1 Kunantaj, wawáy, ujtawan, imatachus mana entiendeyta atinkichu, chay yuyayniykita phutichisqanta rikuni — chaytaj Diospa justician juchasapasta jasut’inampaj. Qanqa juchasapapaj muchuy kayman kachasqa kasqanta mana justicia kasqanta ninki.

2 Qhawariy, wawáy, kayta willasqayki. Señor Dios ñawpaj tatasninchista Eden nisqa huertamanta kachasqantawan, jallp’a tarpojta, mayqen jallp’amantachus ruwasqas karqanku — arí, payqa runata chaymanta qhechorqa, Eden huertaj inti llojsimuy ladumpi querubinta, tukuy mayllamampis kuyoj lawraj espadatawan churarqa kawsaymanta sach’ata jark’anampaj.

3 Kunan, runa Dios jinaman tukusqanta rikunchis, allin kajkunata sajra kajkunatawan rejsisqanrayku; runaqa makinta oqharinman karqa kawsay sach’amanta mikhunampaj chayqa, wiñaypaj kawsanman karqa, chayrayku Señor Dios querubinta, lawraj espadatawan churarqa, mana mikhunampaj poqoyninta.

4 Chaymantataj rikunchis Diosman kutirinampaj tiempo runasman qosqa kasqanta, arí, kasukojchus manachus kasqanta rikuchinampaj, Diosman kutirinampaj, Diospa munayninta ruwanampajtaj tiempo.

5 Adanqa chay kikin ratupacha makinta jaywanman karqa kawsay sach’amanta mikhunampaj chayqa, Diospa nisqanman jina, wiñaypaj kawsanman karqa, mana Diosman kutirinampaj tiempoyoj kajtimpis; arí, chay jinapis Diospa nisqan ni imapaj kanmanchu karqa, jatun salvay ruwana jark’asqa kanman kallarqataj.

6 Chaywampis, runasman qosqa karqa wañunankupaj — chayrayku, kawsay sach’amanta t’aqasqas karqanku, chay jinapis kay pachamanta t’aqasqas kananku karqa — runa wiñaypaj chinkasqa kanampaj, arí, urmasqa runasman tukusqankurayku.

7 Kunantaj, kaymanta ñawpaj tatasninchis Señormanta t’aqasqas kasqankuta rikunchis kay jallp’api, espiritupipis; chaymantataj kikin munayninkuta ruwanankupaj kasqankuta rikullanchistaj.

8 Chantá, kay kawsaymanta wañuymanta mana kutichisqas kanankuchu karqa, imaraykuchus chayqa jatun kusiy ruwanata tukuchinman karqa.

9 Chayrayku, espiritoqa mana ni jayk’aj wañuyta aterqachu, runaj urmasqan espiritumanta, kay kawsaymantawan wañuyta apamorqa, chay ninayan, Señormanta t’aqasqas karqanku, jinataj runas kay espiritumanta wañuymanta kutichisqas kananku karqa.

10 Chayrayku, kawsayninkupi aycha kajman, aychaj munayninta ruwajman, supay kajman ima tukojtinku, kasukojchus manachus kasqankuta rikuchinankupaj tiempoman tukorqa sumajta wakichikunankupaj; wakichiskunapaj tiempoman tukorqataj.

11 Yuyariy, wawáy, mana juchamanta kacharichiy ruwana kajtenqa, (chayta uj laduman churajtinchis) chayqa, wañojtinkupacha espiritusninku may muchuyniyoj kankumana karqa, Señormanta t’aqasqas kasqankurayku.

12 Kunantaj, mana ni mayqen ñampis karqachu runata kay urmasqa kawsayninmanta pusanampaj, imatachus kikin juchallikusqankurayku chayachikorqa.

13 Chayrayku, justiciaman jina, juchamanta kacharichiy ruwana mana ruwasqa kayta aterqachu, runas Diosman kutirisqankumana jinalla kay kasukojchus manachus rikuchikunankupaj kawsayninkupi, arí, kay wakichiskunankupaj kawsayninkupi; mana chaynejta kanmanchu karqa chayqa, khuyay mana servinmanchu, justicia ruwanata tukuchillanmantaj. Justicia ruwanataj mana tukuchisqa kayta aterqachu, tukuchisqa kajtenqa Dios manaña Dios kanmanchu.

14 Chaymantataj tukuy runas urmasqas kasqankuta rikunchis, paykuna justiciapi jap’isqas karqanku; arí, Diospa justiciampi, imachus paykunata wiñaypaj paymanta t’aqacherqa.

15 Kunantaj, mana allinyachiy ruwana ruwasqachu kanman chayqa, khuyay ruwana mana ruwasqachu kanman; chayrayku Dios kikinmanta kay pachaj juchasninta allinyachin, khuyay ruwanata ruwanampaj, justiciaj munayninta junt’anampaj, Dios cabal, k’acha, khuyayniyojtaj kanampaj.

