Helamampa Libron

1 Jinataj pasuj chunka sojtayoj watapi, nefitasqa sajra ruwaykunapiraj karqanku, arí jatun sajra ruwaykunapiraj, lamanitakunataj Diospa kamachisqasninta, Moisespa leyninman jina, sumajta junt’anankupaj qhawarqanku.

2 Jinataj kay watapi lamanita Samuel sutiyoj runa jamorqa Zarahemla nisqa jallp’aman, llajtamantaj Diosmanta willayta qallarerqa. Jinapis payqa ashkha p’unchaykunata runasman Diosman kutirinankuta yachacherqa; runastaj payta jawaman qharqorqanku, paytaj kikin llajtanman kutipoj jina kasharqa.

3 Chaywampis Señorqa payman parlarqa watejmanta kutinampaj, imachus sonqompi kanman, chayta llajtaman sut’inchaj.

4 Jinataj mana payta llajtankuman yaykojta saqerqankuchu; chayrayku chay llajtaj perqanman wicharerqa, makinta oqharispataj sinchita qhaparerqa, imatachus Señor sonqonman churarqa, chayta llajtaman sut’incharqa.

5 Paykunaman nerqataj: Qhawamuychis, ñoqa, Samuel, lamanita kani, ima nisqastachus Señor sonqoyman churan, chaykunata parlani; paytaj sonqoyman churarqa kay llajtaman ninaypaj justiciaj espadan kay llajta pataman urmamunayasqanta; manaraj tawa pachaj watas pasashajtin kay llajtaman justiciaj espadan urmanqa.

6 Arí, jatun tukukuy kay llajtata suyan, cheqamantataj kay llajtaman jamonqa, manataj imapis kay llajtata salvayta atinchu Diosman kutiriy, chaylla salvayta atin, Señor Jesucristopi fellataj, pichus kay pachaman jamonqa, ashkha imasta muchonqataj, llajtampajtaj wañuponqa, chaykunalla llajtata salvayta atinku.

7 Señorpa angelnin kaykunata willawarqa, kusiy willaykunata apamuwarqataj. Qankunamampis kayta willajta kachasqa kani, kusiy willayniyoj kanaykichispaj; chaywampis mana wajyarikuwayta munarqankichischu.

8 Chayrayku, kayta nin Señor: Nefita runas sajra sonqoyoj kasqankurayku, mana Diosman kutirinkuchu kutirinkuchu chayqa, nisqayta paykunamanta qhechusaj, Espirituytataj paykunamanta ithirichisaj, manañataj paykunawan pacienciakusajchu, hermanosninkoj sonqosninkuta paykunaj contranman tijrachisaj.

9 Manaraj tawa pachaj wata pasashajtintaj paykunata maqachisaj; arí, espadawan, yarqhaywan, onqoywan ima paykunata visitasaj.

10 Arí, sinchi phiñayniywan paykunata visitasaj, enemigosniykichismanta tawa kaj miraymanta wakin kanqanku, pikunachus kawsanqanku q’alitumanta tukuchisqa kasqaykichista qhawanankupaj; mana Diosman kutirikunkichischu chayqa, cheqamanta kay pasanqapuni, nin Señor; tawa kaj miraymanta kajkunataj tukukuyniykichista ruwanqanku.

11 Chaywampis juchasniykichismanta llimphuchakunkichis, Señor Diosniykichisman kutirinkichistaj chayqa, phiñayniyta mana kachamusajchu, nin Señor; arí, kay jinamanta nin Señor, pikunachus juchasninkumanta arrepentikunkuman, ñoqaman kutirikunkumantaj, paykuna bendecisqas kanqanku, chaywampis, ¡Ay mana Diosman kutirejmanta!

12 Arí, ay kay jatun Zarahemla nisqa llajtamanta; allin runasraykulla salvasqa; arí, ay kay jatun llajtamanta, imaraykuchus ñoqa rikuni, nin Señor, ashkha kasqankuta, arí, kay jatun llajtaj kuraj partempis, pikunachus ñoqaj contrayta sonqosninkuta rumiyachenqanku, nin Señor.

13 Chaywampis Diosman kutirejkuna bendecisqas, paykunata khuyasaj. Mana kay llajtapi sumaj runas kanmanchu chayqa, janaj pachamanta kay llajtata tukuchej ninata apachimuyman.

14 Jinapis sumaj runasraykulla salvasqa. Chaywampis p’unchay jamonqa, nin Señor, chaypacha sumaj runasta qankunamanta qharqonkichis, chaypachataj tukuchisqa kanaykichispaj poqosqaña kankichis; arí, ay kay jatun llajtamanta, sajra ruwaykuna, millay ruwaykunawan chawpimpi kasqanrayku.

