1 Jinataj Almaqa chay nisqasninta paykunaman willaytawan, pampapi tiyarikorqa. Amulektaj jatarispa paykunata yachachiyta qallarerqa, nispa:

2 Hermanosníy, Cristoj jamunanmanta, pimantachus yachachiyku Diospa Wawan kasqanta, paypa jamunanmanta willaykunasta mana yachasqaykichista mana creenichu. Arí, manaraj ñoqaykumanta t’aqakushajtiykichis kaykuna ashkhamanta qankunaman yachachisqas karqanku, chayta yachanipuni.

3 Munasqa hermanoy, imatachus ruwanaykichis tiyan, chayta, phutiyniykichiskunarayku willasnaykichista munarqankichis. Uj chhikantataj parlasorqachis yuyayniykichista wakichinampaj. Arí, feniyoj, pacienciayoj ima kanaykichista willasorqachis.

4 Arí, feniyoj kanaykichispaj nisqanta sonqosniykichispi tarpunaykichispaj, allinchus manachus kasqanta yachanaykichispaj, chayta munan.

5 Jiná yuyayniykichispi jatun tapuy kasqanta rikuyku. Chay tapuytaj ¿Palabra Diospa Wawampichu?, mana chayqa, ¿Manachu Cristo kanqa?

6 Ashkha kutita hermanoy palabra Cristopi kasqanta salvakunaykichispaj rikuchisorqachis, chayta rikunkichisña.

7 Hermanoy Zenospa nisqasninta willarqa, Diospa Wawannejta juchamanta kacharichiy jamunanta willaspa, Zenockpa nisqasnintawan willallarqataj. Jinapis Moisespa nisqasnintawan willallarqataj kaykuna cheqa kasqankuta rikuchinampaj.

8 Kunantaj kikiymanta kaykuna cheqa kasqankuta willasaj. Qhawaychis, Cristo runaspa wawasninkuman jamonqa, llajtampa juchasninta apaj. Kay pachaj juchasninta allinyachenqataj, chayta yachani; imaraykuchus Señor Dios chayta nin.

9 Jinataj allinyachiy kanan tiyan; imaraykuchus Wiñay Diospa jatun munayninman jina allinyachiy kanan tiyan, mana chayqa tukuy runas wañunanku tiyan. Arí, tukuyninku juchachasqas kanku chayqa. Arí, tukuyninku urmasqas, chinkasqastaj kanku. Manatajchus allinyachiy kanman karqa, mayqenchus kanan tiyan, chay mana kanmanchu chayqa, tukuyninku wañunanku kanman karqa.

10 Jatun qhepa sacrificio kanan tiyan, mana runa sacrificiochu, manataj animal sacrificiochu, manataj mayqen laya p’isqo sacrificiochu; chayrayku mana runa sacrificiochu kanman; astawanqa tukuypaj wiñay sacrificio kanan tiyan.

11 Ni mayqen runapis kanchu, pichus kikin yawarninta jich’achiyta atinman wajpa juchasninta allinyachinampaj. Kunanqa, uj runachus wañuchin chayqa, ¿Cheqa leyninchis qhechonqachu hermanompa kawsayninta? Niykichis, Mana.

12 Astawanqa leyman jina wañuchej wañunan tiyan. Chayrayku tukuypaj wiñay allinyachiy, chaylla kay pachaj juchasninta allinyachiyta atinman.

13 Chayrayku jatun qhepa sacrificio kanan tiyan. Chaymantataj yawarta jich’achiy manaña kanqachu, jiná chay manaña kananchu tiyan. Chantataj Moisespa leynin junt’asqa kanqa. Arí, q’alitumanta junt’asqa kanqa, sapa juch’uy letran, sapa ch’iñi rayallampis junt’asqa kanqa, manataj imapis faltanqachu.