16 Kunanqa, jasut’eyqa, wiñaypaj espiritoj kawsaynin jina, chay jasut’iy mana kanmanchu chayqa, runaspaj Diosman kutiriy mana kayta atinmanchu. Chaytaj kusiy ruwanaj contrampi ruwasqa, mayqenchus wiñaypaj espiritoj kawsaynin jina.

17 Kunantaj runa mana juchallikunmanchu chayqa, ¿Imaynatataj Diosman kutirinman? Mana ley kajtin, ¿Imaynatataj juchallikunman? Mana jasut’iy kanmanchu chayqa, ¿Imaynatataj ley kanman?

18 Kunantaj, jasut’iy qosqa karqa, cheqa ley qosqataj, chay juchasninrayku yuyaypi nanayta apamorqanku runaman.

19 Chayrayku manachus ley qosqa kanmanchu karqa — pichus wañuchin, payqa wañunan tiyan, nispa — chayqa, wañuchinman chayqa, ¿Wañupunanmanta manchachikunmanchu?

20 Jinataj runasman mana juchallikunankupaj ley mana qosqachu kanman chayqa, runas juchallikusqankurayku mana manchachikunkumanchu.

21 Ley mana qosqachu kanman chayrí, runas juchallikojtinku, ¿Imata justicia ruwayta atinman? Mana chayrí, ¿Khuyakuy? Imaraykuchus chaykuna mana runaspaj ruwayta atinkumanchu.

22 Chaywampis ley qosqa, jasut’iy qosoqataj, runasman Diosman kutirinankupaj qosqataj; khuyayqa Diosman kutiriypaj ruwan; mana chay jina kajtenqa justiciaqa runapi ruwan, leyta ruwachintaj, leytaj jasut’in, mana chay jina kajtinrí justiciaj ruwanasnin thunisqas kankuman, Diostaj manaña Dios kanmanchu.

23 Chaywampis Dios Diosraj kashampuni, khuyaytaj Diosman kuturiyta munajpi ruwan, khuyaytaj jamun allinyachiy ruwanarayku: allinyachiy ruwanataj wañusqasta kawsarichimun; wañusqaspa kawsarimuyninkutaj runasta mosojmanta Diospa ñawpaqenman pusan; chay jinataj paykuna paypa ñawpaqenman mosojyachisqas kanku, ruwasqasninkuman jina juzgasgas kanankupaj, leyman jina, justiciaman jinataj.

24 Justiciataj tukuy munayninkunata ruwan, khuyaytaj tukuy paypaa kajkunata wajyan; chay jinataj, Diosman kutiriyta cheqa munajlla salvasqa.

25 Creesqaykiman jina, ¿Khuyay justiciamanta suwayta atinchu? Niyki, Mana, ni uj chhikitallantapis. Chay jina kajtenqa, Dios manaña Dios kanmanchu.

26 Chay jinamantataj Dios jatun, wiñay munayninkunata ruwachin. Chaykunataj wakichisqas karqanku kay pachaj qallariyninmantapacha. Chay jinamantataj runasta salvachiy ruwana, kacharichiy ruwanawan ruwachisqas kanku, jinapis paykunata tukuchiy ruwana, muchuchiy ruwanawan ruwachisqas kallankutaj.

27 Chayrayku, wawáy, pichus jamunman, payqa kaswaymanta yakusta qhasilla ujyayta atin; pitajchus mana jamunmanchu, payqa wajyasqa; chaywampis qhepa p’unchaypi ruwasqanman jina paypaj mosojyachisqa kanqa.

28 Sajra ruwanasta ruwayta munajqa, manataj p’unchayninkunapi Diosman kutirinchu chayqa, sajra payman ruwasqa kanqa, Diospa mosojyachiyninman jina.

29 Kunantaj, wawáy, manaña kaykunanejta phutisqa kanaykita munayman, astawanqa juchasnillaykita phutichisojta saqey, ima phutiywanchus Diosman kutirichisonqa.

30 O wawáy, manaña Diospa justicianta neganaykita munayman. Diospa justicianta negaspa ama ni aswan juch’uy kaj juchallaykitapis pakaychu; astawanqa Diospa justician, khuyaynin, paciencianwan q’alitumanta sonqoykita atipajta saqey, saqeytaj k’umuykuchisojta pampakama.

31 Kunantaj, o wawáy, Diosmanta wajyasqa kanki kay llajtaman nisqanta yachachinaykipaj. Kunantaj wawáy, riy, cheqa kajwan, llimphu sonqowan ima nisqanta willamuy, runasta Diosman kutiriyman apanaykipaj, paykunapi jatun khuyay ruwana kanampaj. Nisqasniyman jina Dios qosuchun. Amen.