15 Arí, ay Gedeon nisqa llajtamanta, sajra ruwaykuna, millay ruwaykunawan chaypi kasqanrayku.

16 Arí, ay tukuy kay muyuynimpi llajtasmanta, mayqenkunapichus nefitakuna tiyakunku, sajra ruwaykuna, millay ruwaykunawan chaykunapi kasqanrayku.

17 Jinataj, maldicion jallp’aman jamonqa, nin Angelespa Señornin, jallp’api runasrayku, arí, sajra ruwasqankurayku, millay ruwasqankuraykutaj.

18 Angelespa Señornin nillantaj, arí, jatun cheqa Diosninchispis, pichus pakanman qhapaj kapuyninta pampapi manaña chaykunata tarenqachu, jallp’aj jatun maldicionninrayku, allinta ruwajlla, pichus Señorman chayta pakanman, paylla tarenqa.

19 Imaraykuchus munasaj, nin Señor, qhapaj kapuyninkuta ñoqaman pakanankuta; mana ñoqaman qhapaj kapuyninkunata pakajkuna maldecisqas kanku; imaraykuchus sumaj runasmanta wajkuna mana ni pipis ñoqaman qhapaj kapuyninkuta pakawankumanchu; pitajchus mana ñoqaman qhapaj kapuyninta pakanchu, maldecisqa kanqa, qhapaj kapuynimpis maldecisqallataj, manataj pipis chayta tarenqachu jallp’a maldecisqa kasqanrayku.

20 P’unchay jamonqataj, maypachachus qhapaj kapuyninkunata pakanqanku, sonqosninku qhapaj kapuyninkunapi kasqankuraykutaj, enemigosninkumanta ayqejtinku qhapaj kapuyninkunata pakasaj; mana ñoqaman pakasqankuraykutaj maldecisqas kanqanku qhapaj kapuyninkunapis maldecisqallataj; chay p’unchaypitaj maqasqas kanqanku, nin Señor.

21 Qhawaychis, kay jatun llajtamanta runas, parlasqasniyta uyariychistaj; arí, Señorpa nisqasninta kasuychis; imaraykuchus qhapaj kapuyniykichiskunarayku maldecisqas kasqaykichista nin, jinapis qhapaj kapuyniykichiskunapis maldecisqallataj sonqosniykichista chaykunaman churasqaykichisrayku, chaykunata qankunaman Qojpa nisqasninta mana kasusqaykichisrayku.

22 Señor Diosniykichista qankunata bendecisqa cosaspi mana yuyarinkichischu, chaywampis qhapaj kapuyniykichispi yuyankichispuni, mana Señor Diosniykichista agradecenkichistajchu; arí, sonqosniykichisqa mana Señorman yuyasqachu, astawan jatun orgullowan punkirinku, alabakunaykichiskama, jatunchaykunaykichiskama, munapayanaykichiskama, phiñakunaykichiskama, sajra yuyanaykichiskama, qhatiykachanakunaykichiskama, wañuchinakunaykichiskamataj, jiná tukuy sajra ruwaykunata ruwanaykichiskama.

23 Kayraykutaj Señor Diosqa kay jallp’ata, qhapaj kapuyniykichistapis maldicerqa, kaytaj sajra ruwaykunata ruwasqaykichisrayku.

24 Arí, ay kay llajtamanta, imaraykuchus kay p’unchay chayamunña, profetasta jawaman wijch’unkichis, paykunata yachapayankichistaj, paykunata rumiswan ch’anqankichistaj, paykunata wañurachinkichistaj, jiná tukuy imaymana sajra ruwaykunata paykunaman ruwankichis, unay p’unchaykunapi jina.

25 Kunantaj, parlanakuspa ninkichis: Kawsayninchis unay ñawpaj tatasninchispa p’unchayninkunapi kajtinkoqa, profetasta mana wañurachisunmanchu karqa; paykunata rumiswan mana ch’anqasunmanchu karqa, manataj paykunata jawaman wijch’usunmanchu karqa.

26 Qhawarikuychis paykunamanta qankuna astawan millay kankichis; imaraykuchus Señor kawsasqanman jina, profeta qankunaman jamojtenqa Señorpa nisqanta willaj, imatachus juchasniykichismanta, sajra ruwaykunata ruwasqaykichismantawan willan, qankuna paywan phiñakunkichis, payta wijch’ullankichistaj, jinataj payta wañuchinaykcihispaj tukuy imata mask’ankichis; arí, llulla profeta kasqanta ninkichis, juchasapa runa, supaymanta runa kasqanta nillankichistaj, ruwasqaykichis sajra kasqankuta willasqanrayku.