14 Kunantaj kayqa leypa tukuy imapaj kaynin, sapa ukhumpi kajtaj jatun qhepa sacrificiota rikuchin. Chay jatun qhepa sacrificiotaj Diospa Wawan kanqa, arí, tukuypaj, wiñaypajtaj.

15 Chay jinamantataj tukuy paypa sutimpi creejkunata salvanqa. Jatun khuyakuy, imachus justiciata atipan, chayta apamun. Runas Diosman kutiriypi feniyoj kanankupaj ñanta wakichisllantaj. Chaykunallapaj kay qhepa sacrificio.

16 Chay jinataj khuyayqa justiciaj munayninkunata junt’ayta atin, paykunata allin kaypa makisnimpi jap’ichintaj. Jina kajtimpis pichus mana feniyojchu kashan Diosman kutirinampaj tukuy leypa justiciampa munayninta junt’anan tiyan. Chayrayku pichus feniyoj Diosman kutirinampaj, payllapaj jatun wiñay kacharichiy kashan.

17 Chayrayku Dios qankunata feniyoj kajta saqechun, hermanosníy, juchasniykichismanta kutirinaykichispaj, llimphu sutinta wajyarinaykichispaj, qankunawan khuyayniyoj kanampaj.

18 Arí, payta mañakuychis khuyayniyoj kanampaj; imaraykuchus payqa atiyniyoj salvanampaj.

19 Arí, k’umuykuychis, paymantapuni mañakuychistaj.

20 Chajrasniykichispi kaspa, payta wajyaychis, arí, tukuy uywasniykichista bendecinampaj.

21 Wasisniykichispi kaspa, payta wajyaychis, arí, tukuy wasiykichispi kajkunata bendecinampaj; mañakuychis paqarimpi, chawpi p’unchaypi, ch’isipitaj.

22 Arí, enemigosniykichispa atiyninku contrampaj mañakuychis.

23 Arí, supay, pichus tukuy allin ruwajkunaj enemigon, paypa contrampaj mañakuychis.

24 Payta mañakuychis chajrasniykichispi tarpusqaspaj, chaykuna allin kanankupaj.

25 Chajrasniykichispi uywasniykichispaj mañakuychis, yapakunankupaj.

26 Chaywampis kayqa mana tukuychu; wasiykichispi, pakasqa lugarniykichispi, ch’in pampaykichispi ima tukuy imata payman willanaykichis tiyan.

27 Arí, mana Señorta wajyashajtiykichis, sonqosniykichista junt’asqas kajta saqekuychis, paymanta mañakuspa allin kanaykichispaj, muyuyniykichispi kajkuna allin kanankupajtaj.

28 Kunantaj, munasqa hermanosníy, niykichis ama chaylla tukuy ima kasqanta yuyaychischu, imaraykuchus tukuy chayta ruwaytawan, pobre mana kapuyniyoj runasta, mana p’achayoj runastawan wasanchankichis chayqa, onqosqasta, phutiyniyoj runastawan mana visitankichischu chayqa, kapuyniykichista, qankuna kapusojtinkichisqa, mana qonkichischu — niykichis, kaykunata mana ruwankichischu chayqa, oracionniykichis qhasilla kanqa, manataj sirvisunkichischu, feta negaj, puraj uyas jinalla kashankichis.

29 Chayrayku mana munakuyniyoj kayta yuyarinkichischu chayqa, q’opa jinalla kankichis, chaytaj wijch’usqa, (mana valorniyojchu kasqanrayku) runastaj chayta sarunku.

30 Kunantaj, hermanosníy, kay chhika willaykunata jap’iytawan, santa escrituras kaykunamanta willasqankuta rikuspataj, Diosman kutirinaykichispaj ruwaykunasta apamunaykichista munayman.

31 Arí, manaña sonqosniykichista rumiyachispa ñawpajman jamunaykichista munayman. Qhawaychis, kunantaj salvakunaykichispaj p’unchay. Chayrayku, Diosman kutirinkichis, manataj sonqosniykchista rumiyachinkichischu chayqa, kunampacha qankunaman juchamanta kacharichiy apamusqa kanqa.

