayku Señormanta t’aqasqas kaspa, wañusqas jinalla kanku, kay kawsaymanta, espiritumanta ima.

17 Jinapis Cristoj kawsarimuynin runasta kacharichin, arí, tukuy runastapis, paykunata Señorman kutichipullantaj.

18 Arí, Diosman kutiriy ruwanata junt’an pillapis Diosman kutirin, payqa mana chinkasqa kanampaj, manataj ninaman wijch’usqa kanampaj; astawanqa pipis mana Diosman kutirinchu chayqa, chinkasqa, ninaman wijch’usqataj kanqa; mosojmanta espiritumanta wañuy paykunaman jamun, arí, iskay kaj wañuy, watejmanta allin ruwaykunamanta t’aqasqas kasqankurayku.

19 Chayrayku Diosman kutiriychis, Diosman kutiriychis, imaraykuchus kaykunamanta yachaspa mana kaykunata ruwankichistajchu chayqa, juchachasqas kajta saqekunkichis, kay iskay kaj wañuymantaj apasqa kankichis.

20 Waj señalmanata willasusqaykichisman jina, imachus wañuyninmanta señal, wañuynin p’unchaypi inti laqhayasqa ch’askasqampis laqhayanqanku; kay jallp’a patapi mana k’anchay kanqachu, wañunan ratumantapacha, kinsa p’unchay pasanankama, wañusqasmanta kawsarimunan ratukamataj.

21 Arí, wañupojtimpacha qhon qhon, lliuj lliujpis kanqa ashkha horas pasanankama, kay pachataj thalakonqa, kharkatitenqataj; kay pachapi rumistaj, mayqenkunachus jallp’a patapi, jallp’a patapi, jallp’a urapipis tarisqas kanqanku.

22 Arí, partisqas kanqanku, chaymantapachataj wayq’os, ch’ejtasqas, jusk’us, t’oqos, p’akisqas ima tukuy kay pachapi tarisqas kanqanku, arí, kay jallp’a patapi, jallp’a urapipis tarisqas kanqanku.

23 Chay jinataj jatun sinchi wayra parapis kallanqataj, ashkha orqostaj pampachasqas kanqanku wayq’o jina kananakukama, way q’ostaj altu orqosman kutenqanku.

24 Ashkha ñankuna thunisqas kanqanku, ashkha llajtaspis ch’in pachaman kutenqanku.

25 Ashkha sepulturas kicharisqas kanqanku, ashkha wañusqasninkuta qopullanqankutaj; ashkha allin kawsajkuna ashkha runasman rikhurimonqankutaj.

26 Angel kay jinamanta willawan; imaraykuchus qhon qhonkuna, lliuj lliujkunawan ashkha horapaj kanankuta willawarqa.

27 Qhon qhon, lliuj lliujwan nimojtintaj, sinchi wayra para kashajtintaj, kaykun apasanankuta willawan, kay pacha q’ala laqhapacha kinsa p’unchaypaj kananta willawan.

28 Ashkha runas kay imasmanta aswanraj jatuchas cosasta rikunankuta angel willallawantaj, tukuy kay jallp’a patapi kay señalkuna, t’ukuchisnaswan pasanankuta creenankupaj, runaspa wawasninkoj chawpinkupi mana creey mana kanampaj —

29 Kaytaj tukuy creejkuna salvaswas kanampaj, tukuy mana creejkuna, sumaj juicioyoj kanankupaj; juchachasqas kajtinkurí juchachasqa kayninkuta kikillankuman apachinku.

30 Kunantaj yuyariychis, yuyariychis, hermanosníy, pichus wañupun kikinrayku wañupusqanta; pitajchus sajra ruwaykunata ruwan, kikillanrayku chayta ruwasqanta; imaraykuchus libres kankichis; kikillaykcihispaj ruwajta saqesunkichis; Dios qankunaman yachanaykichispaj qon, jinataj libres kachisunkcihis.

31 Qankunaman qon allin kaj sajra kajmanta rejsinaykichispaj, jinapis qosunkichis kawsayta ajllanaykichispaj, mana chayqa, wañuyta ajllanaykichispaj; allin ruwaykunata ruwayta atinkichis allinman mosojyachisqas kanaykichispaj, chayrí, sajra ruwaykunata ruwayta atinkichis ajllasqaykichisman jina sajra qankunaman mosojyachisqa kanampaj.