27 Chaywampis, runa qankunaman jamunman chayqa, nispa: Kayta ruwaychis, manataj sajra ruway kanchu; chayta ruwaychis manataj muchunkichischu; arí, nenqa: Kikin sonqosniykichispa munayninman jina puriychis; arí, ñawisniykichispa munayninman jina puriychis, imatachus sonqoykichis munan chayta ruwallaychistaj — runa qankunaman jamunman kayta nispa chayqa, payta wajyarikuwajchis, profeta kasqanta nillawajchistaj.

28 Arí, payta jatunyachisnkichis, paymantaj kapuyniykichismanta qonkichis; qoriykichista, qolqeykchistawan paymana qonkichis, valesqa p’achaswantaj payta p’achallichinkichis; alabakususqaykichisrayku, tukuy allillan kasqanta nisqanraykutaj, paypi juchata mana tarinkichischu.

29 O qankuna juchasapa, millay ruwaj runas; rumiyachisqa, sinchi umayoj runas, ¿Mayk’ajkamataj Señorqa qankunawan pacienciakonqa? Arí, ¿Mayk’ajkamataj mana yachayniyoj, ciego pusajkunawan pusasqas kankichis? Arí, ¿Mayk’ajkama laqhapachata ajllankichis k’anchaypa cuentampi?

30 Arí, Señorpa phiñaynin ña contraykichispi lawrarichisqaña; sajra ruwaykunata ruwasqaykichisrayku jallp’ata maldecin.

31 Qhapaj kapuyniykichiskunata maldecinampaj p’unchaytaj qayllamushan, thunikoj kanankupaj, mana chaykunata jap’iyta atinaykichispaj; wajcha, pobre kayniykichis p’unchaykunapitaj chaykunata mana waqaychayta atinkichischu.

32 Pobre kayniykichis p’unchaykunapitaj Señorta wajyankichis; qhasillataj wajyankichis, imaraykuchus ch’inyachejniykichis qankunaman jamusqaña, tukuchisqa kanaykichistaj mana cambianqachu; chaypachataj waqankichis, qhaparinkichistaj, nin Angelespa Señornin. Chaypachataj waqankihis, nispa:

33 O Diosman kutiriyman karqa, amataj profetasta wañuchiymanchu karqa, paykunata rumiwan mana ch’anqaymanchu karqa, paykunata mana wijch’uymanchu karqa. Arí, chay p’unchaypi ninkichis: O qhapaj kapuyninchiskunata qowasqanchis p’unchaypi Señorta yuyarisunman karqa, chayraykutaj chaykuna mana thunikojchu kankumana karqa, manataj chinkachisunmanchu karqa; imaraykuchus qhapaj kapuyninchiskuna ñoqanchismanta t’aqasqas kanku.

34 uj herramientanchis kaypi saqenchis, q’ayantimpajtaj manaña kaypichus; espadasninchista mask’ajtinchistaj maqanakunanchispaj, chaykuna ñoqanchismanta qhechusqas kanku.

35 Arí, qhapaj kapuyninchista pakarqanchis, chaykunataj ñoqanchismanta chinkaripunku jallp’aj maldicionninrayku.

36 O Señorpa nisqan ñoqanchisman jamoj p’unchaypi Diosman kutirisunman karqa; imaraykuchus kananqa jallp’a maldecisqa, tukuy ima mana sayanampaj, chaykunata mana jap’iyta atinchischu.

37 Supaykunataj muyuykuwanchis, arí, ñoqanchista tukuchiyta munajpa angelesnin muyuykuwanchis. Juchasninchistaj jatuchas kanku. O Señor, ¿Manachu phiñayniykitañoqaykumanta t’aqayta atiwaj? Kaytaj parlayniykichis kanqa chay p’unchaykunapi.

38 Chaywampis, kasukojchus manachus rikuchikunaykichispaj p’unchay pasasqaña; salvakunaykichispaj p’unchayta pasacherqankichis wiñaypaj tardeña kanankama, tukuchisqa kanaykichis segurasqataj; arí, tukuy p’unchayniykichiskunapi, imatachus mana jap’iyta aterqankcihischu, chayta mask’arqankichis; jiná kusiy kayta mask’arqankichis sajra ruwaykunata ruwaspa, chaytaj allin kajpa contrampi, pichus jatun Wiñay Pusajninchis, paypa contrampi.

39 ¡O qankuna, kay llajtaj runasnin, ojala nisqasniyta uyariwajchis! Jinataj Diosmanta mañakuni Señorpa phiñakuynin qankunamanta t’aqasqa kanampaj, Diosman kutirinaykichispaj, salvasqa kanaykichispajtaj.