32 Kay kawsaypi runas wakichinanku tiyan Diosta qhawanankupaj. Arí, kay kawsaypi runas ruwayninkuta ruwananku tiyan.

33 Kunantaj, ñawpajta nisqayman jina, kay chhika willaykunata jap’inkichis, chayrayku mana tukukuykama Diosman kutiriypi tardanaykichista willaykichis. Imaraykuchus kay kawsay p’unchaymanta, imachus ñoqanchisman qosqa kashan wiñaypaj wakichiskunanchispaj, sichus mana p’unchayninchiskunata aswan allinyachinchischu chayqa, chaymanta laqhapacha tuta jamonqa, mayqempichus ni imata ruwayta atisunmanchu.

34 Chay millay pachapi, mana niyta atinkichischu, juchasniymanta arrepentikusaj, Diosniyman kutirinaypaj. Mana kayta niyta atinkichischu; imaraykuchus chay kikin espiritu, mayqenchus cuerposniykichispi kashan kay kawsaymanta llojsejtiykichis, chay kikin espiritu wiñay pachapi cuerpoykichispi kayta atenqa.

35 Diosman kutiriy p’unchayta qhepaman churankichis wañunaykichiskamapis chayqa, supaypa espiritunta kasunaykichis kanqa, qankuna paypata kanaykichispaj sellasunkichistaj. Chayrayku Señorpa Espiritun qankunamanta ithirin, mana qankunapi lugarniyojtaj, supaylla tukuy atiyniyoj qankunamanta. Kayqa sajra runaspa qhepa tukukuyninku.

36 Kaytataj yachani, Señorqa mana ch’ichi templospi kasqanta, willasqanrayku. Allin ruwajkunaj sonqosnillankupi kakun. Arí, allin ruwajkuna reinompi tiyakunankuta willan, manaña chaymanta llojsinankupaj. P’achasninkurí Corderoj yawarninwan yurajchasqas kanku.

37 Kunantaj, munasqa hermanosníy, kaykunata yuyarinaykichista munayman. Diospa ñawpaqempi kasuywan salvakunaykichista munallaymantaj, Cristoj jamunanta manaña neganaykichispaj.

38 Manaña Santo Espiritoj contrampi churakunaykichista, astawanqa chayta jap’inaykichista, Cristoj sutinta apanaykichistatajpis munayman, jallp’a polvokamapis k’umuykunaykichista, Diosta espiritupi, cheqa kajkunapi ima yupaychanaykichispajtaj, mayllapipis kaspa, jinapis sapa p’unchayta agradecespalla kawsanaykichispaj tukuy qankunaman khuyayninkunata qosqanmanta.

39 Arí, mañaykichis, hermanosníy, sumajta qhawakunaykichista sapa kutita Diosmanta mañakunaykichistataj, mana supaypa tentacionninnejta chinkapunaykichispaj, manataj pay atispasunaykichispaj, chay qhepa p’unchaypi mana payta kasojkuna kanaykichispaj. Qhawaychis, payqa mana t’inkasunkichischu ni ima sumajwan.

40 Kunantaj munasqa hermanosníy, mañaykichisman suyayniyoj kanaykihcispaj, tukuy laya phutiykunatapis awantanaykichispaj. Jinapis ancha pobre kasqaykichisrayku qankunata wijch’ojkunapaj mana rimanaykichispaj, chayta mañaykichisman, imaraykuchus chayta ruwawajchis chayqa, paykuna jina juchasapasman tukuwajchis.

41 Qankuna pacienciayoj kanaykichista, chay phutiykunata awantanaykichista sinchi suyayniyoj kaspa tukuy phutiyniykichismanta samarikunaykichispaj, chayta munayman.